¡Oʼutulii saaʼin wayuu na yolujaakana!
Mojulaashi maʼin Satanás otta na yolujaakana. Nuʼuta aaʼinrü nümüʼlüin otta tü aʼyataasükalüirua nümüin Job. Süchikijee, nuʼuta aaʼinchii polooshii nüchonnii, nujuttirüin tü piichikat eejanale naya süka «wanee jouktai miyoʼu maʼin». Mapa ayuuishi Job nutuma «ourulajüsü sümaa kajüin nüta, nuuʼuinainjee sünainmüinreʼeya nikii» (Job 1:7-19; 2:7, NM).
Manüisalü otta moʼupaʼasalü wayuu natuma na yolujaakana wanaa sümaa yaajachin Jesús mmapaʼa (Mateo 9:32, 33; 12:22). Eeshi wanee wayuu müliashi maʼin otta nükashalüin tü nütakat süka ipa (Marcos 5:5). Otta wanee jintüi aʼwaatüshi, «apalasüjawaʼain müshi, oʼkchichijawaʼain müshi sütüma tü yolujaakat» (Lucas 9:42).
Na yolujaakana nashüküjüin wanee wayuu süpüla jashichinjachin nia jee neimolojuin wanee wayuu süka keemain nüʼlapüin natuma
Müsia maaʼulu oʼutui saaʼin wayuu Satanás namaa na yolujaakana. Watta maʼin saalii kasa mojusü naainjaka saaʼu tü mmakat soʼujeʼereʼeya nujutunuin iipünaajee. Ayuuishii, matuinkuinsalii, mojusü naʼlapüin otta ataüjaanüshii na wayuukana natuma. Eeshii eeka noʼutuin saaʼin wayuu, noʼutiraain naaʼin otta mamainnain natuma.
Na yolujaakana nashüküjüin wanee wayuu süpüla jashichinjachin nia jee neimolojuin wanee wayuu süka keemain nüʼlapüin natuma
Saashin Lintina wanee wayuu kepiasü chaaʼaya Surinam ouktusü 16 süpüshi natuma na yolujaakana otta müliasü maʼin shia natuma soʼu 18 juya. Saashin shiaka «anasü maʼin namüin na yolujaakana müliain otta noʼutuin saaʼin wayuu».
Akaisaʼa Jeʼwaa eeshi süpüla naaʼinmajüin na aʼyataashiikana nümüin nuulia Satanás (Proverbios 18:10).