Levítico

12 Anuukalaka nünüiki Jehová nümüin Moisés: 2 «Püma namüin na israelitakana: ‹Ipuorüle wanee wayuu toolochonle chi süchon jemeyutka amaa shia, yarütteerü shia soʼu akaratshi kaʼi maʼaka yarüttüin shia soʼu tü kaʼi süntakalü oʼu sükashia. 3 Achotooneerü süta nükorolo chi joʼuukai mekiisatpa kaʼi süchikijee joʼuuin nia. 4 Ayateeriaʼaya eisalajaain shia soʼu apünüin shikii apünüinmüin kaʼi süpüla wuleinjatüin shia suulia tü isha amülakat sümüin. Nnojotsü shipettajatüin wanee kasa eekai aneekünüin süpüla aʼyatawaa tamüin tayakai Maleiwa jee nnojotsü ekerotuinjatüin shia suluʼu tü miichi aʼwaajüleekat waneʼereeya keraapa tü sükaliakat süpüla wuleinjatüin shia.

5 »›Jietchonle tü jemeyutkalü amaa shia, yarütteerü shia soʼu poloo pienchimüin kaʼi maʼaka yarüttüin shia soʼu tü kaʼi süntakalü oʼu sükashia. Ayateeriaʼaya eisalajaain shia soʼu aipirua shikii aipiruamüin kaʼi süpüla wuleinjatüin shia suulia tü isha amülakat sümüin. 6 Kettaapa sükalia süpüla wuleinjatüin shia saaʼujee süchooin wanee toolochon jee shiale wanee jietchon, shiʼikajaainjatü nümüin chi sacerdotekai soʼuluʼumüin tü miichi aʼwaajüleekat wanee anneetchon süpüla nuʼutunuin aaʼin jee naʼajünüin tamüin tayakai Maleiwa sümaʼaleeya wanee toomasüchon jee shiale wanee wawaachi süpüla saapajatüin shia saaʼu saainjala. 7 Niʼikajaajeetkalaka chi sacerdotekai süpüshuaʼa tia tamülatuʼu tayakai Jehová, sülatinneetkalaka saainjala suulia, wuleetkalaka shia suulia tü isha amülakat sümüin. Shia aluwataanaka anain tia wanee wayuu jemeyurüle shia nümaa wanee toolochon jee shiale wanee jietchon. 8 Nnojorüle sümaʼana süpüla saapajachin wanee anneetchon, eʼikajaajeerü shia piamasü wawaachi jee shiale piamasü toomasüchein, oʼutuneerü aaʼin wanee süpüla saʼajünüin tamüin tayakai Maleiwa otta tü wane aapüneerü shia saaʼu saainjala tü wayuukot, nuʼuteetka saaʼin chi sacerdotekai tü mürüt süsülajakat süpüla sülatinnüinjatüin saainjala, wuleetkalaka shia›».