Ekeraajeerü tü sümakat

Sotojusü naaʼin Juan süpüshuaʼa tü kasa nümakat Ramón. Kojuyatuairü naapüin tia süchiki tü Wiwüliakat, nütüjaa aaʼu shiain wanee karaloukta kakaliairü ashajünüin. Shiasaʼa müin niʼrüitpain shikeraajüin tü pütchi ashajünakat paala suluʼu, antajaasü suluʼumüin naaʼin wanee kasa: «¿Jaratche kaküjalaka namüin tia pütchikat? Lotusü maʼin natuma süshajia tü kasa alatajatkat otta wanaawasü shia sümaa tü namakat na cientiificokana», müshi nia.

Waneemüin kaʼi nuʼunaka Juan sümaa María nipialuʼumüin Ramón. Nüsakiraka nia: «¿Jamakuwaʼipat süpüla natüjaain saaʼu na ashajakana tü Wiwüliakat wanee kasa süpülapünaa sülatüin?».

Nümaka Ramón: «Naya wayuukana, shia nashajaka tü aküjünakat namüin maʼaka nüshajüin wanee seküretaario tü aküjünakat nümüin. Chi Kashajiralakai tü Wiwüliakat nia chi Washi shiimainshikai».

Nümaka Juan: «¿Jaraikai chi Washi shiimainshikai?».

«Nia chi aapakai kataa oʼuu sümüin wayuu süpüshuaʼa. Kanüliashi nia», nümaka Ramón nümüin Juan sümaʼinruʼu nüchajaain Salmo 83:18 süpüla naashajeʼerüin shia. Nümaka nümüin:

• 

  «Süpüla sütüjaainjatüin aaʼu wayuu, piain neʼe pümüiwaʼa chi Miyoʼushikai saaʼu tü mmakat süpüshuaʼa, piakai chi kanüliakai Jeʼwaa».

Naashajeʼeraka Ramón wanee wetsiikulo nümüin Juan. Naashajeʼerüin niain Jeʼwaa chi «aküjakai jamüinjatüin sukuwaʼipa suʼttia wanee kasa süpüla shikeraajüinjatüin. [Niain] neʼe chi aküjakai süpüshuaʼa tü kasa nnojoyütkalia alatüin» (Isaías 46:10, TNM). Nümaka Ramón: «Wanee wayuu wainma kasa nütüjakalü apüleerua nuulia chi nüchonkai. Jeʼwaa, chi washi shiimainshikai watta saalii kasa nütüjakalü apüleerua otta kekiishi maʼin nia woulia. Nütüjaa aaʼu tü kasa alateetkat. Müsüjeseʼe nüshajirüin suluʼu tü Wiwüliakat waneeirua kasa alatüinjatka».

«¿Nütüjaaitpaka saaʼu Jeʼwaa kaseerüin alatüin sümüin María otta tamüin tayakai?», nümaka Juan.

«Nnojotsü alejatüin nutuma Jeʼwaa sülatajatüin wanee kasa sümüin wanee wayuu. Nütüjaa aaʼu tü kasa mojusü alatakat wamüin otta nükaaliinjeein waya maʼaka chi wayuu akaaliinjeekai nüchoin», nümaka Ramón.

Nüküjaka Ramón nümüin Juan nükaaliinjeein waya Jeʼwaa sükajee tü Wiwüliakat. Nükaaliinjeein waya sünain tü kasa alatakat wamüin süpüla anainjatüin jee talatüinjatüin waaʼin. Otta nüküjüin nikirajüin waya Jeʼwaa sünain aneerüin wakuwaʼipa waneeküle kasa anasü otta mojeerüin shia mojule watuma süneekia wanee kasa.

Nnojotsü mojuluʼuluin nümüin Juan tia süka keeʼireein naaʼin aneein sukuwaʼipa nüchonnii watta kaʼi. Naashajeʼeraka joo Ramón waneeirua pütchi nümüin Juan sümaa María, nümaka:

• «Najaʼlajeʼerüin tü atkawaakat sainküin tü mmakat» (Salmo 46:9, TNM).

• «Shiimain nakumajeenain piichi süpüla kepiainjanain naya suluʼu; shiimain napünajeenain süpüla neküinjatüin süchon naʼttia. Nnojoleena akumajüin piichi süpüla kepiainjatüin wayuu naatajannuu suluʼu; nnojoleena apünajüin süpüla shiküinjatüin wayuu naatajannuu süchon naʼttia. Maʼaka kakaliain katüin soʼu suuʼulia wanee wunuʼu meeria nakalia na aʼyataakana tamüin. Talateerü naaʼin sünain aʼyatawaa na wayuu taneekajalakana» (Isaías 65:21, 22, TNM).

• «Kachonjeerü maʼin tü pünajütkalüirua; wainmeerü maʼin eküülü saaʼupünaa tü uuchikat» (Salmo 72:16, TNM).

• «Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia» (Alateetkat Mapeena 21:4).

Antüsü suluʼu naaʼin Juan tü sümakat tü Wiwüliakat. Kamalainsü nümüin kepiaa suluʼu wanee mma eere lotuin sukuwaʼipa wayuu, eere nnojoluin ayuulii, ouktaa jee jamü. Müsia María, ponusü saaʼin tia pütchikat. Nnojotpajaʼa müin shiimainkai saaʼin sümüin.

Nümaka Ramón: «Müshia tayakai nnojotsü tanoujain anain tia, shiasaʼa müin piʼrüitpain wainmain tü pütchi ekeraajüitpakat saashin tü Wiwüliakat. Makalaka shikeraajeerüin tü isayütkalia. Nüküjüin chi kashajiralakai tü Wiwüliakat shikeraajeerüin. Müshi nia suluʼu Alateetkat Mapeena 21:5: ‹Püshaja pümata tü tanüikikat süpüla kapülainjatüin saaʼin wayuu shia süka shiimüin›».