Nakaraloukse na Laülaayuu Nekiipüʼükana na Aküjüliikana Pütchi
Wawalayuu aika wapüla:
¡Talatüsü waaʼin süka washajüin jümüin! Tü wamakat müsü aka saaʼin tü nümakat chi aluwataaushikai Juan nachiki na nuwalayuu ‹aishiikana nüpüla› otta talatüsü naaʼin süka ‹ayatüin naya sünain anoujaa sünain tü shiimüinkat› (2 Juan 1,4). Atüjawaa saaʼu tü shiimainkat shia wanee kasa anasü alataka wamüin wapüshuaʼa. Taashishii waya sutuma suulia Babilonia tü Miyoʼusükat, tü shikirajakat anain otta tü akuwaʼipaa mojukat nümüin Maleiwa. Woʼunüle süchiirua tü shiimainkat aijeerü wapüla wayuu, wamülialeerü otta kamaneejeena waya. Sutuma tü shiimainkat wuleshii waya noʼuluʼu Maleiwa otta waʼatapajüin katüin woʼu waneepia.
Waapüin tü analuʼutkat nümüin Jeowa süka naapüin chi naaʼinkai süpüla nükaaliinjüin otta nüchecherüin waaʼin weinshi. Saaʼin wamüin talatüshii jia sutuma jikirajaain nünain chi naaʼinkai Maleiwa sünain tü outkajawaa miyoʼu apünüinkat kaʼi kanüliaka «Oʼuninnüshii nutuma chi naaʼinkai Maleiwa» eeʼiyataka wamüin tü naainjakat chi naaʼinkai Maleiwa. Sükajee sümojujaain tü kasa eekat saaʼu tü mmakat, choʼujaasü weʼitaain waaʼin nünain chi naaʼinkai Jeowa süpüla nuʼunirüin waya sünainmüinreʼeya tü kaʼi alatajatkat oʼu wainma kasa kapüleesü.
Wanaa sümaa waashajeʼerüin tü karalouktakat Anuario mojusü waaʼin süka watüjaain saaʼu tü müliaa neʼrakat na wawalayuukana sutuma nanoujüin. Noʼutku na wawalayuu alatakana amüin tia, jekena woutiisain otta eeshii na nnojoluyüliikana woutiisain. ¡Kojutüshii maaʼin wamüin süka noonooin nümüin Jeowa otta lotuin nakuwaʼipa! Sünainjee tü alatakat namüin, ayatüinjana waya oonooin sümüin Nuluwataaya Maleiwa jaʼitairü alatüin kasa mojusü wamüin (1 Tes. 1:6-8).
Watüjaa aaʼulu wawalayuu kapüleein maʼin ousütaa sünain tü nneerü choʼujaakat süpüla jipijüin jüpüshi otta jaaʼinrüinjatüin wainma kasa süpüla aijiraain otta paaʼinwajiraain jüpüshi. Eeshii na kapüleekana amüin ojuʼitaa sünain aküjaa pütchi otta akaaliinjaa sünain waneeirua aʼyatawaa sünain tü outkajaaleekat. Sutuma tia, oʼuraajüshii otta ekirajaashii maʼin waya palajana süpüla waʼwanajaain sukuwaʼipa tü outkajawaakat soʼujee eneeroʼu 1 soʼu 2009. Watüjaa aaʼu aneerüin jümüin tia otta eejeerüin kaʼi süpüla jikirajaain jümüiwaʼa otta sümaa jüpüshi.
Talatüsü waaʼin sükajee weʼrüin sünain tü outkajawaakat miyoʼu wainma wayuu ekeraajaka tü nüchuntakat Maleiwa süpüla woutiisain naya otta eeshii tepichi naʼaka. Wepelisitaajeein na kachonshiikana süka nekirajüin nachonnii sünain kojutüin namüin tü shiimainkat otta natütüleʼerüin naaʼin sünain aʼyatawaa nümüin Jeowa tepichiiwaʼaya naya. Mayaapejeʼe wainmain kasa eejiraaka ama na tepichikana suluʼu tü koleejiakat woutiisashii naya, alatüsü tia süka anain nekirajia natuma na kachonniikana naya (Sal. 128:1-6).
Wanee kasa nnojotka süpüla motuin waaʼin shia nakooʼomüinraain na ekirajaakana sünain tü Wiwüliakat natuma na aküjakana pütchi suluʼu mma naata otta na pürekutsootkana esüpesiaat. Napüshuaʼa na Laülaayuu Nekiipüʼükana na Aküjüliikana pütchi, kojutüsü wamüin tü naaʼinrakat na wawalayuukana sainküin tü mmakat sünain ounejaa na lotushiikana akuwaʼipa süpüla ‹nantüin sünain asaa masaloui tü wüin katakat atuma soʼu wayuu› (Alat. Map. 22:17, NM). Talatüshii maʼin waya namaa na 289.678 woutiisakana soʼu tü juya alatakat süka waʼakainnapain naya.
Anasü sotule waaʼin tü nümakat chi aluwataashikai Juan: «Je tü nakuaippakat na manoujainsaliikana sümaa tü kasa mojusü keeʼireekat naaʼin, yüüʼülaa meerü soʼuweena wane kaʼi. Aluʼujasa chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua» (1 Juan 2:17). Kepiashii waya soʼu tü kaʼi alüʼütkat süpüla «yüüʼülaa» müin nakuwaʼipa na manoujüinsaliikana. Makalaka jülüjüinjatüin waaʼin aaʼinraa tü keeʼireekat naaʼin Maleiwa wapüleerua otta ‹eejüinjatüin waaʼin› (Mat. 24:42). Nnojoleerü mojuin waaʼin waainjüle shia, wainmeerü kasa anasü wamaʼana sutuma alin waya nüpüla Maleiwa ( Isa. 63:7).
Tü aküjalaa suluʼukat tü karalouktakat Anuario aashajaasü süchiki tü alatakat namüin na wawalayuukana sainküin tü mmakat otta sütütüleʼereerü jaaʼin süpüla palajanain jutuma Nuluwataaya Maleiwa sünain süpüshuaʼa jukuwaʼipa. Jütüjaa saaʼu sotuin jia waaʼin, woʼuraajüin jaaʼu otta alin maʼin jia wapüla. Ana maʼin jukuwaʼipa nutuma Jeowa.
Na juwalayuukana,
Na Laülaayuu Nekiipüʼükana na Aküjüliikana pütchi nüchiki Jeowa