Palajatka karaloʼuta Samuel
10 Niʼyotokoloko Samuel saaʼu nikii Saúl wanee seita jemeta eejuut. Nutuʼlaka Samuel nuwalapaʼa Saúl jee nümakalaka: «Nüneeküin pia Jehová süpüla piainjachin aluwataain naaʼu na nüpüshikana. 2 Pülatapeena soʼukai süʼütpünaa tü amuuyuu eere shiʼitaanüin Raquel, tü suluʼukat noumain na nüikeyuukana Benjamín, tü chakat Zelzá, antiraajeena pümaa piamashii wayuu, nameenaka pümüin: ‹Antünüitpa anain tü püliikü mekeetkalü achiirua pia, shapaapejeʼe naaʼin chi püshikai jaaʼu. «Jamajachi neʼe tachon, machikisai», müshi chi püshikai›, nameenakalaka pümüin. 3 Püntapa eere tü wunuʼu miyoʼu chakat Tabor, antiraajeena pümaa apünüinshii wayuu chainjanakana suluʼumüin tü mmakat Betel sünain aʼwaajaa chi shiimainshikai suluʼu Maleiwain. Eejeechi wanee ajannajakai apünüinsü kaaʼulacheein, wanee alüʼüjeechi apünüinsü pan otta chi wane alüʼüjeechi wanee jaara miyoʼu kaluʼuka wiino. 4 ‹Jaman waʼle›, meena naya pümüin jee nasülajeetka pümüin piamasü pan, paapaajeetka shia. 5 Püntapeena saaʼumüin tü namüna eere nuʼwaajünüin Maleiwa, piʼreena waneinnua surulaat filisteo. Shiasaʼa püntapa pueulopaʼamüin, piʼreena wanee nünüikimaajana Maleiwa sejenakana saaʼujee tü yaletüshii eere nuʼwaajünüin Maleiwa. Yooteena naya süchiki tü kasa alatüinjatkat naashin Maleiwa,* eejeena waneinnua wayuu napüleerua atalejeenakana tü kanüliakat pandereta, arpa jee tü kanüliakat instrumento de cuerda otta eejeenaʼaya na aʼyalajireenakana flauta. 6 Anteerü paaʼu tü nüpülainkat Jehová, puʼuneechika namaa na nünüikimaajanakana Maleiwa jee yooteechikalaka pia süchiki tü kasa alatüinjatkat naashin Maleiwa. Eeʼirateerü pukuwaʼipa. 7 Piʼrapeena shikeraajüin tü tamakat pümüin, anashi paaʼinrüle süpüshuaʼa tü kasa eekai süpüla paaʼinrüin shiiʼiree pikeraajüinjatüin tü piʼyataainkat nümüin Maleiwa, jama eein pümaa chi shiimainshikai suluʼu Maleiwain. 8 Süchikijee tia, puʼuneechikalaka suluʼumüin tü mmakat Guilgal, tantiraajeechika pümaa chamüin süpüla toʼutuinjatüin saaʼin mürüt, taʼajüinjatüin shia nümüin Maleiwa jee asülajeechia taya nümüin wanee kasa anajiraainjanaka aaʼujee waya nümaa. Anteechi taya chamüin soʼu akaratshi kaʼi, taküjeetkalaka pümüin tü paaʼinrajatkat».
9 Shiasaʼa nuʼunapa Saúl, shiiʼiratakalaka naaʼin nutuma Maleiwa süpüla müinjachin nia maʼaka naaʼin wanee wayuu naatakai akuwaʼipa. Shikeraajakalaka soʼu kaʼikat tia süpüshuaʼa tü nümakat Samuel. 10 Nüntapa Saúl nümaa chi nüchepchiakai saaʼumüin tü namünakat, nantiraakalaka namaa waneinnua nünüikimaajana Maleiwa. Antüsüjeseʼe naaʼu Saúl tü nüpülainkat Maleiwa, nuʼunakalaka namaa na nünüikimaajanakana Maleiwa otta yootushi nia wanaa namaa süchiki tü kasa alatüinjatkat naashin Maleiwa. 11 Anuukalaka nanüiki na wayuu eʼraajakana Saúl neʼrapa nia naʼaka na nünüikimaajanakana Maleiwa jee naapapa süchiki tü kasa alatüinjatkat naashin Maleiwa: «¿Kasache alataka nümüin chi nüchonkai Quis? ¿Nünüikimaajachi joo Saúl Maleiwaya?». 12 «¿Jaraliikaʼa joo kachooin na wane nünüikimaajanakana Maleiwa?», nümakalaka wanee wayuu. «¿Nünüikimaajachi joo Saúl Maleiwaya?», müsüjeseʼe sümawalin wayuu suluʼujee tia.
