Wanee aʼyatawaa anasü maʼin
1. ¿Kasa aainjünaka maaʼulu yaa süpüla anain nanoula na wayuukana?
1 Talatüshii maʼin na wayuu eʼrakana anain na ayuuishiikana soʼu nakalia na nikirajüinkana Jesuu (Luc. 5:24-26). Akaʼaya neʼe wayakana, talatüshii waya süka waküjüin pütchi maaʼulu, sutuma tia müshii aka weiyajakai naaʼin na wayuukana süpüla anain naya (Alat. Map. 22:1, 2, 17). Talatüshii maʼin waya waashajeʼerüle nachiki wayuu aʼwanajaaka akuwaʼipa sutuma tü Wiwüliakat otta sutuma tü nütchinkat Maleiwa, ¿aashimüin? Akanasaʼa, talataleeinya maʼin waya waʼyataale sünain ekirajaa wayuu aainjamaataka tü sümakat tü Wiwüliakat.
2. Püküja tü kasa talatakat atuma waaʼin wekirajapa wanee wayuu sünain tü shiimainkat.
2 ¿Kasaichi nünülia Maleiwa? ¿Jamüsü nuuʼulaaka eein tü müliaakat? ¿Kaseerü eeka namüin na wayuukana sutuma tü Nuluwataayakat? Wasouktee amüinrü pütchikat tia otta keeʼireesü waaʼin talatüin na ekirajaakana sutuma natüjaain saaʼu tü shiimainkat (Pro. 15:23; Luc. 24:32). Mayaasü kooʼomüin tü nunoulakat, nüküjüin nünülia Jeowa, nuʼwanajaain sukuwaʼipa naʼanaaya, nuuʼulaain tü nukuwaʼipa mojukat otta aküjüshi pütchi namüin na waneeinnua. Naapüle naaʼin nümüin Maleiwa otta woutiisale nia, wawalashi sümaa weʼipajachin nia. Otta talatüsü waaʼin saaʼu naainjüin tia kasakalüirua (1 Tes. 2:19, 20).
3. ¿Kasa waainjüinjatka süpüla wekirajüin wayuu sünain tü Wiwüliakat?
3 Pükaaliinja. Sünainpünaweere pia tia aʼyatawaakat, püchunta nümüin Jeowa pikirajai wanee wayuu otta paainja tü wanaapünaakat sümaa tü püchuntakat (1 Juan 5:14). Püküja pütchi eere eein wayuu otta püntiraapa sümaa. Püküja pikirajeein wayuu wanaa sümaa eein süpüla paainjüin shia (Ecl. 11:6). Otta wantiraale nümaa wanee wayuu eeka acheküin tü shiimainkat, wouyanta nünainmüin otta wekiraja nia (1 Cor. 3:6-9).
4. ¿Jamüshii waküjüinjanaka maʼin namüin na wayuukana wekirajeein naya sünain tü Wiwüliakat?
4 Wainma wayuu choʼujaaka amüin lotoo akuwaʼipaa, müshii wüinyaasükai naaʼin otta jamüsitkai naaʼin shiiʼiree. ¿Jaraleena ekirajaka naya sünain tü Wiwüliakat süpüla anain nanoula? (Mat. 5:3, 6.) Waʼyataa maʼin sünain ojuteʼeraa tü aküjaakat pütchi otta ekirajaa wayuu süpülapünaa sajaʼttüin tia aʼyatawaakat (Isa. 6:8).