10 Paaʼinra tü aluwataanakalü anain pia

¿KASA SÜNAINPÜNAAKA?

Na wayuu lotokana akuwaʼipa sünain tü naaʼinrakat, kojutusü namüin tü kasa aluwataanakalü anain naya, nekeraajüin waneepia tü namakat otta naküjain waneepia tü shiimainkat. Sükajee müin nakuwaʼipa neitain maʼin naaʼin na napüshikana, naʼaleewainyuu jee nalaamain nanain.

¿JAMÜSÜ CHOʼUJAAKA PAAʼINRÜIN TIA?

Neʼrüle na wayuu kachoinkana pia laülaain paaʼin, nnojoleerü napülajüin puulia paaʼinrüin wanee kasa jee nnojoleena jashichin pümüin pujuʼiteere jalamüin yaa.

«Pülaüleʼerüle paaʼin jee paaʼinrüle tü aluwataanakalü anain pia, niʼitaajeerü naaʼin püshi jee püi pünain. Nnojotpejeʼe laülaainjatüin neʼe paaʼin noʼupalapünaa» (Sarahi).

TÜ SÜMAKAT TÜ WIWÜLIAKAT: «Anakaja müleka jiyaawatüle saaʼu tü jaaʼinrakat waneʼewaʼire jukua süpüla jütüjaainjatüin saaʼu müleka shiimainre sünain jaaʼinrüin tü nüchekakat [Maleiwa]» (2 Corinto 13:5).

¿KASA EEKA SÜPÜLA PAAʼINRÜIN?

Anuu tü paaʼinrajatkat süpüla neʼitaain naaʼin pünain na wayuu kachoinkana pia.

Püküja tü shiimainkat. Püküjale alawaa nnojoleerü jaralin anoujain pünüiki. Püküjale tü shiimainkat jaʼitairü mojuin putuma wanee kasa, neʼitaajeerü naaʼin na waneinnua pünain.

«Mapüleesat pümüin aküjaa tü shiimainkat anale tü paaʼinrakat, neʼitaajeetpejeʼe naaʼin na waneinnua pünain püküjale tü shiimainkat jaʼitairü nnojoluin anain tü paaʼinrakat» (Caiman).

TÜ SÜMAKAT TÜ WIWÜLIAKAT: «Keeʼireesü waaʼin lotuin wakuwaʼipa sünain süpüshuaʼaleʼeya tü kasa waaʼinrakat» (Hebreokana 13:18, TNM).

Paaʼinrüle tü eʼitaanakat püpüleerua. Chaa Estados Unidos, asakinnüshii kojuyashii wayuu aʼyataakana sünain aneeka na wayuu anakana süpüla aʼyatawaa suluʼu wanee konpainyiia. Naʼakajee 100 wayuu asakinnaka, 78 na aküjakana süchiki choʼujaain maʼin naaʼinrüinjatüin wanee wayuu tü eʼitaanakat nüpüleerua süpüla saapüin aʼyatawaa nümüin. Paaʼinrüle tü aluwataanakalü anain pia maaʼulu, mapüleejeerü pümüin paaʼinrüin shia mapa.

«Nütüjaa aaʼulu tashi sümaa tei wanaa sümaa taaʼinrüin wanee kasa süka taaʼin tamüiwaʼa, jama nnojoluin naluwanaajakuʼu namüin taya süpüla taaʼinrüinjatüin shia. Sutuma taaʼinramaatüin wanee kasa, neʼitaain maʼin naaʼin tanain» (Sarah).

TÜ SÜMAKAT TÜ WIWÜLIAKAT: «Tatüjaa aaʼuchi pia sünain sülanaʼaleeinjatüin sünain paaʼinrüin tü tachuntakat [pümüin]» (Filemón 21).

Nnojo shapaain paaʼin. Mapüleesat ayaawataa saaʼu shiiʼiratüle nuʼupünaa wanee wayuu. Nnojotpejeʼe wayaawatamaatüin saaʼu nülaüleʼerüle naaʼin.

«Nnojotsü neʼitaamaateerüin naaʼin pünain na kachoinkana pia. Naaʼinreetpajaʼa tia neʼrüle laülaain paaʼin sünain kasa süpüshuaʼa» (Brandon).

TÜ SÜMAKAT TÜ WIWÜLIAKAT: «Anakajaʼa müleka [...] nnojorüle süshapataain jaaʼin» (Colosas 3:12, TNM).