Naʼyataain na Aluwataaushikana

8 Anashiisü nümüin Saulo nuʼutunuin aaʼin Esteban.

Soʼujeʼereeya kaʼikat tia, müliashii maʼin atumawaa na anoujashii chajanakana Jerusalén, naʼwalakajeʼennayaa namaka napüshuaʼa sainküinpünaa tü mmakat Judea jee müsia Samaria. Nayaʼala neʼe apütaaka na aluwataaushikana. 2 Nüpataanaka Esteban natuma wanee anoujashii sümaa nojoitüin nia, naʼyalajaka maʼin naalin. 3 Eekajasaʼa Saulo müliashii maʼin na anoujashiikana nutuma. Ekerojoʼowaishi nepialuʼumüin sümaa najaraijain naya anooipaʼamüin. Püreesaka naya nutuma, jaʼitashi chira eekai tooloin otta türa eekai jierüin.

4 Nayasaʼa na anoujashii aʼwalakajeʼennakana paala, aküjashii naya tü pütchi anakat maʼin* süchiki nünüiki Maleiwa eepünaale nantüin. 5 Nuʼunakalaka Felipe Samariamüin, nikirajakalaka chamüin wayuu nüchiki Cristo. 6 Jülüjasü naaʼin napüshuaʼa na wayuukana tü nümakat Felipe, naapajüin nünüiki jee neʼrüin tü kasa pülasü naaʼinrakat. 7 Watta naalii na wayuu kaleʼeruʼukana yolujaa, ojuʼitawaisü tia yolujaaka naleʼeruʼujee sümaa kookotuin maʼin naya sutuma. Jee watta naalii na wayuu masaʼasaliikana namaʼaleeya na shalüʼütakana, aawaleʼennüshii naya. 8 Talataka maʼin naaʼin na wayuu chajanakana suluʼu tia pueulokot.

9 Eejachikalaka suluʼu tia pueulokot wanee wayuu kanüliashi Simón, ouutshipuʼu nia süpülapünaa sülatüin süpüshuaʼa tia. Ponopuʼusü saaʼin wayuu chaa Samaria tü kasa naaʼinrakat jee nüküjawalin wayuuin kojutushi nia. 10 Kacheʼejüsü wayuu maʼleekalia sümüin nünüiki, jaʼitakajeʼe neʼe chira eekai joʼuuin nümaʼaleeya chira eekai miyoʼuin, anuu nanüiki nüchiki: «Eekajasaʼa wayuukai chii, nüpülainmaajachi Maleiwa». 11 Jüüjüüshii na wayuukana nümüin Simón süka kakaliain naya sünain ponuin naaʼin tü kasa pülasü naaʼinrakat. 12 Anoujapejeʼe na wayuukana nüküjapa Felipe namüin tü pütchi anakat maʼin süchiki nuluwataainjachin Maleiwa otta nüchiki jaralin chi kanüliakai Jesucristo, woutiisakalaka wayuu tooloyuu otta müshiʼiya jieyuu. 13 Anoujashi Simónya, woutiisapa nia nnojoishi akatalaayaain nuulia Felipe. Ponusü maʼin naaʼin tü kasa pülasü naaʼinrakat Felipe nuʼupala.

14 Nayasaʼa na aluwataaushi chajanakana Jerusalén naapaiwaʼaya süchiki naapaain sümaa nünüiki Maleiwa na wayuu chajanakana Samaria, najütakalaka Pedro nümaʼaleeya Juan chamüin. 15 Antüshiijeseʼe naya Samariamüin, nachuntakalaka nümüin Maleiwa süpüla naapajatüin tü nüpülainkat namüin na wayuu chejeʼewaliikana chayaa. 16 Woutiisashii neʼe naya paala saaʼu nünülia chi Señotkai Jesús, nnojoishi eein wanee naʼakajee eekai aapünüin amüin tü nüpülainkat Maleiwa. 17 Neʼitaakalaka najapü naaʼu, süntaka nüpülain Maleiwa naaʼu na wayuukana.

18 Niʼraiwaʼaya Simón süntüin tü nüpülainkat Maleiwa naaʼu na wayuukana sünainjee neʼitaain na aluwataaushikana najapü naaʼu, naapeekalaka nneerü namüin. 19 Anuukalaka nünüiki namüin: «Anashii jaapüle pülaa tamüin, teʼitaajeetkalaka tajapü naaʼu na wayuukana, sünteetkalaka nüpülain Maleiwa naaʼu». 20 Nusoutakalaka Pedro nümüin: «Anashi amülouire pia sümaʼaleeya tü pünneetsekat, jama paapeein nneerü saaʼu tü nüsülajalakat Maleiwa. 21 Nnojoishisa eeinjachin pia apashii wamaa sünain aʼyatawaakat tüü, jama nnojoluin anain tü suluʼukat paaʼin noʼuluʼu Maleiwa. 22 Piyaawajaa pümaala suulia türa pümaʼülakat jee puchunta maʼin nümüin Jehová,* kamaʼa nülatireerüle sooʼopünaa naaʼin türa kasa mojusü paaʼinreekalü amüin. 23 Jaʼyasü saaʼu pukuwaʼipa müin pia maʼaka saaʼin wanee weneena outasiroʼu otta shia paaʼinreeka amüin waneepia tü kasa mojuluʼutkat». 24 Anuujeseʼe nünüiki Simón neʼipajee: «Juchunta maʼin nümüin Jehová* tapüleerua süpüla nnojoluinjatüin sülatüin tamüin tü kasa jüküjaitpakalü achiki».

