Palajatka karaloʼuta Samuel
9 Eejachi wanee wayuu nülüin Benjamín, Quis nünülia. Quis nülüin Abiel, Abiel nüchon Zeror, Zeror nüchon Becorat, Becorat nülüin Afías. Wayuu washirü maʼin Quis. 2 Eejachi wanee jimaʼai anashi aaʼinchi, Saúl nünülia otta nüchon nia Quis. Nnojoishi eejachin wanee israelita eekai anashi aaʼinchin maʼaka naaʼin Saúl, miyoʼusenuu nia jee nütünakiipünaashii neʼe na wayuukana.
3 Soʼu wanee kaʼi amulouikalaka tü nüpüliiküsekat Quis, chi nüshikai Saúl. «Anashi pümaale wanee achepchiee mekeerai jia süchiirua tü püliikükat», nümakalaka Quis nümüin Saúl. 4 Oʼunushiijeseʼe naya sünain mekeeraa sooʼopünaa tü uuchi eere kepiain na nüikeyuukana Efraín jee oʼunushii naya suluʼupünaa tü mmakat Salisá. Nnojotpejeʼe kasain nantüin anain, nalatapünaaka süpaʼapünaa tü mmakat Saalim, nnojotsü kasain nantüin anain. Noʼunakalaka mapa suluʼumüin tü noumainkat na nüikeyuukana Benjamín, kasayaai neʼe eein napüla.
5 Anuujeseʼe nünüiki Saúl nümüin chi nüchepchiakai nantapa suluʼumüin tü mmakat Zuf: «Anashii waleʼejüle wachikuaʼa suulia shapaain naaʼin chi tashikai waaʼu, nnojot meeria kachipünaain naaʼin tü püliikükat». 6 Anuukalaka nünüiki chi nüchepchiakai nümüin: «Eeshi wanee wayuu nünüikimaajachi Maleiwa suluʼu türa pueulokot. Kojutushi maʼin nia atumawaa, ekeraajüsü süpüshuaʼa tü nümakat. Anashi weʼrajaale nia, eesüjaʼa nüküjeerüle wamüin jalapünaainjanain woʼunuin». 7 Anuukalaka nünüiki Saúl nümüin chi nüchepchiakai: «¿Kasa wakolojeetka nümüin chia wayuukai woʼunule nümaʼanamüin? Ajaʼttüsü tü pan sulujutkat tü waaʼawaliakat.* Nnojotsü eein wanee kasa wakolojuinjatka nümüin chi nünüikimaajachikai Maleiwa. Kasataayaai eein süpüla walüʼüjain nümüin». 8 Nuchuntakalaka maʼin chi achepchieekai nümüin Saúl sünain maa: «Anuu tamaʼana wanee saʼata pülaata,* shieerü taapaka nümüin chi nünüikimaajachikai Maleiwa jee nüküjeetkalaka wamüin jalapünaainjanain woʼunuin». 9 Anuu tü nümapuʼukat wanee wayuu nüsakirüinjachire Maleiwa süchiirua wanee kasa: «Anashi wanaʼlaale nümüin chi wayuu eʼrakai wanee kasa nutuma Maleiwa». «Na wayuu eʼrakana kasa pülasü nutuma Maleiwa», münapuʼushii na nünüikimaajanakana Maleiwa. 10 Anuukalaka nünüiki Saúl nümüin chi nüchepchiakai: «Anakai saaʼin tü pümakat, jooʼuya eemüin chia wayuukai». Noʼunakalaka suluʼumüin tü pueulokot eejachire chi nünüikimaajachikai Maleiwa.
11 Soʼu noʼunuin saaʼumüin tü uuchi eejatüle tü pueulokot, wanaajiraakalaka naya namaa waneinnua jieyuu ajaʼitajanakana wüin jee namakalaka namüin: «¿Aniʼiya chi wayuu eʼrakai kasa pülasü nutuma Maleiwa?». 12 Anuujeseʼe nanüiki na jieyuukana namüin: «Aa, aniʼiyan. Isaa samüintata, anashii juuntaale, jünteechikalaka naaʼu. Chaʼwaisa nia namaa na wayuukana sünain oʼutaa saaʼin mürüt nümüin Maleiwa jee naʼajüinjatü shia saaʼu wanee yaletshii eere nuʼwaajünüin Maleiwa. 13 Jüntiraajeechi amaa nia jikerotopa suluʼumüin tü pueulokot, anashii juuntaale süpülapünaa nuʼunuin sünain ekaa saaʼumüin tü yaletshii eere nuʼwaajünüin Maleiwa, ekaleejeeria wayuu nüntapa jee nuʼuraajapa süpülapünaa shikünüin tü mürüt oʼutunakalü aaʼin. Juuntawaata, anashii juʼunamaatüle jüsaʼwajeechikalaka nia». 14 Oʼunushiijaʼaya naya suluʼumüin tia pueulokot jee pasanainpa naya sünain napanapajaka Samuel, chaʼwai nia saaʼu tü yaletüshi eere nuʼwaajünüin Maleiwa.
