Palajatka karaloʼuta Samuel
23 Naapinnakalaka David sünain maa: «Ashutuna aaʼuna natuma na filisteokana na wayuu chakana suluʼu tü pueulokot Queilá jee naʼluwajüin na filisteokana süchon tü aʼttiee suluʼukat tü awaajüleekat». 2 Anuukalaka nünüiki David nümüin Jehová: «¿Anashiche toʼunule sünain atkawaa namaa na filisteokana?». Anuujeseʼe nünüiki Jehová nümüin: «Anashi puʼunule sünain atkawaa namaa na filisteokana jee pükaalinja na wayuu chakana suluʼu tü pueulokot Queilá». 3 «Mmotshii waya eerejeʼe yaain waya suluʼu tü mmakat Judá, shieematataaka nnojoluin mmoluin aluʼu waya woʼunule suluʼumüin tü pueulokot Queilá sünain atkawaa namaa na surulaat filisteokana», namakalaka na nusurulaatsekana David nümüin. 4 Asakinnüshijeseʼe Jehová nüchikuaʼa nutuma David, anuukalaka nünüiki Jehová nümüin: «Anashi puʼunamaatüle suluʼumüin tü pueulokot Queilá, jama taapeerüin nekii na filisteokana pümüin». 5 Nuʼunakalaka David namaa na nusurulaatsekana suluʼumüin tü pueulokot Queilá, atkaashi nia namaa na filisteokana. Watta naalii na nuʼutakana aaʼin jee nülüʼüjain tü namünüinkat. Naaʼinrüin David tia süpüla nükaalinjainjanain na wayuu sulujunakana tü pueulokot Queilá.
6 Eejatkalaka nünain Abiatar tü kuluulu kanüliakat efod soʼu nuʼunuin nümaa David suluʼumüin tü pueulokot Queilá. 7 Naapinnakalaka Saúl sutuma wayuu sünain maa: «Ichaasa David suluʼu tü pueulokot Queilá». Anuujeseʼe nünüiki Saúl: «Naapa ekiichi nia Maleiwa tamüin, jama nüntüin suluʼumüin wanee pueulo kapuettoʼusekat jee katürankajiakat, nnojoleechi nia isajüin toulia nuʼluwataweere». 8 Nuutkajeʼerüinjeseʼe Saúl na nusurulaatsekana süpüla atkawaa, oʼunajana naya suluʼumüin tü pueulokot Queilá süpüla noutkaajüinjachin David namaa na nusurulaatsekana. 9 «Icheʼera yaamüin tü kuluulu kanüliakat efod», nümakalaka David nümüin Abiatar nütüjaapa saaʼu tü naaʼinreekat Saúl nümüin. 10 Anuukalaka nünüiki David nümüin Maleiwa: «Jehovákalee, Namaleiwasekai na israelitakana, taapa achikit nünteein Saúl sünain ajaʼttiraa na wayuu kepiakana suluʼu pueulokot tüü saaʼujee yaain taya. 11 ¿Aapüneechi ekii taya nümüin Saúl natuma na laülaashii yaakana suluʼu tü pueulokot Queilá? ¿Shiimain nünteechin Saúl yaamüin maʼaka süküjünüin tamüin? Püküja maa shia tamüin Jehovákalee, chi Namaleiwasekai na israelitakana». «Anteechiaʼayan», nümakalaka Jehová nümüin David. 12 Anuujeseʼe nünüiki David nümüin Maleiwa: «¿Aapüneechi ekii taya nümüin Saúl namaʼaleeya na tasurulaatsekana natuma na laülaakana saaʼu pueulokot tüü?». «Naapeena ekii jia nümüin Saúl», nümakalaka Jehová nümüin David.
13 Nuʼunakalaka David namaa na nusurulaatsekana suluʼujee tü pueulokot Queilá, eejana maʼaka 600 surulaat nümaa. Nnojoishii naya jimatüin suluʼu wanee mma. Nnojoikalaka nuushikajaain Saúl nüchiirua David, nütüjaapa saaʼu nuʼunuin David suluʼujee tü pueulokot Queilá. 14 Nuʼunakalaka David sünain ounjulawaa eere kapüleein sümüin wayuu ekeroloo, chaa isashiipaʼa. Chajachi nia ounjulaain saaʼu tü uuchi eere tü isashii chakat Zif. Achajaana achikichi maʼin nia nutuma Saúl. Nnojotpejeʼe aapünüin nikii David nümüin Saúl nutuma Jehová. 15 Nütüjaa aaʼulu David nüchajaanüin achiki nutuma Saúl süpüla nuʼutuinjatüin naaʼin. Jülüjasü naaʼin David tia soʼu chajachin nia eere tü isashii chakat Zif, tü chajatkat Hores.
