Palajatka karaloʼuta Samuel
18 Aleewakalaka Jonatán nümaa David kettaapa David süchiki yootoo nümaa Saúl. Aishi maʼin David nüpüla Jonatán maʼaka aijiraain Jonatán nüpülajiraa. 2 Naʼalijinnakalaka David nutuma Saúl süpüla niʼyataainjachin nümüin, nnojoikalaka nia nüjütüin nipialuʼumüin chi nüshikai. 3 Aikalaka maʼin David nüpüla Jonatán maʼaka aijiraain Jonatán nüpülajiraa, napansaajakalaka nanüiki süchiki aleewainjanain naya. 4 Naakatakalaka Jonatán tü saajunakat nüsheʼin,* naapaka shia nümüin David. Naapüinña Jonatán nümüin David tü nüsheʼin nütkaayakat, tü chajaruutakat, tü najatüinkat jee müsia tü nukoreainkat. 5 Nuʼunakalaka David sünain atkawaa, jaʼitashi jalapünaain nia nüjütüin Saúl, ayatüshia nia akanajüin waneepia, aneekünüshijeseʼe nia nutuma Saúl süpüla naʼlaülajanain nia waneinnua surulaat, anashiisü tia namüin na aʼyataashiikana nümüin Saúl jee müsia namüin na israelitakana.
6 Nüleʼejawaipa David namaa na surulaatkana süchikijee nakanajüin na filisteokana, ojuʼitayaa maʼwaishii na jieyuukana suluʼujee tü pueulo chajatkat suluʼu tü mmakat Israel nüpanapa Saúl, talatüshii maʼin naya, eeʼirajüshii naya sümaa nayonnojüin, natalejüin tü kanüliakat pandereta sümaʼaleeya tü kanüliakat laúd.* 7 Anuujeseʼe tü namakat neeʼirainruʼu naya jieyuukana:
«Miit na wayuu nuʼutakana aaʼin Saúl,
eekajasaʼa David diez miit na wayuu nuʼutakana aaʼin».
8 Jashichishi maʼin Saúl sutuma tia, aisü nümüin tü namakat na jieyuukana neeʼirainruʼu. Anuujeseʼe nünüiki Saúl: «Diez miit na wayuu nuʼutakana aaʼin David müshii naya, miitpejeʼe neʼe na wayuu toʼutakana aaʼin naashin, naneekeechin joo süpüla niainjachin aluwataain naaʼu». 9 Aliratüna aaʼinchi David nutuma Saúl soʼujeʼereeya kaʼikat tia.
10 Shiasaʼa waneemüin kaʼi niʼitaakalaka Maleiwa wanee kasa nikiiruʼu Saúl süpüla mmoluinjachin nia seema, makaʼa mamainnakai neʼe naaʼin* Saúl suluʼu tü nipiakat, alatüsü tia nümüin wanaa sümaa nütalejüin David tü kanüliakat arpa maʼakaapuʼu nütalejüin shia. Eejatkalaka wanee lanza najapuluʼu Saúl, 11 nujutuinjeseʼe shia nooʼomüin David, «tasonojooleejeechia süka tüü», nümakalaka Saúl suluʼu naaʼin. Piantua najachijünüin David nutuma Saúl, isapejeʼe nia nuulia. 12 Mmotkalaka maʼin Saúl neema David süka eejachin Jehová nümaa David, akayalaapejeʼe nia nuulia Saúl. 13 Aʼleejünüshijeseʼe David nutuma Saúl, nüneekakalaka nia süpüla süʼlaülainjachin nia 1.000 surulaat, nia David nekiipüʼüwaika na surulaatkana sünain atkawaa. 14 Anakuwaʼipat süpüshuaʼaleeya tü naaʼinrakat David otta eejachi Jehová nümaa. 15 Mmotkalaka maʼin Saúl neema David niʼrapa anakuwaʼipalüin süpüshuaʼaleeya tü naaʼinrakat. 16 Aishi maʼin David napüla na israelitakana otta napüla na wayuu chajanakana Judá süka niain nekiipüʼüwalin sünain tü atkawaakat.
