Jacob otta Raquel

¿JARALII na naashajaakana amaa Jacob? Arüleejülii naya, antiraashii nümaa eeka wanee ishi. Nüsakiraka naya: ‹¿Jalejeʼewalii jia?›

‹Chejeʼewalii waya Harán›, namaka.

‹¿Jiʼraajüin Labán?›

‹Aa›, namaka. ‹Iseeirü Raquel tü nüchonkat sümaa naʼanneetse›. Piirakaa sümüin suluʼu tü ayaakuaakat.

Niʼrapa shia Jacob nüsünneʼeraka shirouse tü ishikat süpüla nasüin wüin na anneetkana. Nutuʼlaka Jacob Raquel otta nüküjaka jaralin nia. Talatüsü maʼin shia, suʼunaka shipialuʼumüin otta süküjaka shia nümüin chi süshikai.

Talatüshi maʼin Labán süka makatüinjachin Jacob nipialuʼu otta süka kasaaleein nia sümaa Raquel. Nuchuntaka Labán nümüin Jacob niʼyataainjachin nümaa 7 juya süpüla kasaalüin nia sümaa. Tia naainjüin Jacob süka alin maʼin nüpüla Raquel. ¿Pütüjaa aaʼu tü alatakat wanaa sümaa kasaalüinjachin Jacob?

Nnojotsü naapüin Labán Raquel nümüin Jacob shia naapaka Lea tü nüchon miyoʼusükat. Niʼyataaka Jacob nüchikuaʼa 7 juya süpüla kasaalüin nia sümaa Raquel. Sümaiwa anasü nümüin Maleiwa wainmale nuʼwayuuse wanee wayuu. Akatsaʼa maaʼulu waneesüinjatü naashin.