Nnojoluinjatü yaletüin naaʼin

¿JARAT TÜ NUKUWAʼIPAKAT CHI WAYUU NNOJOIKAI YALETÜIN AAʼIN?

Chi wayuu nnojoikai yaletüin aaʼin, kojutusü wayuu nümüin. Nnojoishi aʼwaataain nia suluʼu nukuwaʼipa otta nnojotsü nüchajaain sukuwaʼipa süpüla kapülainjachin aaʼin nia sümüin wayuu. Kapülasü naaʼin nakuwaʼipa na waneinnua otta anashiisü nümüin nüshatüin kasa anasü sünainjee nakuwaʼipa.

Eeshii wayuu eekai jülüjain naaʼin malain na wayuu nnojoliikana yaletüin aaʼin. Nnojotpejeʼe shiimain tia. Jamüshijaʼa chi wayuu nnojoikai yaletüin aaʼin, eʼrüshi kasa anasü sünainjee niyaawatüin saaʼu eein tü kasa nuʼtchejaakalü amaa otta eein tü isakat nüchiki.

¿JAMÜSÜ ANAKA NNOJORÜLE YALETÜIN NAAʼIN WANEE WAYUU?

• Kaʼaleewainshi nia sünainjee. Saashin tü karaloʼutakat La epidemia del narcisismo, na wayuu nnojoliikana yaletüin aaʼin nountuin anajiraain naya sümaa wayuu otta anasü namüin yootoo namaa na waneinnua.

• Aneerü nakuwaʼipa na tepichikana nnojorüle yaletüin naaʼin. Nnojorüle yaletüin naaʼin chi püchonkai, aneerü nukuwaʼipa maaʼulu otta watta kaʼi. Aneerü nukuwaʼipa nüchajaapa wanee aʼyatawaa miyoʼupa nia. Anuu tü nüshajakat wanee tottoot, Leonard Sax nünülia: «Müleka yaletüle naaʼin wanee jimaʼai, eesü nnojoleerüle saapünüin nümüin wanee aʼyatawaa, aapüneerüinjaʼa tia aʼyatawaakat nümüin chi jimaʼai nnojoikai yaletüin aaʼin otta kojutukai amüin nünüiki chi aapüinjachikai aʼyatawaa nümüin».a

¿JAMÜINJATÜ NEKIRAJIA NA PÜCHONNIIKANA PUTUMA?

Pükaalinja naya süpüla nnojoluin pülayaain naaʼin

TÜ SÜMAKAT TÜ WIWÜLIAKAT: «Nuʼwaataale maʼin wanee wayuu suluʼu anain maʼin nukuwaʼipa naashin sümaa motuin naaʼin wayuuin neʼe nia, emeejiraashi naaʼin nümüiwaʼa sükajee tia» (Galacia 6:3, TNM).

• Jülüjaa paaʼin tü pümakat namüin: «Ekeraajeerü süpüshuaʼa tü keeʼireekat paaʼin». «Puunteerü paaʼinrüin süpüshuaʼa tü keeʼireekat paaʼin». Mayaainjeʼe müin anayaakai saaʼin müle pünüiki namüin na püchonniikana, pütüjaa aaʼu nnojoleerüin shikeraajüin süpüshuaʼa tü keeʼireekat naaʼin. Shia anaka aluʼu naʼyataale na püchonniikana süchiirua wanee kasa nnojoleetka isain nachiki.

• Püküja namüin kasain maʼin tü anakat natuma. «Atüjataʼaleeshijaʼa maʼin pia» pümüle nümüin chi püchonkai, yaleteerü neʼe naaʼin. Anasü püküjale nümüin kasain maʼin tü anakat nutuma.

• Jülüja paaʼin jeʼrainjatüin namaʼa sünain redes sociales. Eeshii na wayuu aʼwaataakana suluʼu nakuwaʼipa suluʼupünaa redes sociales, shia keeʼireeka naaʼin neʼnnaajünüin natuma na waneinnua süka natüjain maʼin süpüleerua waneirua kasa naashin. Yaletüsü maʼin naaʼin na wayuu aaʼinrakana tia.

• Pikiraja na püchonniikana süpüla «nnojotsü taaʼinjeein» namüinjanain. Mojule wanee kasa nutuma chi püchonkai, pükaalinja nia süpüla niyaawatüin saaʼu mojuin tü naaʼinrakat.

Pikiraja naya süpüla kojutuinjatüin wanee kasa namüin

TÜ SÜMAKAT TÜ WIWÜLIAKAT: «Jiiʼiyata sünain kojutuin jümüin tü aaʼinnakat jüpüleerua» (Colosas 3:15, TNM).

• Tü nukumajalakat Maleiwa. Ekirajünüinjana na tepichikana sünain kojutuinjatüin namüin tü nukumajalakat Maleiwa. Pikiraja naya süpüla nayaawatüinjatüin saaʼu choʼujaain wamüin tü joutai wasanalakat, tü wüinkat otta tü eküütkat süpüla katüinjatüin woʼu. Pikirajüle naya sünain tia, kojuteerü maʼin namüin tü kasa nukumajalakat Maleiwa otta atüjeena aapaa analuʼut saaʼu tia kasakalüirua.

• Tü anakat sünain sukuwaʼipa wayuu. Pikiraja püchon süpüla jülüjain naaʼin nayain kojutuleein na waneinnua nuulia. Pikiraja nia sünain shiain anain ashataa tü anakat sünain nakuwaʼipa na waneinnua suulia nuchumüjakuʼu nümüin saaʼu tia.

• Pikiraja naya süpüla natüjain aapaa analuʼut. Pikiraja püchonnii süpüla naapüin analuʼut saaʼu wanee kasa süka naaʼin. Kojutule nümüin wanee wayuu tü aaʼinnakat nüpüleerua, nnojoleerü yaletüin naaʼin.

Pikiraja püchonnii sünain akaalinjaa na waneinnua

TÜ SÜMAKAT TÜ WIWÜLIAKAT: «Nnojo yaletayaain jukuaippa suʼupala wayuu. Shia anaka aluʼu kojutule napüshua na juwalayuukana jütüma. [...] Sünain kapülain jaaʼin nakuaippa na juwalayuukana, nnojo kapülain jaaʼin jukuaippa neʼe jümüiwa» (Filipos 2:3, 4).

• Pikiraja püchonnii süpüla nakaalinjain sünain aaʼinraa wanee kasa piichipaʼa. Nnojoire puuʼulaain püchon sünain aaʼinraa wanee kasa piichipaʼa, müshi pümakai aaʼin nümüin: «Nnojotsü püpülajatüin tüü, wayuu kapülainshi pia». Akaalinjainjachi nia sünain aaʼinraa wanee kasa piichipaʼa süpülapünaa nüshaitüin. Püküja nümüin jalouijeechin nia sümüin wayuu naaʼinrüle tü aʼyatawaa eʼitaanakat nüpüleerua otta kojuteechin nia sutuma wayuu sünainjee tia.

• Pikiraja naya sünain akaalinjaa na waneinnua. Laülaajeerü naaʼin chi püchonkai kapürale naaʼin nakuwaʼipa na waneinnua. Jülüja paaʼin nümaa chi püchonkai jaralin choʼujaain amüin kaalinwaa otta tü eekat süpüla naaʼinrüin püchon süpüla nükaalinjain nia. Nükaalinjale chi püchonkai wanee wayuu, «anasü maʼin tü paaʼinrakat» püma nümüin otta pütütüleʼera naaʼin süpüla ayatüin naaʼinrüin tia.