Jimateerü waaʼin otta talateerü waaʼin soʼu palitchon kaʼi
Talatüsü maʼin naaʼin Juan sümaa María süka natüjaaitpain saaʼu wainmeerüin wayuu suluʼu tü mmakat: wayuu lotoka akuwaʼipa otta aijiraaka. Jülüjasü naaʼin aneerüin nakuwaʼipa na wayuukana süka jouleerüin eküülü, nnojoleerüin ayuulii jee ouktaa. Aneerü saaʼin tü wayuukalüirua otta talateerü saaʼin. ¡Anashantasü namüin tia!
«¿Joujaleetka shikeraajaka tia?», nümaka Juan.
«Nnojoishi piain neʼe asakirüin süchiki tia. ¿Paapüichi achiki wanee wayuu kanüliakai Jesuu?», nümaka Ramón nümüin.
«Aa, taapa achikichi nütüjain maʼin ekirajaa. ¿Jamüshi sünainpünaaka nia tü tasakirakalü anain?».
«Alatüirü 2.000 juya süchikijee yaajachin nia saaʼu tü mmakat. Süküjüin tü Wiwüliakat suluʼu Mateo 24:3, nüsakinnüin Jesuu natuma na nikirajüinkana. Müsia aka saaʼin tü püsakirakalü anain. Nüküjaka Jesuu alatüinjatüin waneeirua kasa nayaawatüinjatka akajee tü nasakirakalü anain. Nüküjüin namüin alatüinjatüin waneeirua kasa süpülapünaa süntüin tü nükaliakat», nümaka Ramón.
Tü kasa mojusü alatakat maaʼulu, shiiʼiyatüin wamüin sülüʼülüin Nuluwataaya Maleiwa
«¿Kasa wayuu tü wayaawatüinjatkalü akajee tü naashajaakalü achiki Jesuu?», nümaka Juan.
«Süküjüin wamüin tü Wiwüliakat alatüinjatüin waneeirua kasa wayaawatüinjatka akajee tia kaʼikat. Anuu tia kasakalüirua».
«Atkaajiraajeerü wayuu sainküin mmakat süpüshua» (Mateo 24:7).
«Mülieerü maʼi saaʼin wayuu sütüma jamü» (Mateo 24:7).
«Kooʼomüinjeerü wayuu kaainjarat sainküin mmakat» (Mateo 24:12).
«Akutkujaweerü tü mmakat sainküin mma» (Lucas 21:11).
«Mülieerü maʼi saaʼin wayuu [...] sütüma ayuulii sainküin mma» (Lucas 21:11).
Niʼrüin Juan sümaa María shikeraajüin maaʼulu tü süküjakat tü Wiwüliakat. Makalaka shapaain naaʼin saaʼu tü alateetkat mapeena.
«Süka weʼrüin shikeraajüin tü sümakat tü Wiwüliakat, shiiʼiyatüin sülüʼülüin nuluwataaya Jeʼwaa», nümaka Ramón namüin. Naashajeʼeraka tü sümakat wanee wetsiikulo aküjakat süchiki tü süntireetkat Nuluwataaya Maleiwa.
«Ooʼulaka soʼutpünaa naluwataaya na wayuukana niʼitaajeerü chi Maleiwa sirumatuʼujeʼewaikai wanee aluwataaya matüjüinka ajaʼttaa. Nnojoleerü alatinnüin tia aluwataayakat suluʼumüin wanee mma. Sajaʼttireerü süpüshuaʼa tü aluwataayakalüirua otta shiainjatü eeka waneepia» (Daniel 2:44, TNM).
«Süntapa Nuluwataaya Maleiwa yaa saaʼu mmaka, nnojoleerü wayuu eekai mojulaain, eekai alaain otta eekai nnojoluin lotuin sukuwaʼipa. Anashanteerü, ¿aashimüin?», nümaka Ramón.
Sutuma nütüjaaitpain saaʼu Juan sümaa María tü kasa anasü nüntireetkat Maleiwa, keeʼireejaasü naaʼin kepiain naya suluʼu wanee mma eekai anashaatain.
«¿Kasa waaʼinrajatka süpüla chain waya suluʼu tia mmakat?», nümaka Juan.
«Süpüla jümaʼanain wanee kasa, choʼujaasü jiʼyataain süchiirua. Jülüja waaʼin nukuwaʼipa Adán sümaa Eva otta tü kasa amülouikat natuma. ¿Kasa shikirajaka anain waya tü nakuwaʼipakat?», nümaka Ramón.
«Ouktüshii naya süka nnojolin noonooin sümaa nünüiki Maleiwa», nümaka Juan.
«Maʼaka eein tü nuchuntakat Jeʼwaa nümüin Adán sümaa Eva, eesü tü nuchuntakat wamüinya. Keeʼireere waaʼin chain waya suluʼu tü paʼaraiisükat, weʼraajüinjachi Maleiwa palajana, watüjaainjatü aaʼu kasain tü anakat nümüin otta woonooinjatü amaa nünüiki.»
Anasü tia nümüin Juan, shiasaʼa müin jülüjain naaʼin kasainjatüin naaʼinrüin süpüla nainküin tia.
Nuunejaain waya Jeʼwaa süpüla suluʼuinjanain waya tü wopu sünainmüinkat tü jimataakalü aaʼin otta talataakalü aaʼin
«Nnojotsü kapüleein oonowaa sümaa nünüiki Jeʼwaa, aishii waya nüpüla, makalaka nuchuntüin wamüin kasa anainjatka atuma wakuwaʼipa. Niiʼiyatüin wamüin tü wopu oʼunirüinjanaka waya suluʼumüin tü mma anasükat. Otta nükaaliinjeena waya süpüla wasaʼwatüin shia», nümaka Ramón nümüin Juan. Süchikijee, naashajeʼeraka wetsiikulokot tüü:
«Tayakai Jeʼwaa, taya chi Pümaleiwasekai, Chi ekirajakai pia süpüla anainjatüin pukuwaʼipa, Chi oʼunirakai pia suluʼupünaa tü wopu anasükat. Poonoole sümaa tü taluwataakalü anain, jimateerü paaʼin maʼaka saaʼin wanee süchi otta loteerü pukuwaʼipa maʼaka saaʼin sümüna tü palaakat. Wainmashanteerü puuʼuliwoʼu maʼaka saaʼin tü jasaikat. Nnojoleerü asünneʼenüin nünülia waneeshiaakaijeʼe tamaʼanajee» (Isaías 48:17-19, TNM).
Antüsü suluʼumüin naaʼin Juan sümaa María tia pütchikat. Keeʼireesü maʼin naaʼin kepiain naya suluʼu wanee mma eere anain nakuwaʼipa sümaa napüshi. Nacheküin maʼin chain naya sümaa nachonnii suluʼu wanee mma anasü eere lotuin sukuwaʼipa wayuu.
«Eesü süpüla jiʼrüin tia kasa anasükat müleka jiʼraajüle Jeʼwaa otta müleka joonoole sümaa tü nuluwataakalü anain», nümakalaka Ramón.
«¿Kasa waaʼinrajatka süpüla watüjaain saaʼu tia? ¿Eeshii süpüla jükaaliinjain waya?», nümaka Juan.
«Aa, wakaaliinjeena jia. Eesü wanee kasa akaaliinjeenaka jia süpüla suluʼuin jia tü wopu sünainmüinkat tü jimataakalü aaʼin otta talataakalü aaʼin».