«Waneesiaiwaʼaya neʼe sünüiki tü wayuukolüirua süpüshua sainküin mma»

11: 1-4, 6-9

Oʼunayaa müsü tü wayuukalüirua Babeljee süka nuʼwalakajaain Jeʼwaa sukuwaʼipa nanüiki. Maaʼulu yaa, nükotcholüin wainma «wayuu saʼakajee shiʼirukukat tü wayuukalüirua süpüshua, sainküinjee mmakat süpüshua». Nikirajüin naya sünain aashajawaa «pütchi wulesü» süpüla «kojutuinjatüin namüin nünülia Jeʼwaa otta süpüla paaʼinwajiraainjanain naya sünain aʼyatawaa nümüin» (Sof 3:9; Alat 7:9). Tü «pütchi wulesü» münakat yaa, shia tü shiimain ekirajünakat nüchiki Jeʼwaa otta süpüshuaʼa tü kasa nüküjakat sümüin wayuu sünain nikeraajüinjatüin shia. Aküjünüsü tia suluʼu tü Wiwüliakat.

Süpüla watüjain wanee anüikii naatajatü, nnojotsü kettaain neʼe watüjale waneirua pütchi. Müinjatü tü jülüjakat waaʼin maʼaka tü jülüjakat naaʼin na wayuu waashajaainjanakana anüiki. Müinjatia neʼe watuma waashajaapa tü «pütchi wulesü» nümaʼanajeejatkat Maleiwa, aʼwanajaainjatü tü suluʼukat waaʼin sutuma (Ro 12:2). Naainjain tia waneepia na wayuu suluʼukana nupueulose Maleiwa süpüla paaʼinwainjanain naya (1Co 1:10).