10 Kasa mojusü

PIIRAKAA sümüin tü ayaakuaakalüirua, shia tü kasa mojusü alatakat sümüin Egipto nutuma Jeʼwaa. Suluʼu tü palajatkat piʼrüin Aarón nimetirüin nunuʼuse shiroku tü süchikat Nilo ishajaaka tü wüinkat, ouktaka tü jimekalüirua otta keejuuka shia sutuma.

Mapa nujuʼitiraka Jeʼwaa eperüʼüi shirokujee tü süchikat Nilo, suluʼuka naya tü naʼlakajaalekat, neitain otta natunkule na egipciokana. Ouktapa na eperüʼüikana, akotchojünüshii naya, keejuuka maʼin tü mmapaʼakat natuma.

Niʼyaataka Aarón tü mmakat süka nunuʼuse, eejaaka shipe, tia shia tü apünüinkat kasa mojusü.

Tü wanee kasa mojusükat alatüsü neʼe namüin na egipciokana. Tü pienchikat kasa mojusü shia tü merüle antakat suluʼu nepia na egipciokana. Tü jaʼraikat kasa mojusü alatüsü namüin na mürütkana. Ouktusü paaʼa, anneerü, otta nakaaʼulain na egipciokana sutuma.

Mapa nijitaka Moisés otta Aarón paliʼi iipünaamüin, yooika nata na egipciokana otta na mürütkana sutuma. Tia shia tü aipiruakat kasa mojusü.

Süchikijee niyaleraka Moisés najapü iipünaamüin shiʼitaka tü juyakat sümaa keʼichiisein shia nutuma Jeʼwaa. Nnojotpuʼusü aʼitüin juya eeka müin aka saaʼin tia chaaʼaya Egipto.

Tü mekiisatkat kasa mojusü shia tü kaashapakat, shiküin süpüshuaʼa tü nnojotkat sajaʼttirüin tü juyakat.

Tü mekietsatkat shia tü piyuushikat, kojosü maʼin soʼu apünüin kaʼi saaʼu Egipto. Akatsaʼa eere na israeliitakana nnojotsü piyuushin.

Mapa nuluwataaka Maleiwa na israeliitakana sünain ashuleʼera sünain soʼu nepia nüsha wanee kaaʼulachon jee anneetchonle nia. Nülatapa Egiptopünaa chi aapiee nuluwataalakai Maleiwa, nuʼutaka naaʼin na wayuu otta na mürüt eʼirumaakana suluʼu tü piichi nnojotkat ashulejünüin anain nüsha chi mürütkai. Tia shia tü poloosükat kasa mojusü.

Süchikijee tia, nüjütaka Faraón na israeliitakana, noʼunaka Egiptojee soʼuleʼeya aikat tia.