Pikiraja püchonnii süpüla naʼyataaliin nümüin Maleiwa
1. Sünainjee tü sümakat Salmo 148:12, 13, ¿kasa naainjeeka amüin na kachonshiikana?
1 Nuunejaain Jeowa na tepichikana süpüla naʼwaajüinjachin nia (Sal. 148:12, 13). Sükajee tia, na kachonnii anoujakana nnojoishii nekirajüin neʼe na nachonniikana sünain tü sümakat tü Wiwüliakat otta sünain tü nuluwataakat anain Maleiwa, yapashii natuma süpüla naʼyataain nümüin Maleiwa. ¿Jamüinjatü sukuwaʼipa natuma sümaa nnojoluin uatuwoʼushin shia?
2. ¿Jameerü nakuwaʼipa na tepichikana sutuma nakuwaʼipa na kachonniikana naya?
2 Anale pukuwaʼipa. Müsü tü nuluwataakat anain Gedeón na 300 wayuu nümaajanakana: «Jütüja sünainjee jiʼrüin takuwaʼipa» (Jue. 7:17, NM). Na tepichikana, shia neʼraka otta nashataka nakuwaʼipa na kachonniikana naya. Wanee wawala saʼwaipalakai aʼyataain, nnojoishi atunküin nia saawanoʼu wattaʼa maalü aküjüshi pütchi namaa nüchonnii mayaainjeʼe lapüsirüin nia. Sükajee tü naainjakat nikirajüin na nüchonniikana shiain palajanain tü aküjaakat pütchi (Mat. 6:33, NM). ¿Neʼrüin na püchonniikana talatüin paaʼin sünain oʼuraajaa, aashajeʼeraa tü Wiwüliakat, ayaleraa pajapü sünain tü outkajawaakat otta aküjaa pütchi? Shiimain nnojoleerüin anain tü pukuwaʼipakat waneepia napüleerua na püchonniikana, akaisaʼa neʼrüle tütüin pia sünain aʼyatawaa nümüin Maleiwa oonoweena pümüin pikirajapa naya sünain aʼwaajaa Jeowa (Deu. 6:6, 7; Roma 2:21, 22).
3. ¿Kasa jiʼitaainjatka süpüla nasaʼwatüin sünain anoujaa na jüchonniikana? ¿Kaseerü jükaaliinjaka aka naya?
3 Tü eeka süpüla nasaʼwatüin. Na wayuu kachonniikana keʼepülii ekirajaa nachonnii sünain okoyojoo, aashajawaa otta aʼataa nasheʼin. Neʼrapa nainküin wanee kasa, nekirajüin naya sünain wanee kasa jeketü. Otta nanoujüle, nakaaliinjüin na nachonniikana süpüla nasaʼwatüin tü keeʼireekat naaʼin sünain nanoula wanaajiraa sümaa nouyase otta tü natüjakat apüleerua (1 Cor. 9:26). ¿Pikirajüin naya süpüla nayalerüin najapü namüiwaʼa sünain tü outkajawaakat otta süpüla yapain natuma tü nekirajüinjatkat anain sünain tü Ekirajawaakat süpüla Aküjaa Pütchi? (Sal. 35:18.) ¿Pikirajüin naya süpüla wainmain tü naʼyataakat anain nümüin Maleiwa? ¿Piʼitaain napüleerua woutiisain naya otta naʼyataain waneepia nümüin Maleiwa? ¿Aleewashii naya jutuma namaa aküjülii pütchi talataka aaʼin süpüla natütüleʼerüin naaʼin? (Pro. 13:20.)
4. ¿Kasa neʼreetka na tepichikana nekirajünüle joʼuuiwaʼaya naya süpüla naʼyataain nümüin Jeowa?
4 Müshinka chi eeʼiraikai: «Piakai Maleiwakalee pikirajüin taya tepichiiwaʼaya taya otta ayatayüiya taya aashajaain süchiki tü kasa anasü paainjakat» (Sal. 71:17). Puʼtta sünain ekirajaa na püchonniikana joʼuuiwaʼaya naya süpüla naʼyataain nümüin Maleiwa. Tü paainjakat maaʼulu napüleerua sünain nanoula sükaaliinjeena miyoʼupa naya (Pro. 22:6).