Atüjainjana ekeraajaa tü aluwataanakalü anain naya

¿JARAT TÜ NUKUWAʼIPAKAT CHI WAYUU EKERAAJAKAI TÜ ALUWATAANAKALÜ ANAIN NIA?

Nikeraajüin süpüshuaʼa tü aluwataanakalü anain nia jee nnojoishi kamaʼaku müin nia sünain.

Eeshii süpüla natüjain na tepichikana aaʼinraa tü aluwataanakalü anain naya jaʼitairü nnojoluin jeʼrain nouyase. Anuu tü sümakat wanee karaloʼuta: «Soʼujee polooin jaʼralimüin kashi wanee joʼuu, eeshi süpüla nükaalinjain sünain aaʼinraa waneirua kasa. Shiasaʼa poloopa mekiisatmüin kashi nia, nükaalinjeein nashi jee nei sünain tü naaʼinrakat. Suluʼu waneirua mma, ekirajünüshii na tepichikana sünain akaalinjaa piichipaʼa, eesü naainjüle tia soʼujee jaʼralin jee akaratshin nouyase. Jaʼitakajeʼe na tepichikana, anasü natuma tü kasa naainjakat nepialuʼu» (Parenting Without Borders [Padres sin fronteras]).

¿JAMÜSÜ ANAKA NIKERAAJÜLE WAYUU TÜ ALUWATAANAKALÜ ANAIN NIA?

Eeshii wayuu eekai nakatalaain noulia nashi jee nei, shiasaʼa neʼrapa namüliala, aleʼejaashii nachikuaʼa kepiain sümaa nei otta nashi. Makaʼa naya shia süka nnojoluin nekirajünatüjülin sünain eisattaa nanneetse, sünain akaalinjaa chaa nepialuʼu otta sünain ekeraajaa tü aluwataanakalü anain naya.

Anashii pikirajüle na püchonniikana maaʼulu süpüla natüjain süpüleerua nakuwaʼipa miyoʼuyuupa naya. Anuu sünüiki wanee karaloʼuta: «Nnojotkajasaʼa keeʼireein paaʼin ayatüin chi püchonkai matüjain süpüleerua nukuwaʼipa nikeraajaleepa 18 juya, eejiraainjachipa nia nümüiwaʼa süpüla nüntüin sünain tü choʼujaajeetkat nümüin» (How to Raise an Adult [Cómo preparar a su hijo para la edad adulta]).

¿JAMÜINJATÜ NEKIRAJIA NA PÜCHONNIIKANA PUTUMA?

Puluwataa naya sünain aaʼinraa kasa piichipaʼa

TÜ SÜMAKAT TÜ WIWÜLIAKAT: «Eʼreechi pia kasa anasü piʼyataale maʼin süchiirua wanee kasa» (Proverbios 14:23, Nueva Versión Internacional).

Na tepichikana nakaalinjeein maʼin nashi otta nei sünain aaʼinraa wanee kasa nepialuʼu. Anashii puluwataale naya sünain aaʼinraa waneirua kasachein.

Eeshii wayuu nnojoliikana aluwataain nachonnii sünain aaʼinraa wanee kasayaakaijeʼe süka wainmain tareea eʼitaanaka napüleerua koleejialuʼu naashin otta nnojotsü neʼitaweein sooʼomüin kasa napüleerua.

Eesü anale maʼin nakuwaʼipa koleejialuʼu na tepichi akaalinjakana sünain aaʼinraa waneirua kasa nepialuʼu. Müsü nakuwaʼipa süka nekiralaain sünain ekeraajaa tü aluwataanakalü anain naya. Anuu tü sümakat wanee karaloʼuta: «Nnojoliire waluwataain na wachonniikana sünain aaʼinraa waneirua kasa mayaapejeʼe nakaalinjeein waya, jülüjeerü naaʼin nnojoluin choʼujaain akaalinjaa na waneinnua [...]. Otta aneerü namüin saainjünüin kasa süpüshuaʼa nooʼopünaa» (Parenting Without Borders).

Maʼaka süküjain tia karaloʼutakat, waluwataale na tepichikana sünain aaʼinraa waneirua kasa piichipaʼa, atüjeena naya süpüleerua akaalinjaa na waneinnua otta nnojoleerü anain namüin saainjünüin kasa süpüshuaʼa nooʼopünaa. Nayaawateerü aaʼu naʼyanaajiraain namaa na kachonniikana naya, müsüjeseʼe nekeraajüinjatüin tü eʼitaanakat napüleerua nepialuʼu.

Pükaalinja na püchonniikana süpüla natüjaain saaʼu nasoutajanain saaʼu tü kasa mojusü naaʼinrakat

TÜ SÜMAKAT TÜ WIWÜLIAKAT: «Paapaa sümaa tü achiaanakalü oulia pia otta pücheka sunouteʼennüin pukuwaʼipa süpüla kekiin maʼin pia mapa» (Proverbios 19:20).

Müleka naaʼinrüle wanee kasa mojusü chi püchonkai, nnojo puunjulajüin süchiki tü naainjalakat. Eeshii süpüla nasoutuin na tepichikana saaʼu wanee naainjala. Jamüsüjaʼa neewainre chi püchonkai wanee kasa nnojotka nükoroloin, eeshi süpüla «nnojotsü taainjeein» nümüin nümüin chi kakorotkai jee nüchajaale sukuwaʼipa süpüla nuwalaajüin tü kasa neewainkat.

¿Jamüsü aneetka nakuwaʼipa na püchonniikana nasoutule saaʼu wanee kasa mojusü naaʼinraka?

• Naküjeerü waneepia tü shiimainkat otta «taya kasitka» meena naya mojule wanee kasa natuma.

• Nnojoleerü neʼitaain wayuu naata saaʼu naainjala.

• Nnojoleena kanüikiyaain naya suulia aaʼinraa wanee kasa.

• Atüjeena naya süpüleerua «nnojotsü taaʼinjeein» namüinjanain.