Emiʼijawaa saaʼu nneerü

¿Mojusüche ashaitaa saaʼu nneerü?

TÜ SÜMAKAT WAYUU.

Wainma wayuu jülüjakana aaʼin nnojoleerüin mojuin nakuwaʼipa nüshaitüle saaʼu nneerü sümaa nnojoluin naaʼinrüin wanee kasa mojushiika namüin na sülaülashiikana mma. Jamüshiijaʼa na sülaülashiikana mma nakumajüin sukuwaʼipa ashaitaa süka loteriia otta süpüshi tü nneerü akanajünakat sümaa naapüin shia süpüla sükaalinjünüin wayuu süka.

TÜ SÜMAKAT TÜ BIBLIAKAT.

Nnojotsü ashajünüin suluʼu tü Bibliakat süchiki ashaitaa saaʼu nneerü. Süküjapejeʼe wamüin waneirua pütchi wayaawata anainjee jamüin nünüiki Maleiwa süchiki tia.

Chi ashaitakai saaʼu nneerü nnojotsü kapülain naaʼin sukuwaʼipa wayuu, jama nükanajamaateein nneerü. Nnojotpejeʼe pansaain tia naaʼinrakat sümaa tü nümakat Jesús: «Jalia jia suulia suchuntaain jaaʼin wainma kasa» (Lucas 12:15). Ashaitüshi wanee wayuu shiiʼiree wainmainjatüin kasa nümaʼana. Mayaainjeʼe nnojolin nütüjaain saaʼu wanee wayuu nükanajeechire, naküjain na akumajakana sukuwaʼipa tü ashaitaakat wainmainjatüin kasa nakanajüinjatka na ashaitakana. Süka washireein wanee wayuu, wainma maʼin nneerü nükataajaka sünain ashaitaa suluʼu wanee casino. Nüshaitüle wanee wayuu saaʼu nneerü suchunteerü naaʼin wainmain kasa nümaʼana jee nükanajamaatüin nneerü.

Wanee wayuu ashaitakai saaʼu nneerü, kapülasü neʼe naaʼin nukuwaʼipa nümüiwaʼa süka nükanajeein tü nneerü nakataajakat na wane ashaitüshiikana. Anuupejeʼe tü waaʼinrajatkat saashin tü Bibliakat: «Ayataʼaya jaainjain tü aneetkalü atuma nakuwaʼipa na waneinnua. Nnojotsü shiainjatüin neʼe jaainjain tü aneetkalü atuma jukuwaʼipa» (1 Corinto 10:24). Saʼakajee tü Poloo Pütchi aapünakat nümüin Moisés eesü wanee makalü mayaa: «Nnojotsü keeʼireeinjatüin paaʼin [...] kasayaakaijeʼe» eekai nümaʼanain wanee wayuu (Éxodo 20:17). Chi wayuu akanajeekai, keeʼireesü naaʼin amüloulin nanneetse na wanee wayuukana süpüla nükanajüinjatüin shia.

Süküjain wamüin tü Bibliakat nnojoliinjanain wanoujain sünain kaʼletseenain waya sutuma wanee kasa pülasü. Jamüsüjaʼa sümaiwa, eejana waneinnua israelita manoulakana nünain Maleiwa otta naʼwaajüin neʼe «chi maleiwa Anakai atuma Sukuwaʼipa wayuu». ¿Jamüsü nünüiki Maleiwa süchiki tia? Anuu tü nümakat: «Ayatüsü jaaʼinrüin tü mojukat toʼuluʼu otta jüneeküin tü kasa tayoutakat» (Isaías 65:11, 12).

Suluʼu waneirua mma, süpüshi tü nneerü akanajünakat sünain tü ashaitaakat süpülajatü anoutaa koleejia otta nakaalinjünüin na maʼletsekana. Mayaainjeʼe sükaalinjünüin wayuu sükajee tia nneetkat, sotuinjatü waaʼin nnojoluin anain ashaitaa saaʼu nneerü süka suchunteerüin waaʼin wainma kasa, kapüleerüin waaʼin wakuwaʼipa wamüiwaʼa otta wakanajeein nneerü sümaa maʼyataain waya.

