Nanüiki na Laülaashii Jülüjakana Aaʼin na Aküjaliikana Pütchi
Wawalayuu aishiikana wapüla:
Sünain tü rewiisütakat Aapiria Wayuu süpülajatka wayuu süpüshuaʼa ojuʼitaka eneeroʼu 1 soʼu 2008, oʼttüsü sünain süshajünüin tü pütchikat «Washata sukuwaʼipa nanoula». Soʼujeʼereʼeya tia, ojuʼitawaisü tia pütchikat apünüinwai kashi.
¿Jamüsü nanüiki na aashajeʼerakana tia pütchikat? Anuu sünüiki wanee wayuu aashajeʼeraka wanee pütchi süchiki Marta: «Taashajeʼerapa süchiki Marta, ponusü maʼin taaʼin süka mashaatain taya aka saaʼin. Jamüsüjaʼa keʼiyoule taya, nnojotsü eeyaain joyotuin taya namaa, shia neʼe jülüjaka taaʼin aainjaa kasa nayaaluʼu». Eesü wanee majayüt aashajeʼeraka süchiki Ester otta sümaka süchikijee: «Mapüleesat sümüin wayuu shiain saaʼinmaain jeketüinjatüin süsheʼin otta wanaawain shia sümaa süsheʼinpala wayuu maaʼulu. Shiimain anainjatüin wayolojo waneepia, nnojoluinjatpejeʼe shiain waaʼinmaain tia. Tü kojutukat nümüin Jeʼwaa shia anain wakuwaʼipa noʼuluʼu», müsü. Anuutaajaʼa sünüiki wanee wawalaya: «Suʼunnaa taashajeʼerüin tia pütchikat, müsü chakai taaʼin chayaa. Nnojotsü taashajeʼerüin neʼe sooʼopünaa taaʼin tia pütchikat, müsü teʼrakai saaʼin tü alatakat otta müsü taapakai saaʼin nanüiki na wayuu taashajeʼerakana achiki». Tüü, sünüiki tü wawalakat süchikijee saashajeʼerüin wanee pütchi nüchiki Pedro.
Tü namakat na wayuu wachuntayüliikana anülia otta napüshuaʼa na aashajeʼerakana tü pütchikat, shiiʼiyatüin sünain shiimain tü nümakat Pablo soʼu nümüin: «Aamasü maʼi wamüin süpüshua tü pütchi ashajünakat paala suluʼu tü karaloukta nüchikimaajatkat Maleiwa süpüla wekirajaajiraain sünain» (Roma 15:4). Nüshajirüin Jeʼwaa nachiki na wayuu namaiwajannuukana süpüla nikirajüin waya sükajee nakuwaʼipa. Jaʼitaina kakaliainale waya watüjaain saaʼu tü shiimainkat, eeshii süpüla watüjain nanainjee naya wayuukana.
Anashii jaashajeʼeramaatüle tü karaloʼutakat. Eeshii süpüla jikirajaain sünain soʼu tü Ai juʼwaajakalü oʼu Maleiwa sümaa jüpüshi. Kamalainjeerü namüin na tepichikana tü pütchi suluʼukat. Jee müsia, wekirajaapa sünain tü karaloʼutakat namaa na wawalayuukana sünain tü outkajawaakat, nnojo makatüin jia suulia tü outkajawaakat. Jülüja maʼin paaʼin sünüiki tü karaloʼutakat paashajeʼerapa shia jee nnojo kajaalapüin pia sünain aashajeʼeraa. Maa piʼrakai saaʼin tü paashajeʼerakalü achiki otta maa chakai paaʼin namaa na wayuu paashajeʼerakana achiki. Maa piakai aaʼin alatüin amüin tü alatakat namüin naya wayuukana otta jülüja paaʼin kasaje paaʼinraka piale alatüin amüin tia.
Talatüshii maʼin waya saaʼu eeitpain jümaʼana karaloʼutakat tüü. Kasataalejeseʼe anain jukuwaʼipa otta nakuwaʼipa na jüpüshikana sutuma tü pütchi suluʼukat. Shiimain maʼin aijeenain jia wapüla waneepia.
Laülaashii Jülüjaka Aaʼin na Aküjaliikana Pütchi