Waküja «süchikü tü nükuaippakat Maleiwa sünain aluwatawaa»

1. ¿Kasa waaʼinrüinjatka maʼaka naaʼin Pablo?

¹ Anakajaʼa ayatüle pia sünain püküjüin pütchi nüchiki Maleiwa, müsü nünüiki Pablo nümüin Timoteo süka nuuʼulaküin shia palajana nüpüleerua (2 Tim. 4:⁠5.) Jamüsüjaʼa soʼu tü juyakat 47 otta 56 soʼu wakalia, apünüintuasü nukua Pablo sünain aküjaa pütchi wattapünaa. Aküjüshi Pablo «süchikü tü nükuaippakat Maleiwa sünain aluwatawaa», kojuyatuasü naaʼinrüin tia saashin tü ashajuushikat suluʼu tü karalouktakat Aluwataaushikana (Aluw. 23:11; 28:23). ¿Kasa waaʼinrüinjatka süpüla waainjüin tü naaʼinrakat Pablo?

2. ¿Kasa waaʼinrüinjatka süpüla waküjüin pütchi namüin na wayuukana?

² Waküja pütchi sainküin miichi. Wainma tü wayuu nnojotkat atüjaain naaʼu Maleiwa, wachajaainjatü sukuwaʼipa süpüla waküjüin pütchi namüin naʼya wayuukana. Jamüshiijaʼa waküjüle pütchi aliika jee shiale saawanoʼu sümaa rimiinkoʼu, aküjeena waya pütchi namüin na tooloyuu shikiipüʼükana napüshi. Waküjapa pütchi sainküin miichi, waashajaainjana amaa na wayuukana. Nnojoliire na wayuukana nepialuʼu, anasü washajüle nanülia suluʼu wanee karaloukta süpüla waleʼejüin mapa soʼu tü oora anakalü oʼu shia. Nnojoliirejeʼe wapüla na wayuu washajakana anülia, eeshiijaʼa süpüla wayamaajüin naya jee wapütüin wanee karaloukta nepialuʼu wanüikimaajatka.

3. ¿Jalooisü pümüin aküjaa pütchi eere jouluin wayuu jee eepünaale pia?

³ Waküja pütchi eere jouluin wayuu jee eepünaale waya. Wayakana aküjüliikana pütchi nüchiki Jeʼwaa, wekirajüin na wayuukana sünain nünüiki Maleiwa süpüla natüjaainjatüin saaʼu tü kekiiwaa shiimüinkat. Eeshii waküjüle pütchi kaayeruʼu jee pülaasapaʼa (Prov. 1:20, 21.) Aküjüshii waya pütchi sujuuna tü kasa waaʼinrawaikat soʼukaiwai. Anasüjeseʼe waaʼin süka ‹waküjüin waneepia süchikü tü nünüikükat Maleiwa› jee müsia wekeraajüin sünain waküjüin «süchikü tü nükuaippakat Maleiwa sünain aluwatawaa» (Aluw. 10:42; 17:17; 18:5; 20:20, 21, 24).

4. ¿Kasa akaaliinjeenaka waya süpüla waküjüin pütchi sümüin wayuu süpüshuaʼa otta jamüsü?

⁴ Eesü nnojorüle waküjeein tü pütchikat maʼaka japüleʼein waya jee isale wachiki shia sutuma wanee ayuulii, nnojoishi jashichin Jeʼwaa süka sülatüin tia wamüin (Sal. 103:14). Mülejeʼe wakuwaʼipa, wachunta nümüin Jeʼwaa nükaaliinjaiwa waya süpüla waküjüinjatüin pütchi sümaa yalayalain waaʼin (Aluw. 4:29, 31). Keeʼireere waaʼin kojutüin wamüin tü aʼyatawaa naapakat Maleiwa wamüin, anasü jülüjüle waaʼin soʼu wekirajaain sünain tü Wiwüliakat, sünain choʼujaain maʼin waküjüinjatüin pütchi sümüin wayuu (Filip. 3:⁠8). Müle shia watuma, aküjeena maʼin waya pütchi sümüin wayuu süka süpüshuaʼa waaʼin.

5. ¿Kasa waaʼinrüinjatka süpüla anain shikeraajia tü ashajünakat suluʼu tü karalouktakat Joel?

⁵ Saashin tü karalouktakat Joel, süpülapünaa süntüin tü nükaliakat Jeʼwaa keemaka maʼin, aʼyataajeena maʼin na wayuu suluʼukana tü nupueulosekat sünain aküjaa pütchi sümüin wayuu (Joel 2:2, 7-9). Makalaka ayata waya sünain tia aʼyatawaakat süka nnojoleerüin saaʼinnüin shia mapa.