Wekirajia sükajee karalouktaka «Ayata alin jüpüla Maleiwa»
1. ¿Kasapülajatü tü karalouktakat «Ayata alin jüpüla Maleiwa»?
1 Talatüshii maʼin waya süka sujuʼitüin jekenainka tü karalouktakat «Ayata alin jüpüla Maleiwa» suluʼu wayuunaiki. Maʼaka süküjünüin paala, karalouktakat tüü süpülajatü weʼraajüin otta kojutüin wamüin tü nuluwataakat anain Jeowa. Nnojotsü süpülajatüin ekirajaa sünain tü kasa mapüleesat shikirajakat tü Wiwüliakat otta nnojoluinjatü wottanajüin sünain aküjaa pütchi.
2. ¿Jamüinjatü wekirajia sükajee karalouktakat tüü? ¿Jaralii na wekirajüinjanakana?
2 Karalouktakat tüü, shia nikirajaainjatka anain chi ekirajaashikai najaʼttirapa tü karalouktakat Kasa shikirajaka. Soto paaʼin naatain nakuwaʼipa na wayuukana sünain ekirajawaa, makalaka nekirajünüinjanain pansaa sümaa tü anakat namüin. Akatsaʼa jülüjüinjatü paaʼin, niyaawatüle chi pikirajüinkai tü pütchi pikirajakat anain nia. Nnojoleerü waapüin karalouktakat tia namüin na wayuu ekirajaainakana sükajee kojuyasü karaloukta. Akatsaʼa, nnojoliin noutkajaain otta jaʼyasü naaʼu nnojoluin naʼwanajaweein nakuwaʼipa wanaapünaa sümaa tü shiimain suluʼukat tü Wiwüliakat.
3. ¿Kasa waaʼinrajatka wekirajüle süka tü karalouktakat Adoremos?
3 Pikirajüle maaʼulu süka tü karalouktakat Adoremos sümaa sülüʼülüin süpüla sajaʼlajaain, anasü pajaʼlajeʼerüle shia otta püküja nümüin chi pikirajüinkai naashajeʼeraiwa nümüiwaʼa tü karalouktakat «Ayata alin jüpüla Maleiwa». Nnojorüle müin shia, anasü shiale pikirajüin aka tü karaloukta jeketkat otta puʼtta sünainjee tü palajatkat ekirajaaya. Maʼaka saainjünüin süka tü karalouktakat Kasa shikirajaka, aneeküneerü shikirajaanajatüle anain tü sooʼomüinkat pütchi.
4. ¿Kasa paaʼinrajatka woutiisale wanee pikirajüin süpülapünaa najaʼlajeʼerüin tü karalouktakat «Ayata alin jüpüla Maleiwa» jee shiale Kasa shikirajaka?
4 Woutiisale chi pikirajüinkai süpülapünaa najaʼlajeʼerüin tü piamasükat karaloukta, ayatüinjachi pikirajüin süka tü karalouktakat «Ayata alin jüpüla Maleiwa» süpüla najaʼlajeʼerüin shia. Jaʼitakajeʼe woutiisale nia süpülapünaa najaʼlajeʼerüin tü karalouktakat Adoremos eesü süpüla piyaawajüin tü oorakat, jeʼratuain puuyantüin püchikuaʼa otta eeshi süpüla piyaawajüin nia maʼaka naaʼin wanee ekirajaashi. Eesü süpüla niyaawajüin tü oorakat chi aküjüi pütchi pümaakai sünain ekirajaa.
5. ¿Jamüinjatü nekirajia watuma na wawalayuu eemiajaakana anoula sükajee tü karalouktakat «Ayata alin jüpüla Maleiwa»?
5 Nüchuntüle pümüin noʼutku na Laülaayuu Oʼunirakana sukuwaʼipa tü Aʼyatawaakat suluʼu tü Outkajaaleekat pikirajüinjachin wanee wawala eemiajaaka anoula, eesü nüküjüle pümüin jaralüin tü ekirajaaya pikirajüinjatkat aka nia sükajee tü karalouktakat «Ayata alin jüpüla Maleiwa». Müle shia, nnojolinjachi kakaliain sünain ekirajünaa. ¡Anakatche maʼin tü aapünakat wamüin! Akumajünüsü karalouktakat tüü süpüla ‹ayatüin alin wapüla Maleiwa› (Judas 21).