‹Aküjüneerü süchiki tü pütchi anasükat›
1. ¿Jamüsü watüjaaka saaʼu nnojoluin eein wanee kasa ooʼuleʼerüinjatka süküjünüin pütchi?
1 Nnojotsü eein wanee kasa ooʼuleʼerüinjatka shikeraajüin tü keeʼireekat naaʼin Jeowa (Isa. 14:24). Süka nümaain Gedeón 300 wayuu sünain atkawaa namaa 135.000 madianiita, kapüleesü nümüin akanajaa. Akatsaʼa müshi Jeowa nümüin: «Shiimain taasheenain putuma na israeliitakana najapüluʼujee na madianiitakana. Taluwataain pia» (Jue. 6:14, NM). Jama maaʼulu, ¿kasa aʼyatawaa nükaaliinjaka anain waya Jeowa? Nüküjüin Jesuu jaralüin shia: ‹Aküjüneerü tü pütchi anasükat süchiki nuluwataaya Maleiwa sainküin mmaka süpüshuaʼa› (Mat. 24:14). ¡Nnojoishi eein chi ooʼuleʼerüinjachikai shikeraajüin aʼyatawaakat tia!
2. ¿Jamüshii wanoujaka sünain nükaaliinjeenain waya Jeowa waneʼewai wakua sünain aküjaa pütchi?
2 Nükaaliinjüin waya Jeowa waneʼewai wakua. Wanouja anainrü nükaaliinjeenain Jeowa napüshuaʼa na Aküjüliikana Pütchi nüchiki. Akatsaʼa, ¿nükaaliinjeena waya waneʼewai wakua? Wanaa sümaa niʼrüin müliaa Pablo, akaaliinjünüshi nutuma Jeowa nükajee Jesuu (2 Tim. 4:17). Weʼitaa waaʼin sünain aneerüin sukuwaʼipa nutuma Jeowa tü waainjakat waneʼewai wakua süpüla wekeraajüin tü keeʼireekat Naaʼin (1 Juan 5:14).
3. ¿Kasa nükaaliinjaka anain waya Jeowa?
3 ¿Matchinsai pia süpüla aküjaa pütchi sutuma piʼyataain süchiirua tü kasa choʼujaakat pümüin? «Katchinshi nutuma [Jeowa] chi mapüsakai» (Isa. 40:29-31, NM). ¿Apüleeruaanüsü paaʼin jee müliashi pia atumawaa? «Piʼitaa tü püchise jawatakat naaʼu Jeowa otta nükaaliinjeechi pia» (Sal. 55:22, NM). ¿Mmoluwaishi pia sünain aküjaa pütchi? ‹Aapüneerü pümüin tü pütchi püküjüinjatkat› (Mat. 10:28-30). ¿Nnojoishi aküjüin maʼin pia pütchi sutuma ayuulii? Kojutüsü nümüin Jeowa tü waainjakat süka waaʼin, mayaasüjeʼe palitchoin shia otta anasü sukuwaʼipa nutuma (1 Cor. 3:6, 8, 9).
4. ¿Kaseerü waainjaka weʼitaale waaʼin nünain Jeowa?
4 «Shia yuttaka najapü [Jeowa], ¿jarai eeka süpüla ashokoleʼerüin shia?» (Isa. 14:27, NM.) Sümaa weʼitaa waaʼin sünain aneerüin wakuwaʼipa nutuma Jeowa sünain aʼyatawaa nümüin, ayata waya sünain aküjaa pütchi sümaa ‹nnojoliin mmoluin waya sükajee naapüin pülaa› Jeowa wamüin (Aluw. 14:3).