25 Naküjakalaka pütchi sümüin wayuu maʼleekalia süchiki tü nünüikikat Jehová.* Süchikijee tia, naleʼejakalaka nachikuaʼa Jerusalénmüin. Oʼunushii naya sünain aküjaa tü pütchi anakat maʼin sainküinpünaa tü pueulo chakat Samaria.

26 Naashajaaka nümaa Felipe wanee aapiee nümaʼanajeejachi Jehová,* müshi nia nümüin: «Anashi yapajüle pia, puʼuna uuchimüin pukua suluʼupünaa tü wopu sejetkat Jerusalénjee, tü chaʼwatkat Gaza». Tia shia tü wopu alatakat isashiipaʼapünaa. 27 Yapajakalaka Felipe jee nuʼunakalaka, nüntiraaka nümaa wanee wayuu chejeʼewai Etiopía, wayuu kojutushi nia atumawaa. Aʼyataashi nia sümüin Candace tü aluwataasükat naaʼu na wayuu chejeʼewaliikana Etiopía. Chia wayuukai nia kajapuluʼuka süwashirüin tü aluwataasükat, chejeejachi Jerusalénjee sünain aʼwaajaa Maleiwa. 28 Aleʼejüshi nia soʼu tia, sulujuchi nia tü neʼejenakat. Emetutsü nünüiki wanaa sümaa naashajeʼerüin tü karaloʼuta nüshajalakat Isaías, chi nünüikimaajachikai Maleiwa. 29 Anuujeseʼe nünüiki Maleiwa nümüin Felipe sükajee tü nüpülainkat: «Anashi pürütkaale sünainmüin türa eʼejetuukat». 30 Awataashijeseʼe Felipe saʼatoʼupünaa tü eʼejetuukat. Naapakalaka nünüiki chi wayuukai sünain aashajeʼeraa tü nüshajalakat Isaías, chi nünüikimaajachikai Maleiwa. Asakinnüshijeseʼe nia nutuma Felipe: «¿Eesia piyaawatüin saaʼu türa paashajeʼerakat?». 31 Anuujeseʼe nünüiki chi wayuukai niʼipajee: «¿Jamakuwaʼipalüinjatü süpüla tayaawatüin saaʼu nnojoire wanee wayuu ekirajakai taya?». Nuchuntuinjeseʼe maʼin nümüin Felipe süpüla noʼotooinjachin sümaa nüikalaain naʼatoʼu. 32 Eekajasaʼa tü pütchi naashajeʼerakat suluʼujee tü Nüchikimaajatkat Maleiwa shia tü makalü anüiki mayaa: «Oʼuninnüshi nia süpüla oʼutinnaa aaʼin maʼaka saaʼin wanee anneerü eekai süüjaanajatüin jee koʼutushi neʼe nia maʼaka naaʼin wanee anneetchon eekai maʼyalajüin soʼu süüjünüin noi. 33 Nnojotsü lotuin sukuwaʼipa tü kasa aaʼinnakat nümüin wanaa sümaa niʼrüin müliaa. ¿Jaraleechi aküjaka süchiki tü nikiisükat maʼin sümaiwa paala? Jama nuʼutunüichipain aaʼin yaa mmapaʼajee».

34 Anuujeseʼe nünüiki chi wayuukai nümüin Felipe: «Püküjaʼaya maa tamüin jaralin naashajaain achiki chi nünüikimaajachikai Maleiwa. ¿Aashajaajiraashiche neʼe nüchiki?, ¿naatataapa chi naashajaakai achiki?». 35 Yootushijeseʼe Felipe nümaa chia wayuukai, nikirajüin nia sünain tü pütchi naashajeʼerakat paala chi wayuukai suluʼujee tü Karaloʼuta Nüchikimaajatkat Maleiwa. Nüküjakalaka nümüin tü pütchi anakat maʼin nüchiki Jesús. 36 Wanaa sümaa wopuluʼuin naya, nantakalaka sotpaʼamüin wanee wüin. Anuujeseʼe nünüiki chi wayuukai nümüin Felipe: «Anuʼusa wüin, anainjaʼa woutiisale taya, ¿kasakaʼa ataʼülüin takuwaʼipa?». 37 * 38 Nüshaʼwaleʼeriraka tü neʼejenakat, ashakatshijeseʼe Felipe nümaa chi wayuukai sümaa nekeroluin shirokumüin tü wüinkat, woutiisaka chi wayuukai nutuma Felipe. 39 Nojuʼitapa shirokujee tü wüinkat, nuʼuninnakalaka Felipe nutuma Jehová* sükajee tü nüpülainkat suluʼumüin wanee mma naata. Nnojoikalaka nia niʼrüin chi wayuukai nüchikuaʼa. Niasaʼa chi wayuukai, oʼunushi chaa eeʼewaire nia sümaa talatüin maʼin naaʼin. 40 Eekajasaʼa Felipe antüshi chaa suluʼumüin tü pueulokot Asdod. Aküjashi nia tü pütchi anakat maʼin sainküinpünaa tü pueulokot nüntaleepa Cesareamüin.