Levítico

1 Neenajaka Jehová Moisés, yootoka nia nümaa eere tü miichi aʼwaajüleekat sümaa nümüin nümüin: 2 «Anuu tü pünüikinjatkat namüin na israelitakana: ‹Eere wanee wayuu jaʼakajee aapüinjachikai wanee mürüt süpüla suʼutunuin saaʼin jee saʼajünüin tamüin tayakai Jehová, naapüinjatü wanee paaʼa jee shiale wanee anneerü jee kaaʼula shiale.

3 »›Eerejeʼe wanee wayuu asülajüinjachikai wanee paaʼa toolo süpüla nuʼutunuin aaʼin jee naʼajünajachin, nnojolinjachi ayuulin jee kamojulain nia. Nüsülajüinjatü shia süka naaʼin nümüiwaʼa tamülatuʼu tayakai Jehová soʼuluʼu tü miichi aʼwaajüleekat. 4 Niʼitaainjatü najapü saaʼu nikii chi paaʼa toolo oʼutunajachikai aaʼin süpüla naʼajünüin, sükajee tia alatinneerü naainjala nuulia.

5 »›Nuʼutuneechikalaka aaʼin chi paaʼachonkai tamülatuʼu tayakai Jehová. Nayasaʼa na nüchonniikana Aarón, na sacerdotekana, nantireerü tü süshakat tamaʼanamüin tayakai Maleiwa otta natülüitireerü shia sutoutajee tü aʼajüleekat mürüt, tü yalakat soʼuluʼu tü miichi aʼwaajüleekat. 6 Tü mürüt aapünüinjatkat, tü oʼutunajatkalü aaʼin süpüla saʼajünüin, ashojünüinjatü shia jee aʼyülüjaanajatü shia. 7 Nayasaʼa na nüchonniikana Aarón, na sacerdotekana, neʼitaainjatü siki chuwatüsü suluʼu tü aʼajüleekat mürüt otta neʼitaainjatü sooʼomüin tü sikikat süpüla chuwatüin shia. 8 Neʼitaajeerü tü asalaa aʼyülüjaaushikat sümaa tü shikiikat otta müsia tü saüsükat saaʼu tü siki chuwatüsü suluʼukat tü aʼajüleekat. 9 Tü shiyüülainkat sümaa tü suuʼuikat oʼlojoonajatü shia süka wüin, naʼajeetkalaka chi sacerdotekai süpüshuaʼa tia saaʼu tü siki suluʼukat tü aʼajüleekat, kaitteetkalaka sümüsain nutuma. Shia wanee kasa aʼajünaka tamüin tayakai Jehová, tü aʼajünakat soʼu siki süpüla jemetüinjatüin maʼin seejuu tamüin.

10 »›Eere wanee wayuu aapüinjachikai wanee anneetchon jee niale wanee kaaʼula süpüla nuʼutunuin aaʼin jee naʼajünüin, niainjachi wanee anneetchon jee niale wanee kaaʼula nnojoikai ayuulin jee kamojulain. 11 Oʼutunajatü aaʼin tamülatuʼu tayakai Jehová palaajeeruʼu sünain tü aʼajüleekat. Nayasaʼa na nüchonniikana Aarón, na sacerdotekana, natülüitireerü tü süshakat sutoutajee tü aʼajüleekat. 12 Aʼyülüjaaneerü tü shiʼirukukat jee niʼitaajeerü shia chi sacerdotekai sümaa tü shikiikat otta müsia tü saüsükat saaʼu tü siki chuwatüsü suluʼukat tü aʼajüleekat. 13 Oʼlojoonajatü tü shiyüülainkat jee tü süsaʼakat süka wüin. Niasaʼa chi sacerdotekai naapeerü shia süpüshuaʼa tamüin tayakai Maleiwa otta naʼajeerü shia saaʼu tü aʼajüleekat süpüla kaittüinjatüin tü sümüsainkat nutuma. Shia wanee kasa aʼajünaka tamüin tayakai Jehová, tü aʼajünakat soʼu siki süpüla jemetüinjatüin maʼin seejuu tamüin.

14 »›Eere wanee wayuu asülajüinjachikai wüchii süpüla suʼutunuinjatüin aaʼin jee saʼajünüinjatüin tamüin tayakai Jehová shia naapüinjatka wawaachi jee toomasüchein shiale. 15 Naapeetkalaka shia chi sacerdotekai tamüin tayakai Maleiwa saaʼu tü aʼajüleekat mürüt, nüsüʼütüinjatü tü shikiikat, naʼajeetkalaka shia saaʼu tü aʼajüleekat süpüla kaittüinjatüin tü sümüsainkat, palateetkalaka tü süshakat nutuma wanee saʼata tü aʼajüleekat. 16 Numoijeetkalaka shia sümaa niyuʼluin tü shiküinpalakat, nujuteetkalaka shia saʼatoʼu tü aʼajüleekat, yala wüinpüjeeruʼu sünain eere shijitünüin tü paliʼikat. 17 Nuwaʼleerü shia eepünaa tü sütünakat sümaa nnojoluin piamainjatüin süʼülia nutuma, naʼajeetkalaka shia chi sacerdotekai saaʼu tü aʼajüleekat eere tü siki chuwatakat süpüla kaittüinjatüin tü sümüsainkat. Shia wanee kasa aʼajünaka tamüin tayakai Jehová, aʼajünüsü shia soʼu siki süpüla jemetüinjatüin maʼin seejuu tamüin.