Tü nüshajalakat Lucas
14 Soʼu wanee kaʼi neemeraakalü oʼu na judíokana, nuunejaanaka Jesús sünain ekawaa nutuma wanee nekiipüʼü na fariseokana. Niʼrajaanaka maʼin Jesús natuma na wayuu eejanakana sünain tia ekawaakat. 2 Eejachikalaka yala nüpüleerua Jesús wanee wayuu shütüsü nüta. 3 Nümakalaka Jesús namüin na fariseokana otta namüin na wayuu atüjakana süpüleerua tü Pütchi Aapünakat nümüin Moisés: «¿Anasüche naawaleʼennüle wanee wayuu eekai ayuulin soʼu tü sükaliakalü eemerawaa? ¿Nnojottaapa anain?». 4 Koʼutakalaka neʼe naya nuulia. Niʼitaakalaka najapü Jesús naaʼu chi wayuukai, naawaleʼeraka tü ayuuliikat nuulia jee nüjütakalaka nia süchikijee tia. 5 Nümakalaka Jesús namüin: «Nujutuule wanee jüchon suluʼu wanee ishi soʼu sükalia eemerawaa jee niale wanee jüpaaʼase, ¿aashin jiyuʼlamaateechin nia suluʼujee tü ishikat?». 6 Nnojotkalaka jamüinjatüin nanüiki nümüin.
7 Nayasaʼa na wayuu ounejaanakana sünain tü ekawaakat, aikaajaashii naya eere naikalaain na wayuu kojutukana atumawaa. Niʼrapa Jesús tia, nikirajakalaka naya sünain wanee kasa sümaa nümüin namüin: 8 «Puunejaanapa sünain wanee miʼiraa shikiira kaʼwayuusee, nnojo püikalaain eere naikalaainjanain na wayuu kojutukana atumawaa, jama nuunejaanaleere wanee wayuu eekai kojutuleʼeinña maʼin puulia. 9 Anta meechijaʼa chi wayuu ounejaakai jia jee nümeechika pümüin: ‹Pütamaa nüpüleerua chira wayuukai›. Oʼuna meechijaʼa pia sümaa japülii sünain aikalawaa chaa chiiruaa. 10 Puunejaanapa, anashi püikalaale chiiruaa. Nünteechika chi wayuu ounejaashikai pia sümaa nümüin pümüin: ‹Waʼle, anashi püikalaale eere naikalaainjanain na wayuu kojutukana atumawaa›. Suluʼujee tia, kojuteechi pia noʼupala na wayuu ounejaanakana wanaa pümaa. 11 Chi wayuu yaletakai aaʼin nieechi eʼraka japülii, eekajasaʼa chi nnojoikai yaletüin aaʼin nieechi kojutuka atumawaa».
12 Nümakalaka Jesús nümüin chi wayuu ounejaakai nia sünain ekawaa: «Puunejaapa wayuu sünain wanee ekawaa, nnojo nayain neʼe puunejaain na paʼaleewainyuukana, na puwalayuukana, na püpüshikana jee na wayuu washinnuu kepiakana püʼütpünaa. Nayalejeʼe neʼe puunejaain, eeshijaʼa süpüla nounejaain piaya. 13 Puunejaapa wayuu sünain ekawaa, anashii nayale puunejaain na wayuu eekai maʼletsein, na wayuu eekai masaʼain, eekai matünain, eekai shalüʼütüin otta chira eekai moʼupaʼain. 14 Talateetkalaka maʼin paaʼin, süka nnojoluin eein wanee kasa shiiʼirakaluʼuinjatka pümüin natuma. Eʼreechipejeʼe pia kasa anasü nasoʼireʼennapa aaʼin na wayuu lotokana akuwaʼipa».
15 Shiasaʼa naapaiwaʼaya tia wanee wayuu yalajachikai sünain tü ekawaakat, nümakalaka nümüin Jesús: «Anakuwaʼipai chi wayuu ekeechikai nuluwataapeena Maleiwa».
