12 Piʼitaa püpüleerua tü püsaʼwateekalü amüin

¿KASA SÜNAINPÜNAAKA?

Tü püsaʼwateekalü amüin, nnojotsü püsaʼwateerüin neʼe shia sükajee pümüin: «Kasataalejeseʼe müin shia». Choʼujaasü pukumajüin sukuwaʼipa tia otta piʼyataain maʼin süchiirua.

Eesüjaʼa püsaʼwateerüle shia soʼu kojuya kaʼi, kashi jee shiale soʼu wainma juya. Müsüjeseʼe choʼujaain piʼitaainjatüin püpüleerua palajana waneirua kasa eeka süpüla püsaʼwatamaatüin.

¿JAMÜSÜ CHOʼUJAAKA PAAʼINRÜIN TIA?

Püsaʼwatüle tü paaʼinreekalü amüin, aneerü maʼin paaʼin, paaʼinweechi pia namaa na paʼaleewainkana otta talateerü maʼin paaʼin.

Atüjeechi pia süpüleerua pukuwaʼipa. Püsaʼwatüle waneirua kasa maalü, eesü süpüla piʼitaain püpüleerua waneirua kasa eeka süpüla piʼyataain maʼin achiirua. Paaʼinrüle tia, eejiraajeechi pia sümaa tü kasa alatawaikat pümüin maʼaka saaʼin püpüleeruaanüle aaʼin natuma na jimaʼaliijiraakana wanaa pümaa.

Paaʼinweechi pia namaa na paʼaleewainkana. Kamalainsü namüin na wayuukana aleewaa namaa eekai nalaüleʼerüin naaʼin otta eekai naʼyataain maʼin süpüla nasaʼwatüin tü keeʼireekat naaʼin. Wanee kasa aleewaka maʼin anainjee wayuu shia paaʼinwale naya sünain aʼyatawaa süpüleerua asaʼwataa tü neʼitaakat napüleerua.

Talateerü maʼin paaʼin. Wanaa sümaa püsaʼwatüin tü keeʼireekat paaʼin talatüsü maʼin paaʼin.

«Kamalainsü maʼin tamüin teʼitaain tapüleerua tü tasaʼwateekalü amüin, jama taʼyataajeechin maʼin süchiirua. Anasü maʼin paaʼin püsaʼwatapa tü piʼyataakat maʼin achiirua otta jülüjale paaʼin tü kasa paaʼinrakat süpüla püsaʼwatüin shia. Shiasaʼa püsaʼwatapa shia, eeshijaʼa pümüle: ‹Yaapalataayai shia tasaʼwatüin›» (Christopher).

TÜ SÜMAKAT TÜ WIWÜLIAKAT: «Chi eekai jülüjain naaʼin tü joutaikat, nnojoleechi apünajüin otta chi eekai nünanajüin sümüin tü sirumakat, nnojoleechi atpajüin» (Eclesiastés 11:4).

¿KASA EEKA SÜPÜLA PAAʼINRÜIN?

Anuu tü paaʼinrajatkat süpüla püsaʼwatüin tü piʼitaakat püpüleerua.

Püneeka tü püsaʼwateekalü amüin. Püshaja süpüshuaʼa tü püsaʼwateekalü amüin, shiasaʼa mapa püneeka tü püsaʼwateekalü amüin palajana otta tü süchikumüinjatkat.

Pukumaja sukuwaʼipa. Maa putuma sukuwaʼipa tü püsaʼwateekalü amüin.

• Piʼitaa jeʼrainjatüin sükalia püsaʼwatüinjatka oʼu shia.

• Püshaja jamüinjatüin sukuwaʼipa putuma.

• Jülüja paaʼin kaseerüin kapüleein atuma shia otta kasainjatüin paaʼinrüin süpüla ayatüinya püsaʼwatüin shia.

Puʼttamaata sünain. Nnojotsü choʼujaain pansaainjatüin maʼin putuma tü sukuwaʼipainjatkat. Shia jülüja neʼe paaʼin kasainjatüin paaʼinrüin süpüla püsaʼwatüin tü püsaʼwateekalü amüin otta paaʼinramaata shia. Shiasaʼa paaʼinrapa tia, jülüja paaʼin kasain anain putuma otta kasain punoutüinjatüin süpüla püsaʼwatüin shia.

TÜ SÜMAKAT TÜ WIWÜLIAKAT: «Chi wayuu jülüjakai aaʼin palajana tü kasa naainjainjatkat, aneerü sukuwaʼipa nutuma» (Proverbios 21:5).