Asakinnaka Anain
◼ ¿Kasa waaʼinrajatka sünain tü outkajawaakat süpüla anainjatüin sukuwaʼipa tü ekirajawaakat? (Deu. 31:12.)
Sutuma kojutüin wamüin Jeowa otta tü outkajawaa eekat nutuma, antajana waya maalü otta yapainjana waya süpüla nikirajüin. Anashii waikkalaale palajana süpüla naikkalaain chiirua na joʼuukana achonnii otta na antawaikana süchikijee suʼttüin tü outkajawaakat. Süpülapünaa suʼttüin tü outkajawaakat, ayokojoonajatü tü serulaatkat jee eʼitaanajatü eere sukutkujaain süpüla nnojoluin shikeʼejüin naaʼin na jutkatüshiikana. Kojutüle wamüin wapüshuaʼa tü outkajawaakat, nnojoleerü kasain ekeʼejüin naaʼin na jutkatüshiikana (Ecl. 5:1; Fili. 2:4).
Wanaa sümaa noʼttüin na jekennuukana sünain outkajawaa, wanee wawala eʼraajakai naya eeshi süpüla nüikkalaain naʼütpaʼa. Aneerü maʼin tia namüin na joʼuukana achonnii süka eiwaʼalin na tepichikana sünain ekirajawaa. Eeshii neiwaʼaliire antaa sünain tü outkajawaakat makalaka talateenain naya naikkalaale chiirua. Müle shia, nnojoleena nekeʼejüin aaʼin na wawalayuukana wanaa sümaa nojuʼitüin süpüla nakaaliinjüin na nachonniikana sünain tü choʼujaakat namüin (Pro. 22:6, 15). Nnojoluinjana aikkalaain naya namüiwaʼa suluʼu wanee paü eere eein süpüla nashaittüin na tepichikana. Shia anaka aluʼu shiale tü neikat jee niale chi nashikai ojuʼitüin motsoʼo namaa otta nüchiaain jee nükaaliinjüin naya sünain tü choʼujaakat namüin. Süchikijee naikkaleʼereena naya eere na jutkatüshiikana.
Eesü tü kasa naaʼinrajatkat na jülüjakana aaʼin na antüshiikana süpüla anainjatüin sukuwaʼipa tü aʼwaajaakat Maleiwa. Nakaaliinjüin na apüshiikana sünain aneeka neinase otta na antawaikana süchikijee suʼttüin tü outkajawaakat. Wanaa sümaa neeʼiyatüin neinase na antakana, anasü nanüiki namüin, kamaneeshii naya sümaa nnojoluin nekeʼejüin naaʼin na waneeinnua. Nalaüleʼerüin naaʼin wanaa sümaa nanoukteʼerüinjatüin wanee kasa eeka sülatalaa sümüin suluʼu tü outkajaaleekat. Otta kamaneeshii naya wanaa sümaa nakaaliinjüin na tepichi kekeʼerakana sünain tü outkajawaakat.
Maʼaka wekirajaainnapain, wapüshuaʼa wayakana eesü tü kasa waaʼinrajatkat süpüla anain sukuwaʼipa tü ekirajawaakat nüchiki Jeowa otta sünain tü kasa naaʼinrajatkat maʼaka saaʼin wanee mma jeketü eere eeinjatüin jimataa aaʼin otta lotoo akuwaʼipa (Heb. 10:24, 25).