Washata nakuwaʼipa na nünüikimaajanakana Maleiwa: Oseas

1. ¿Kaseerü paaʼinraka jülüjüle paaʼin anamiain Jeʼwaa sümaa nümüliajülin?

¹ Jülüjüle paaʼin anamiain Jeʼwaa sümaa nümüliajülin, eesüjaʼa maa müle paaʼin: «¿Kasache eeka süpüla taaʼinrüin nüpüleerua?» (Sal. 103:2-4; 116:12.) Süpüla jüüjüüin Oseas nümüin Jeʼwaa, eesü waneeirua kasa naaʼinraka nüpüleerua otta nnojoishi ayouktajüin nia. ¿Kasa paaʼinrajatka süpüla püshatüin nukuwaʼipa?

2. ¿Jamüshi anaka süpüla püshatüin nukuwaʼipa Oseas sünain aküjaa pütchi?

² Püküja maʼin pütchi suʼunnaa müliaa. Aluwataanüshi Oseas süpüla nüküjüin tü pütchikat sümüin tü poloosükat eʼiruku chajatka Israel. Palit neʼe na anoujüshii yalajanakana. Chi aluwataaikai Jeroboán II naainjüin maʼin tü kasa mojusükat nuʼupala Jeʼwaa otta nuʼwaajirüin maʼin na wayuukana tü paaʼachennii aainjuushika süka ooro nutuma Jeroboán I (2 Rey. 14:23, 24). Akaʼaya na aluwataakana nüchikumüin ayatsia naaʼinrüin tia otta ashutüna aaʼu tia pueulokalüirua soʼu juyaka 740 süpülapünaa wakalia. Aʼyataashi 59 juya Oseas nümüin Maleiwa mayaainjeʼe kottiraain nia sümaa wayuu manoulasat. ¡Toolokaiche aaʼin nia! Süpüla püshatüin nukuwaʼipa Oseas, ayatüinjachi pia sünain aküjaa pütchi, jaʼitairü pülayaain saaʼin wayuu puulia jee jaʼitaichi müliain pia (2 Tim. 4:⁠2).

3. ¿Jamüsü sütüjaanaka aaʼu amüliajülin maʼin Jeʼwaa sünainjee tü naainjakat Oseas?

³ Jülüja paaʼin amüliajülin maʼin Jeʼwaa. Müshi Jeʼwaa nümüin Oseas: «Acheküsü puʼwayuusein süchikuaʼa tü jierü apütakat paala pia» (Os. 1:2). Toolochon chi niʼirumakai Oseas sümüin Gómer, tü nuʼwayuusekat. Kachonsü shia süchikuaʼa, akatsaʼa naatain nashi sutuma. Niiteʼerüin Oseas süchikuaʼa mayaainjeʼe suuʼulaain paala nia. Tia, süpülajatü sütüjaanüin aaʼu niain Jeʼwaa wanee Maleiwa amüliajüi maʼin. Müsüjeseʼe kojuyatuain motuin naaʼin saainjala tü nupueulosekat (Os. 3:1; Roma 9:22-26). Püchajaa maʼin sukuwaʼipa süpüla pükaaliinjüin wayuu sünain anoujaa nünain Jeʼwaa chi Maleiwa amüliajüikai maʼin (1 Cor. 9:19-23).

4. ¿Kasa eeka süpüla paaʼinrüin nümüin Jeʼwaa saaʼujee anamiain nia pümüin?

⁴ Eeshii waneeinnua anoujüshii ooʼulaaka suulia wanee kasa keeʼireepuʼuka naaʼin jee aʼyatawaa walaaka maʼin. Naainjüin tia süpüla naküjüin maʼin pütchi. Eeshii waneeinnua maʼwayuusekana jee machonkana süpüla kooʼomüin natuma naʼyataain nümüin Maleiwa. Eesüjaʼa süpüla sujutuuin suluʼu pikii isain püchiki paaʼinrüin tü naaʼinrakat Oseas. Akatsaʼa ayatüle püchajaain sukuwaʼipa süpüla puwalaajüin nümüin Jeʼwaa tü naaʼinrakat piyaaluʼu otta punoujüle maʼin sünain nükaaliinjeechin pia nükajee chi Naaʼinkai, eeshi süpüla nuluwataain pia sünain wanee aʼyatawaa nnojotka antapünaain suluʼu pikii maʼaka alatüin shia nümüin Oseas (Mat. 19:26; Filip. 2:13).