16 Nuʼunakalaka Jonatán, chi nüchonkai Saúl, suluʼumüin tü mmakat Hores sünain anaʼlawaa nümüin David. Akaalinjünüshi David nutuma süpüla kanoulaleeinjachin nia nünain Jehová. 17 Anuujeseʼe nünüiki Jonatán nümüin David: «Nnojo mmoluin pia, nnojoleechi nüntüin anain pia chi tashikai. Pieechi aluwataaka naaʼu na israelitakana jee takaalinjeechi pia. Nütüjaa aaʼulu chi tashikai müinjatüinña sukuwaʼipa tia». 18 Nüpansaajakalaka nünüiki Jonatán nümaa David nuʼupala Jehová. Oʼunushi Jonatán nipialuʼumüin, makataka David suluʼu tü mmakat Hores.
19 Noʼunakalaka na wayuu chajanakana Zif suluʼumüin tü mma chakat Guibeá eejachire Saúl. Anuukalaka nanüiki nümüin: «Ichaa ounjulaain David suluʼu tü mma eejeʼewaliire waya, ichaa suluʼu tü mmakat Hores eere kapüleein sümüin wayuu ekeroloo. Ounjulaashi nia saaʼu tü namüna chakat Hakilá, tü uuchijeeruʼukat sünain tü mmakat Jesimón. 20 Laülaashikalee, puʼuneepa woumainpaʼamüin, eeshijaʼa süpüla puʼunuin. Waapeechi ekii David pümüin», namakalaka nümüin Saúl. 21 Anuujeseʼe nünüiki Saúl namüin naya wayuukana: «Kasataalejeseʼe anain jukuwaʼipa nutuma Jehová, jama jümülialaain taalin. 22 Anashii juʼunule, jüsakireetkalaka süchiirua jaralin eʼrüin nia jee jalajachin nia niʼrüin sünain ounjulawaa. Atüjashisa maʼin nia ounjulawaa saashin wayuu. 23 Jüsakira süchiirua jalain nuunjulaʼawalin David jee jüküjeetkalaka shia tamüin. Oʼuneechinjaʼa taya jümaa pansaale tamüin tia, tachajaajeetkalaka maʼin nüchiki naʼakapünaa na wattakana naalii nüikeyuu Judá».
24 Noʼunakalaka palajana naya wayuukana suluʼumüin tü mmakat Zif, eekajasaʼa David namaa na nusurulaatsekana chajana naya eere tü isashii chakat Maón, chaa suluʼu tü mmakat Arabá uuchimüin sünain Jesimón. 25 Nuʼunakalaka Saúl namaa na nusurulaatsekana suluʼumüin tü mmakat Zif sünain achajawaa nüchiki David. Nütüjaapa saaʼu tia David, nuʼunakalaka sünain ounjulawaa suluʼu wanee ipa miyoʼu. Chajatü tia ipakat eere tü isashii chajatkat Maón. Nütüjaapa saaʼu tia Saúl, nuushikajaakalaka nüchiirua David eere tü isashii chajatkat Maón. 26 Wanaa sümaa nüntüin Saúl namaa na nusurulaatsekana saaʼumüin tü uuchi chakat Maón, chajachi David namaa na nusurulaatsekana wane saʼata tia uuchikat. Nuʼunakalaka David nüpülapünaa Saúl suulia nütaʼülüin nia. Nülüʼülaakalaka Saúl namaa na nusurulaatsekana nüchiirua David süpüla nataʼülajachin nia. 27 Nüntakalaka wanee wayuu pütchimaajachi jee nümakalaka nümüin Saúl: «Anashi püleʼejamaatüle, ashutushii na filisteokana saaʼu woumain». 28 Nnojoikalaka ayatüin nuushikajaain Saúl nüchiirua David jee nuʼunakalaka sünain atkawaa namaa na filisteokana. «Tü ipa miyoʼu katatakalü atuma wayuu», müsüjeseʼe sümünüin tia mmakat.
29 Nuʼunakalaka David yalejee jee nuunjulaakalaka eere kapüleein sümüin wayuu ekeroloo, chaa suluʼu tü mmakat En-Guedí.