17 Anuukalaka nünüiki mapa Saúl nümüin David: «Taapajatü pümüin Merab, tü tachon miyoʼusükat süpüla kasaalüinjachin pia sümaa. Ayatüinjachipejeʼe pia aʼyataain tamüin sümaa yalayalain paaʼin otta atkaʼawalinjachi pia namaa na nüʼünüükana Jehová». «Anashi nnojoire tayain oʼutuin naaʼin, anashii nayale oʼutuin naaʼin na filisteokana», nümakalaka Saúl suluʼu naaʼin. 18 Anuupejeʼe nünüiki David nümüin Saúl: «Wayuʼulaa neʼe taya otta wayuu mapülainsalii na nüpüshikana chi tashikai, nnojoikalaka keraain taya süpüla tashimiainjachin chi aluwataashikai». 19 Naapatüjütpejeʼe Saúl tü nüchonkat süpüla kasaalajatüin shia nümaa Adriel, chi chejeʼewaikai Meholá,* naapüin shia süpülapünaa tü kaʼi kasaalajatkalü oʼu shia nümaa David.
20 Müliakalaka Mical niiʼiree David, tü wanee nüchonkat Saúl. Anashiikalaka nümüin Saúl naapapa süchiki tia. 21 «Shieerüinjaʼa taapüin Mical nümüin, temeejeechikalaka nia süka süpüla nuʼutunajachin aaʼin natuma na filisteokana», nümakalaka Saúl suluʼu naaʼin. «Aluʼu püshimieechinjaʼaya taya soʼukai», nümakalaka Saúl nüchikuaʼa nümüin David. 22 Anuukalaka nünüiki Saúl namüin na aʼyataashiikana nümüin: «‹Talatüshi maʼin chi aluwataashikai pümaa, aishi pia napüla na aʼyataashiikana nümüin. Anashi piale nüshimiain chi aluwataashikai›, jümayaa nümüin». 23 Anuukalaka nünüiki David shiʼipajee nanüiki na aʼyataakana nümüin Saúl: «Kapüleesü tamüin nüshimiainjachin taya chi aluwataashikai, jama wayuuin maʼletsesai taya jee maawainsai taya». 24 Nayasaʼa na aʼyataashiikana nümüin Saúl, naküjain nümüin tü nümakat David.
25 Anuujeseʼe nünüiki Saúl namüin na aʼyataashiikana nümüin: «Anashii jüküjale tüü nümüin David: ‹Tü nuchuntakat Saúl saaʼu tü nüchonkat shia puʼutuinjatüin naaʼin poloo nekii filisteo jee püntireetkalaka süta nakorolo nümüin, meechika pasalaakai naaʼin noulia na nüʼünüükana›, jüküja tia nümüin David», nümakalaka Saúl. Nüchajaain maʼin sukuwaʼipa Saúl süpüla nuʼutunajachin aaʼin David natuma na filisteokana. 26 Süküjünakalaka tia nümüin David natuma na aʼyataashiikana nümüin Saúl. Anashiikalaka nümüin David nüshimiainjachin chi aluwataashikai. Shiasaʼa süpülapünaa shikeraajüin tü kaʼi eʼitaanakat nüpüla, 27 nuʼunakalaka David namaa na wayuu nümaajanakana, nuʼutaka naaʼin 200 filisteo, nüntitkalaka süta nakorolo nümüin Saúl. Naaʼinrüin tia süpüla nüshimiainjachin chi aluwataashikai. Saapünaka Mical nümüin David nutuma Saúl. 28 Niyaawatakalaka Saúl eejachin Jehová nümaa David otta alin maʼin David süpüla Mical. 29 Mmotkalaka maʼin Saúl neema David sutuma tia. Nüʼürülaanaka waneepia David nutuma Saúl.
30 Wattaleʼeya maʼin naalii naʼlaülajana na filisteo nükanajawaikana David noulialeʼeya na nakanajawaikana na nüchepchiakana Saúl, kojutuka maʼin David atumawaa.