Eeja waaʼin sünain asheʼejirawaa
1. ¿Kasa süküjeeka achiki 1 Corinto 9:26 sünainpünaa tü aküjaakat pütchi?
1 Müshi Pablo: «Eesü taaʼin waneepia sünain tü taaʼinrakat süpüshua, maa aka chi eekai yalayalain sünain ayoujirawaa, maa aka chi eekai yalayalain sünain asheʼejirawaa» (1 Cor. 9:26). Tü nüküjeekat achiki Pablo shia nüsaʼwateein tü sünainpünaakat nunoula. Tia, sünainpünaasia neʼe shia tü wakuwaʼipakat sünain aküjaa pütchi, tü keeʼireekat waaʼin shia ‹yalayalain waya sünain› süpüla anainjatüin maʼin sukuwaʼipa watuma. ¿Jamakuwaʼipalüinjatü shia watuma?
2. ¿Joujainjana otta jalainjana waya aküjüin pütchi maʼaka naaʼin Pablo otta na nümaajanakana?
2 Waküja pütchi eere eein wayuu. Aküjapuʼushi pütchi Pablo namaa na nümaajanakana eere nütüjaain aaʼu jouluin wayuu (Aluw. 5:42; 16:13; 17:17). Nepialuʼuwaire na wayuukana aipaʼa eere waküjüin pütchi, anashii waküjüle pütchi nepialuʼupünaa soʼu tia. ¿Jalapüshiwaisü piratüin wayuu tü oikkaalee eekat eere püküjüin pütchi? Eesü anale aküjaa pütchi kaayeruʼu soʼu tia.
3. ¿Jamüsü süpüla anain sukuwaʼipa saapaaya tü mma waküjakat aluʼu pütchi?
3 Kekii waya süpüla anain süküjia pütchi. Tü wanee eekat süpüla waaʼinrüin shia jülüjüle waaʼin jamüin saapaaya tü mma waküjakat aluʼu pütchi. Jamüsüjaʼa müleka najütünüle kojuyashii aküjülii pütchi suluʼumüin wanee mma, aʼyatawaa maʼin süpüla kottüinjanain naya jee naküjüinjanain pütchi. Shia anaka aluʼu katataʼawale naya. Anashii joo naluwataanüle palitchon suluʼu wanee kemion müleka naküjüinjanale pütchi wünaʼapü süpüla motsoʼoin shia natuma jee süpüla yootuin maʼin naya sümaa wayuu. Tü wanee eekat süpüla waaʼinrüin shia waküjüle pütchi pejepünaa sünain wepia. Müle shia, motsoʼojeerü wamaʼa wopuluʼu.
4. ¿Kaseerü akaaliinjaka waya süpüla watüjüinjanain maʼin ‹olojoo wayuu›?
4 Naashin Jesuu ‹olojulii wayuu› na aküjüliikana pütchi (Mar. 1:17, NM). Chi atüjakai maʼin ejimejaa nnojotsü nujutüin neʼe tü kusukat shiroku tü wüinkat, nüchajaain maʼin sukuwaʼipa süpüla nütaʼülajatüin tü jimekalüirua, nüneeküin jalapüshinjatüin jee eere jouluin maʼin shia otta olojomaatüshi. Müinjatüjaʼa neʼe wakuwaʼipa sünain aküjaakat pütchi (Heb. 6:11).