«Nnojotsü keeʼireeinjatüin paaʼin .[...] kasayaakaijeʼe» eekai nümaʼanain wanee wayuu (Éxodo 20:17).

¿Jameerü nukuwaʼipa wanee wayuu nüshaitüle saaʼu nneerü?

TÜ SÜMAKAT TÜ BIBLIAKAT.

Aküjünüsü suluʼu tü Bibliakat nachiki «na wayuu kachiiruakana aaʼin washirüü, oonooshii naya sümaa tü kasa ooʼulakünakalü aka naaʼin jee müsü sütaʼülakai saaʼin nakuwaʼipa tia makat, eʼrüshii naya müliaa sutuma tü kasa mojusü suchuntaakat naaʼin, jama nnojoluin nayaawatüin saaʼu nakuwaʼipa» (1 Timoteo 6:9). Chi wayuu ashaitakai saaʼu nneerü keeʼireejeerü naaʼin wainmain kasa nümaʼana otta aküjünüsü suluʼu tü Bibliakat wayoutuinjatüin shia süka mojuin maʼin shia nümüin Jehová (Éfeso 5:3).

Chi wayuu ashaitakai saaʼu nneerü, akanajamaateeshi nia, müsüjeseʼe kachiiruain naaʼin washirüü jee wainmeerü tü mülia niʼrakat sünainjee saashin tü Bibliakat. Chi wayuu makai akuwaʼipa shia naaʼinmaaka maʼin tü nneetkat, sutuma tia shapaajeerü naaʼin jee amojujaajeerü nukuwaʼipa nümaa Maleiwa. Süküjain tü Bibliakat wainmain tü müliaa neʼrakat na wayuu achuntaakana aaʼin wanee kasa naata kakorotshi (1 Timoteo 6:10).

Nnojotsü talatüin naaʼin wanee wayuu achuntaakai aaʼin wanee kasa naata kakorotshi, nnojotsü anain naaʼin sümaa tü kasa eekat nümaʼana. Anuu tü süküjakat Eclesiastés 5:10: «Chi wayuu keeʼireekai aaʼin washirüü, nnojotsü talatüin naaʼin sümaa tü kasa eekat nümaʼana, keeʼireesü naaʼin sooʼomüin».

Wattainna naalii wayuu makana kapükai aaʼin nakuwaʼipa sutuma nashaitüin saaʼu nneerü. Jamüsüjaʼa chaa Estados Unidos wainma maʼin na wayuu makana akuwaʼipa.

Saashin Proverbios 20:21 chi wayuu achuntaakai naaʼin wanee kasa naata kakorotshi eeshi süpüla washirüin nia, nnojoleetpejeʼe niʼrüin kasa anasü nutuma Maleiwa. Chi wayuu ashaitakai saaʼu nneerü wainmeerü nujuyaala, nnojoleerü kasain eein nümaʼana, maʼaleewainjeechi nia, nnojoleerü anain nukuwaʼipa niʼyataaleruʼu jee anain nukuwaʼipa sümaa nüpüshi. Nnojoleena waya eʼrüin müliaa sutuma ashaitaa saaʼu nneerü woonoole sümaa tü sümakat tü Bibliakat.

«Na wayuu kachiiruakana aaʼin washirüü, oonooshii naya sümaa tü kasa ooʼulakünakalü aka naaʼin jee müsü sütaʼülakai saaʼin nakuwaʼipa tia makat, eʼrüshii naya müliaa sutuma tü kasa mojusü suchuntaakat naaʼin, jama nnojoluin nayaawatüin saaʼu nakuwaʼipa» (1 Timoteo 6:9).