Karaloʼuta nümüinjatka Tito
3 Ayataʼaya püsoʼirüin naaʼin jüüjüüinjanain naya namüin na aluwataashiikana jee namüin na sülaülakana mma otta nacheküinjatü achiki aaʼinraa kasa anasü. 2 Nnojotsü mojuinjatüin nanüiki süchiki wayuu, nnojoishii katkaaraliinjanain naya, nnojoliinjana ichein naya süchiirua tü namakat otta anamiainjana naya waneepia sümüin wayuu. 3 Mapuʼusia wakuwaʼipa, mayaawatüinpuʼusalii waya saaʼu wakuwaʼipa, nnojoliipuʼushii waya oonooin sümaa tü nümakat Maleiwa, emeejünapuʼushii waya sutuma wayuu, mapuʼushii süchepchiakai waaʼin tü kasa mojusü suchuntaapuʼukat waaʼin jee shia woʼunapuʼuka neʼe achiirua tü kasa talatajatkalü atuma waaʼin. Wattapuʼu maʼin saalii tü kasa mojusü waaʼinrakat, achumüjapuʼusü waaʼin, keemapuʼusü maʼin wakuwaʼipa otta üttajiraapuʼusü waaʼin.
4 Sütüjaanapa saaʼu kamaneein maʼin chi Maleiwakai, chi Oʼtteʼerakai waya otta sütüjaanapa saaʼu alin maʼin wayuu nüpüla, 5 nuʼtteʼerüin waya süka sümülialaain naaʼin waalin, nnojotsü shiain sünainjee lotuin sukuwaʼipa tü kasa waaʼinrakat. Nuʼtteʼerüin waya süka wuleitpain wakuwaʼipa nutuma, katüitpakalaka woʼu otta müitpa jeketükai saaʼin wakuwaʼipa nutuma sükajee tü nüpülainkat. 6 Naapakalaka Maleiwa wamüin tü nüpülainkat nükajee Jesucristo, chi Oʼtteʼerakai waya, 7 müsü sukuwaʼipa tia nutuma süpüla katüinjatüin woʼu süpüla kaʼikat süpüshuaʼa maʼaka pansaatüjülüinña shia nutuma, wounteerü tia sünainjee kamaneein maʼin nia wamüin, loteetkalaka wakuwaʼipa noʼuluʼu.
8 Anoujunuinjatü anain tia pütchikat, shiakalaka anain aluʼu püküjawaʼire shia namüin na wayuu anoujainnapakana nünain Maleiwa, naaʼinmaajeetkalaka aaʼinraa kasa anasü. Anasü maʼin tia otta anasü nakuwaʼipa na wayuukana sünainjee.
9 Nnojo püʼülüjiraain süchiirua kasa eekai nnojoluin kasain anain apüla, nnojo püʼülüjiraain süchiirua tü ashajünakat süchiki nanülia na putuushinuukana otta nnojo pütkaain sünainjee tü Pütchi Aapünakat nümüin Moisés, jama nnojoluin kasain saamüin tia makat otta nnojotsü eʼrüin wayuu kasa anasü suluʼujee tia. 10 Eere wanee wayuu jaʼaka ekirajakai sünain alawaa jee nnojorüle nuuʼulaain suulia tia mayaainjeʼe piantuaichin nüchiaanüin, anashi nnojoire kasajachin nia pümüin, 11 jama pütüjaain saaʼu nükayalaain suulia anoujaa chia wayuukai, kaainjalashi nia. Kasalajanale naainjala nümüin, naainjalaajuchia neʼe nia.
12 Taluwataapeena pümüin Ártemas jee niale Tíquico, anashi puʼunamaatüle sünain anaʼlawaa tamüin chaa Nicópolis, jama chainjachin taya juyapoʼu. 13 Oʼunajaainjachi Apolos otta müshia Zenas, chi atüjakai süpüleerua tü Pütchi Aapünakat nümüin Moisés. Anakajaʼa paapüle namüin tü kasa choʼujaajeetkat namüin wopuluʼu. 14 Aainjainjanapejeʼe waneepia kasa anasü na wawalayuukana süpüla natüjainjanain akaalinjaa wayuu kasale alatüin sümüin, naaʼinrajatü tia süpüla namüliajüliinjanain.
15 Nasaküin pia napüshuaʼa na yaakana tamaa. Püsaka tamüin na anoujashii aikana apüla waya.
Kasataalejeseʼe kamaneein chi Maleiwakai jümüin jüpüshuaʼa.