Choʼujaasü wamüin oʼuraajaa
1. ¿Kasa choʼujaaka süpüla wekeraajüin tü aʼyatawaakat nümüin Maleiwa?
1 Isasü wachiki wamüiwaʼa wekeraajüin tü aʼyatawaakat nümüin Maleiwa. Nia Jeowa katchinka atuma waya süpüla waainjüin shia (Fili. 4:13). Nuluwataain na aapieekana süpüla nakaaliinjüin waya sünain antaa nanain na wayuu anamiakana maʼaka saaʼin anneerü (Alat. Map. 14:6, 7). Nia kooʼomüinka atuma nanoula na wayuu waküjakana amüin pütchi (1 Cor. 3:6, 8,9). Makalaka choʼujaain maʼin wachuntüin kaaliinwaa nümüin Jeowa wanaa sümaa woʼuraajüin.
2. ¿Kasa wachuntajatka woʼuraajapa?
2 Wachunta wapüleerua. Oʼuraajüinjana waya wanaa sümaa waküjawalin pütchi (Éfe. 6:18). ¿Kasa wachuntajatka? Anasü wachuntüle meimmoluin waya otta anain tü jülüjakat waaʼin nachiki na waküjakana amüin pütchi (Aluw. 4:29). Eesü süpüla wachuntüin nümüin nuʼunirüinjanain waya nanainmüin na ekirajaweekana sünain tü Wiwüliakat. Wasakinnüle wanaa sümaa waküjüin pütchi, eesü süpüla wachuntüin suluʼu waaʼin nümüin Jeowa süpüla nükaaliinjüin waya sünain asouktaa (Neh. 2:4). Eesü süpüla wachuntüin kekiiwaa süpüla palajanain watuma tü aʼyatawaakat nümüin Maleiwa (Sant. 1:5). Otta taasia, anasü nümüin Jeowa waapüle tü analuʼutkat nümüin saaʼu nüneeküin waya süpüla waʼyataain nümüin (Col. 3:15).
3. ¿Jamüsü süküjüneetka maʼin pütchi wachuntüle naaʼu na waneeinnua?
3 Wachunta naaʼu na waneeinnua. ‹Achuntiraainjana waya waaʼu› sümaa wachuntüin nanülia na wawalayuukana choʼujaale shia (Sant. 5:16; Aluw. 12:5). ¿Jama nnojoire süpüla piʼyataain maʼin nümüin Maleiwa süka ayuulin pia? Püchunta napüleerua na aküjülii pütchi nnojoliikana ayuulin. ¡Kojuta pümüin tü kasa eekat sutuma puʼuraajüin! (Sant. 5:16.) Otta müsia, anasü oʼuraajaa süpüla anain namüin na sülaülashiikana mma tü aküjaakat pütchi. Sutuma tia, ‹jimateerü naaʼin› na wawalayuukana (1 Tim. 2:1, 2; NM).
4. ¿Jamüshii woʼuraajüinjanaka waneepia?
4 Wainma aʼyatawaa sünainpünaaka tü aküjaakat pütchi sainküin Mma. Akatsaʼa ‹wachuntüle waneepia nümüin Maleiwa›, nükaaliinjeena waya (Roma 12:12).