15 Anuu tü nüküjakat paala Jehová nümüin Samuel wanee kaʼi süpülapünaa nüntüin Saúl: 16 «Taluwataajeechi pümüin wanee wayuu wattaʼa maʼaka maaʼulu yaa, chejeʼewai nia suluʼujee tü noumainkat na nüikeyuukana Benjamín. Piʼyotuinjatü seita jemeta eejuut saaʼu nikii süpüla niainjachin nekiipüʼüin na israelitakana. Nieechi akaalinjaka naya noulia na filisteokana. Teʼrüin namüliala na wayuu aʼwaajakana taya jee taapüin neʼira sünainjee tü kasa alatakat namüin». 17 Anuujeseʼe nünüiki Jehová nümüin Samuel niʼnnapa Saúl nutuma Samuel: «Aniisa chi wayuu, ‹nieechi aluwataaka naaʼu na wayuu aʼwaajakana taya›, tamakai paala pümüin».
18 Nürütkaakalaka Saúl nünainmüin Samuel chaa soʼuluʼu tü pueulokot jee nümaka nümüin: «Püküja maa wamüin jalain kepiain chi wayuu eʼrakai wanee kasa nutuma Maleiwa». 19 Anuujeseʼe nünüiki Samuel nümüin Saúl: «Taya chi wayuu eʼrakai wanee kasa nutuma Maleiwa. Puʼuna tapüleerua saaʼumüin tü yaletüshii eere nuʼwaajünüin Maleiwa. Eküinjana jia tamaa soʼukai, juʼuneenakalaka wattaʼa wattaʼa maalü, taküjeerü pümüin süpüshuaʼa tü pütüjaweekalü aaʼu. 20 Nnojo shapaain paaʼin saaʼu tü püliikü apünüinrükat kaʼi amüloulin, antünüitpa anain. ¿Aashin jiain kakoroloin süpüshuaʼa tü kasa yaakalü Israel? ¿Aashin piain kakoroloin shia jee nakoroloin shia na nüpüshikana chi püshikai?». 21 Anuukalaka nünüiki Saúl nümüin Samuel: «Nülüin taya Benjamín, paliʼirü na nüpüshikana naʼakajee na israelitakana, nnojotsü kaawain maʼin tapüshi naʼakajee na nüikeyuukana Benjamín, maaʼawashi eera pia taatchee».
22 Nuʼunakalaka Samuel nümaa Saúl jee müshia chi nüchepchiakai eere nekaainjanain, nüküjakalaka namüin naikalaainjanain eere naikalaain na wayuu kojutukana atumawaa. Eejana maʼaka apünüin nekii wayuu sünain tia ekawaakat. 23 Anuukalaka nünüiki Samuel nümüin chi aʼlakajaaikai: «Püsaaja pümaala tü asalaa takatalirakai pia». 24 Shiʼikajaanakalaka nümüin Saúl wanee süpüʼü tü mürüt oʼutunakalü aaʼin, eʼikajaanüsü tia nümüin nutuma chi aʼlakajaaikai. Anuujeseʼe nünüiki Samuel nümüin Saúl: «Anuu puusinapa atumawaa, ‹keʼiyoujeechi taya›, müshi taya». Nikaakalaka Samuel nümaa Saúl soʼu kaʼikat tia. 25 Naleʼejakalaka nachikuaʼa pueulopaʼamüin jee ayatakalaka yootuin Samuel nümaa Saúl saaʼu wanee miichi. 26 Natamaakalaka wattaʼa maalü wanaa sümaa suwasajaain aikat, neenajünakalaka Saúl nutuma Samuel, jama chajachin Saúl saaʼu tü miichikat, anuujeseʼe nünüiki Samuel nümüin: «Yapaja pia puʼunaiwa». Yapajakalaka Saúl jee nujuʼitaakalaka anuuipaʼamüin nümaa Samuel. 27 Anuujeseʼe nünüiki Samuel nümüin Saúl anuuipaʼapa naya sünain tü pueulokot: «Püjüta chi püchepchiakai palajana», nuʼunakalaka chi achepchieekai. «Yaashia pia makatüin tamaa, taküjainjatü pümüin wanee pütchi nümaʼanajeejatü Maleiwa», nümakalaka Samuel nümüin Saúl.