16 Anuukalaka nünüiki Jesús niʼipajee chia wayuukai: «Eejaittaa wanee wayuu aainjirakai wanee ekawaa, nuunejitkalaka watta saalii wayuu sünain tia ekawaakat. 17 Süntapa sükalia tü ekawaakat, nüjütaka chia wayuukai wanee nüchepchia sünain maa namüin na wayuu nuunejitkana: ‹Anashii jüntüle, yapaitpa kasa süpüshuaʼa tatuma›. 18 Wainmaka neʼe nanüiki naya wayuukana shiiʼiree nnojoliin noʼuneein. Nümakalaka chi palajaikai wayuu nümüin: ‹Aishaʼajaa, isataajeerü tachiki oʼunaa, ayaʼlajüshi taya wanee mma, chejeeinjachika taya anaʼlaain sümüin›. 19 Nümakalaka wane nümüin: ‹Aishaʼajaa, isataajeerü tachiki oʼunaa, ayaʼlajüshireʼe taya poloosü paaʼa otta chainjachi taya sünain anaʼlawaa sümüin›. 20 Jee nümakalaka chi wane nümüinya: ‹Aishaʼajaa, iseerü tachiki oʼunaa, eiwaʼalajachia maʼin taya kasaalüü›. 21 Nüküjakalaka chi achepchieekai nümüin chi nülaamainkai süpüshuaʼa tü namakat naya wayuukana. Naashichijaakalaka chi wayuukai saalinjee tia jee nümakalaka nümüin chi nüchepchiakai: ‹Anashi puʼunule suluʼupünaa wopu eekai jeruluin otta suluʼupünaa eekai moulin. Püntireenaka yaamüin wayuu eekai maʼletsein, na wayuu eekai masaʼain, eekai matünain, eekai moʼupaʼain otta eekai shalüʼütüin›. 22 Anuukalaka nünüiki chi achepchieekai nümüin chi nülaamainkai: ‹Talaamainkalee, taaʼinrüitpa süpüshuaʼa tü puluwataakalü anain taya, eeyütpejeʼe süpüla wounejaain sooʼomüin wayuu›. 23 Nusoutaka chia wayuukai nümüin chi nüchepchiakai: ‹Anashi puʼunule suluʼupünaa tü wopu chakat anooipaʼa sünain tü pueulokot, püma namüin na wayuukana nantaiwa yaamüin, woteetkalaka tü tepiakat namaa. 24 Tamüshii paala jia, müinna meküin na wayuu tounejaakana paala›».
25 Watta naalii na wayuu oʼunakana nümaa Jesús, anuukalaka nünüiki namüin: 26 «Nürütkaale wanee wayuu tanainmüin sümaa shiain alanaʼaleein naalin chi nüshikai nüpüla, tü niikat, tü nuʼwayuusekat, na nüchonniikana, na nuwalayuukana, na nushunuumuyuukana jee sülanaʼaleere naalin nüpülajiraa suulia alin taya nüpüla, nnojoishi keraain nia süpüla tekirajüin. 27 Chi nnojoikai alüʼüjain tü wunuʼu akachennakalü anain wayuu sümaa nnojolin nuushikajaain süchiirua takuwaʼipa, nnojoishi anain nia süpüla tekirajüin. 28 Jamüshijaʼa eetaale wanee wayuu jaʼakajee akumajeekai wanee torre, ¿aashin jülüjain naaʼin palajana jeʼrainjatüin sujuʼitaka aaʼu otta keraajeerüle tü nünneetsekat sümaa tü torre nukumajüinjatkat? 29 Suulia shiain neʼe nüikaleʼerüin tü suuʼuikat, isa meeria nüchiki tü süpüshikat. Shimeeʼerainpala sümeechijaʼa nia wayuu shiʼrapa tü nukumainkat. 30 Meerü sünüiki nüchiki: ‹Akumajüshi torre wayuukai chii nüküjainruʼu, nnojotpejeʼe keraain shia nutuma›. 31 Jamüshijaʼa wanee aluwataashi, nütkaainjachire nümaa wanee aluwataashiya, ¿aashin jülüjain naaʼin palajana eejiraajeenale na 10.000 surulaat nümaajanakana namaa na 20.000 nümaajanakana chi niʼipolokai? 32 Niyaawatüle saaʼu nnojoleenain eejiraain na nusurulaatsekana, nuluwataain waneinnua nünüikimaajana sünain achuntaa anajirawaa nümüin chi aluwataashi peʼipaajiraakai amaa nia, wattaiwaʼaya chia niʼipolokai. 33 Akaataajaʼa neʼe jiakana, jütüjaa saaʼu nnojoleenain anain jia süpüla tekirajüin nnojorüle jaawalüin tü kasa jümaʼanakat.
34 »Anasü maʼin tü ichiikat, akaajasaʼa irale shia, nnojotsü süpüla palaain shia süchikuaʼa. 35 Nnojotsü anain süpüla shijitünüin saaʼu mma jee süpüla süpalittünüin sümaa süchaʼa mürüt, müsüjeseʼe sojotunuin sutuma wayuu. Eekai kacheʼejüin sümüin tü pütchikat naapaainjatü amaa».