13 Nuʼunakalaka Saúl saaʼumüin tü yaletüshii eere nuʼwaajünüin Maleiwa kettaapa nüküjain süchiki tü kasa alatüinjatkat naashin Maleiwa. 14 «¿Jalajanakai jia?», nümakalaka chi nüʼlaülakai Saúl nümüin Saúl otta nümüin chi nüchepchiakai. Nusoutakalaka Saúl nümüin: «Chajana waya mekeerüin süchiirua tü püliikükat, chakuwaliika waya nümaʼanamüin Samuel süka nnojoluin wantüin sünain». 15 «¿Jamakaʼa nünüiki Samuel jümüin? Jüküja jümaala tamüin», nümakalaka chi nüʼlaülakai Saúl namüin. 16 Anuujeseʼe nünüiki Saúl nümüin chi nüʼlaülakai: «‹Jaʼyaitpa tü püliikükat›, müshi nia wamüin». Nnojotpejeʼe nüküjain Saúl nümüin tü nümakat Samuel süchiki nuluwataainjachin.
17 Nuutkajeʼeraka Samuel na israelitakana nümaʼanamüin Jehová chaa Mizpá. 18 Anuujeseʼe nünüiki Samuel namüin na israelitakana: «Anuu tü nümakat Jehová, chi Jümaleiwasekai: ‹Tasaajirüin jia suluʼujee tü mmakat Egipto, taya chi akaalinjakai jia noulia na wayuu chejeʼewaliikana Egipto otta noulia na aluwataashii müliakana atuma jia. 19 Jiyoutapejeʼe taluwataainjachin jaaʼu, taya chi oʼtteʼerakai jia, taya chi amüliajakai jaaʼin soʼunnaa jiʼrüin müliaa. «Jaʼitasü, choʼujaashiaʼaya wamüin wanee wayuu aluwataainjachikai waaʼu», mataashii jümüshinkakai. Juutkajaa waneʼewai jukua nümaʼanamüin Jehová, anashii juutkajaale namaa jüpüshi otta namaa na wayuu wanaawakana eʼiruku jümaa›».
20 Nuchuntakalaka Samuel namüin na israelitakana narütkaainjanain nünainmüin namaa na napüshikana. Nayakalaka aneekünüin na nüikeyuukana Benjamín. 21 Nuchuntakalaka Samuel namüin na nüikeyuukana Benjamín narütkaainjanain nünainmüin, narütkaakalaka waneʼewai nakua sümaa napüshi. Nayakalaka aneekünüin na nüpüshikana Matrí, niakalaka aneekünüin Saúl naʼakajee naya wayuukana. Mayaainjeʼe nüchajaanüin achiki, nnojoishi antünüin anain. 22 Nasakirakalaka Jehová nüchiirua sünain maa: «¿Jalashi chi wayuukai?». Anuukalaka nünüiki Jehová namüin: «Isaʼasa nia ounjulaain saʼaka tü chisoouikat». 23 Suwataaka wayuu sünain asaajaa Saúl, nayuʼlaka nia saʼakajee tü chisoouikat. Nüshaʼwalaaka Saúl pasanain nanain na wayuukana, miyoʼusenuu maʼin nia, nütünakiipünaasü neʼe wayuu. 24 Anuujeseʼe nünüiki Samuel namüin na israelitakana: «Aniisa chi wayuu nüneekakai Jehová. Nnojoishi eein wanee wayuu makai aka naaʼin». «Kasataalejeseʼe anain nukuwaʼipa chi aluwataainjachikai», namakalaka na wayuukana sümaa emetuluin nanüiki.
25 Nüküjakalaka Samuel tü naaʼinrajatkat na israelitakana nüpüleerua chi aluwataainjachikai naaʼu, nüshajüin shia suluʼu wanee karaloʼuta, niʼitaakalaka tia karaloʼutakat suluʼu tü miichi aainjuushikat süka loona eere nuʼwaajünüin Jehová. Nüjütakalaka Samuel napüshuaʼa na israelitakana nepialuʼumüin. 26 Nuʼunakalaka Saúl nipialuʼumüin, suluʼumüin tü mmakat Guibeá. Niʼitaakalaka Jehová suluʼu naaʼin waneinnua wayuu yalayalaka aaʼin süpüla noʼunuinjanain nümaa Saúl. 27 «Nnaa pounuwashitaain chi wayuu aneekünakai süpüla nükaalinjain waya», namakalaka waneinnua wayuu nnojoliikana kasain anain apüla. Mojutusai nia namüin, müshiijeseʼe makoloin naya nümüin. Koʼutapejeʼe Saúl noulia.