WAKUWAʼIPA SÜNAIN ANOUJAA

**Pikiraja wayuu süka tü karaloʼutakat Anainjatka atuma pukuwaʼipa waneepia süpüla katchinjatüin nanoula nünain Jehová otta nünain Jesús**

Katsüinjatü nanoula na wayuu wekirajakana süpüla naainjain tü anasükat noʼuluʼu Jehová (Heb 11:6). Eesü süpüla süntüin tü pütchikat suluʼumüin saaʼin wayuu süka tü karaloʼutakat Anainjatka atuma pukuwaʼipa waneepia. Eesü pütchi anaka maʼin suluʼujee tü Bibliakat, pütchi nayaawateetka aaʼu tü pütchi nekirajaakat, eesü pütchi nasakireetka aka naaʼin, ayaakua otta müsia video. Wakaalinjüle na wekirajüinkana süpüla anainjatüin nakuwaʼipa nuʼupala Maleiwa jee naʼaleewajaain maʼin nümaa, katchinjeerü maʼin nanoula (1Co 3:12-15).

Eeshii wayuu kapüleekana amüin naʼaleewajaain nümaa Maleiwa süka nnojoluin süpüla neʼrüin nia. Müsüjeseʼe wakaalinjüinjanain naya süpüla natüjain nüchiki Jehová otta neʼitaain naaʼin nünain.

SÜCHIKIJEE JÜNAJÜIN TÜ VIDEOKOT PÜKATCHINRA SUNOULA WAYUU NÜNAIN JEHOVÁ SÜKA TÜ KARALOʼUTAKAT «ANAINJATKA ATUMA PUKUWAʼIPA WANEEPIA», JUSOUTA SHIʼIPAJEE TÜÜ:

¿Jamüsü watüjaaka saaʼu yapain maʼin tü wawalakat süpüla shikirajüin tü wayuukot?
Süchikijee saashajeʼerüin tü wayuukot Isaías 41:10, 13, ¿kasa süsakitka anain shia tü wawalakat süpüla shiyaawatüin tia pütchikat?
¿Jamüsü saaʼin tü wayuukot süchikijee shiʼrüin tü videokot jee saashajeʼerüin tü pütchi suluʼukat tü Bibliakat?

Noutku wainma wayuu nnojotsü nayaawatüin saaʼu jamüin naapajiraaka nikii Jesús otta eeshii na nnojoliikana anoujain sünain naapajiraain nikii Jesús naaʼu (Gal 2:20, TNM). Müsüjeseʼe wakaalinjüinjanain na wekirajüinkana süpüla neʼitaainjatüin naaʼin sünain naapajiraain nikii Jesús waaʼu.

SÜCHIKIJEE JÜNAJÜIN TÜ VIDEOKOT PÜKATCHINRA SUNOULA WAYUU NÜNAIN JESÚS SÜKA TÜ KARALOʼUTAKAT «ANAINJATKA ATUMA PUKUWAʼIPA WANEEPIA», JUSOUTA SHIʼIPAJEE TÜÜ:

¿Jamüsü watüjaaka saaʼu yapain maʼin chi wawalakai süpüla nikirajüin chi wayuukai?
¿Jamüsü sukuwaʼipa shikirajia nutuma tü pütchikat «Pünaʼla sooʼomüin» süpüla nükaalinjain chi nikirajüinkai?
¿Jamüsü choʼujaaka nuʼuraajüin chi wayuu ekirajaakai sünain tü Bibliakat?