Nakaraloukse na Laülaayuu Nekiipüʼükana na Aküjüliikana Pütchi
Wawalayuu aishiikana wapüla:
¡Anasü maʼin tü kaʼi kepiakat oʼu waya otta talatüshii maʼin waya! Anasü maʼin wamüin «paaʼinwajiraain» waya jümaa sünain weʼraajirüin maʼin nüchiki chi Washi iipünaajachikai Jeowa (Sof. 3;9, NM; Juan 14:12).
Mayaainjeʼe talatüin waya sünain aʼyatawaa nümüin Jeowa, alatitshii waya müliaa. Soʼu juyakat tiainka eeshii na alatitkana müliaa jaʼakajee sutuma sukutkujaain tü mmakat, süsetüin wüin, wawai jee waneeirua kasa (Mat. 24:7). Wainma maʼin na eejiraakana weinshi sümaa tü ayuuliikat jee tü laülawaakat. Otta wayakana wapüshuaʼa eejiraashii waya sümaa tü müliaa ‹makat aka saaʼin suʼttia saalin joʼuu sümüin jieyuu› (Mat. 24:8). Otta müsia wainma na wawalayuu püreesakana saaʼujee nanoula suluʼu kojuya mma maʼaka saaʼin Armenia, Corea del Sur otta Eritrea (Mat. 24:9).
¿Kasa akaaliinjaka waya süpüla ayatüinya talatüin waaʼin mayaapejeʼe müliain waya? Shia tü pütchi soʼujatkat juya 2010, ‹Tü aipüralüükat, wachecherüin waaʼin sutuma. Tü aipüralüükat, matüjüinsat ajaʼttaa› (1 Cor. 13:7, 8, NM). Süka aijiraain waya otta alin wapüla Jeowa, sükaaliinjüin waya süpüla wachecherüin waaʼin.
Wainma na wayuu suluʼukana tü iküleesia nnojotkat shiimain ponoko aaʼin tü eekat sutuma waküjüin pütchi otta süka ayatüin wawaraijaain naaʼu na wayuukana. Müsü nanüiki waneeinnua wayuu mayaainjeʼe nnojoluin nacheküin tü wanoulakat otta tü wekirajakat anain: «Jiakana shia jaainjaka tü kasa waaʼinrüinjatiyaakat wayakana». ¿Kasa akaaliinjaka na aküjüliikana pütchi süpüla ayatüin naainjüin tia? Shiajaʼa neʼe tü aipüralüükat. Keeʼireesü waaʼin nnojoluin najaʼlajeʼennüin na wayuukana maʼaka keeʼireein shia naaʼin chi Washi iipünaajachikai (2 Ped. 3:9). Soʼu tü juya alatakat eeshii 7.508.050 aküjülii pütchi, shiiʼiyatüin tia keeʼireein waaʼin shiyaawajaainjatüin wayuu süpüshuaʼa suulia saainjala. Nnojotsü eein wanee iküleesia kaluʼuka wayuu eekai aipüralüin süpüla süküjüin pütchi masaloui namüin na wayuukana.
Sütütüleʼerüin maʼin waaʼin ayatüin weʼrüin shikeraajüin tü pütchi nüshajakat Isaías: «Jee sajaʼttiamüin tü kasakalüirua, yaleteerü maʼin tü uuchi kaaʼukat tü aʼwaajüleekat Jeowa suulia tü wanee uuchikalüirua, ayalenneerü sooʼopünaa tü wutaikalüirua jee antayaa meerü wayuu sainküinjeejatü mma sünainmüin» (Isa. 2:2-4, NM). Saʼakajee tia wayuu antayaa mmakalüirua suluʼumüin aʼwaajülee Jeowa eeshii na 294.368 woutiisakana soʼu juyakat tiainka. Talatüshii maʼin waya süka yaain naya wamaa. Süka wayuuin aipüralii waya, ayata wakaaliinjüin naya süpüla eejiraain naya sümaa tü niʼitaakat Satanaa napüleerua (1 Ped. 5:8, 9).
Wanaa sümaa Sotuin Waaʼin ouktüin Jesuu soʼu juyakat tiainka, outkajaashii wamaa 18.706.895. Süka wainma maʼin na wayuu outkajaakana wamaa shiiʼiyatüin wainmain na wayuu eekana süpüla naʼwaajüin Jeowa wamaa. Talatüshiijeseʼe maʼin waya süka nnojoluyülüiya najaʼttirüin Jeowa tü kasakalüirua. Akatsaʼa sükaaliinjüin waya tü aipüralüükat süpüla wachecherüin waaʼin sujuuna süntüin tia kaʼikat (2 Tes. 3:5, NM).
Kooʼomüinsü maʼin tü aleewaakat nümaa Jeowa sutuma tü outkajawaa miyoʼu apünüinkat kaʼi, kanüliaka «Ayata pejein waya nünain Jeowa», aainjünaka sainküinpünaa mmaka süpüshuaʼa soʼu 2010. Ekeraajüsü tü nümakat chi eeʼiraikai: «¡Anataʼaleeshiijaʼa na wayuu Kamaleiwasekana Jeowa» (Sal. 144:15, NM). Jaʼitairü kasain alateerüin wamüin nnojoleena mmoluin waya süka watüjaain saaʼu eein Jeowa wamaa. (Sal. 23:4). Alüʼütsü süpüla najaʼlajeʼerüinjatüin Jeowa nükajee chi Nüchonkai tü kasa mojusü naaʼinrakat chi Yolujaakai (1 Juan 3:8). ¡Waʼatapajüin maʼin süntüin kaʼikat tia! Akatsaʼa wainma kasa waʼyataainjatka anain sujuuna tia (1 Cor. 15:58).
Jütüjaa saaʼu ‹wachuntüin waneepia› jaaʼu (Roma 1:9). Wachuntüin jümüin: «Ayata alin jüpüla Maleiwa, sümaa jaʼatapajüin jümüliajünüinjanain otta katüinjatüin joʼu waneepia nükajee chi Wasenyotsekai Jesucristo» (Jud. 21, NM).
Aishii jia jüpüshuaʼa wapüla.
Na juwalayuukana,
Na Laülaayuu Nekiipüʼükana na Aküjüliikana Pütchi