Süpüla anain punoula
Aküjünüsü suʼttiajee karaloʼutakat tüü, wainmain na kojutukana amüin tü Wiwüliakat süka nayaawatüin saaʼu nünüikin shia Maleiwa. Na aashajeʼerakana shia jee na aainjakana tü sümakat, neʼraajüin nukuwaʼipa Maleiwa otta nayaawatüin saaʼu kasapülajanain eeka naya.
Eeshi chi «Naaʼinkai Maleiwa suluʼu naaʼin» wanee wayuu saashin tü Wiwüliakat jaʼyale saaʼu naatain nukuwaʼipa (Judas 18, 19). Nnojoire chi naaʼinkai Maleiwa suluʼu naaʼin wanee wayuu, nnojotsü niʼitaain naaʼin nünain Maleiwa süka nütüjaleein naashin. Akaajasaʼa eere chi naaʼinkai Maleiwa suluʼu naaʼin wanee wayuu, jüüjüüshi nia sümüin tü nuluwataakalü anain Maleiwa (Éfeso 5:1).
AʼATAPAJEESHII WAYA KASA ANASÜ
TÜ SÜMAKAT TÜ WIWÜLIAKAT: «Mojule paaʼin wanaa sümaa müliain pia, matsüinjeerü paaʼin» (Proverbios 24:10).
TÜ SÜNAINPÜNAAKAT. Nnojorüle waaʼin sutuma wanee kasa alataka wamüin, iseerü wachiki wakuwaʼipa. Akaajasaʼa jülüjale waaʼin tü weʼreetkat mapeena, yalayaleerü waaʼin süpüla eejiraain waya sümaa tü kasa alatakat wamüin. Müle wakuwaʼipa, soteerü waaʼin sülatapünaasüin neʼe tü wamülialakalü otta aneerüin wakuwaʼipa süchikijee tia.
TÜ PAAʼINRAJATKAT. «Aneechiaʼaya taya mapa», meesü pünüiki, jaʼitairü sülatüin wanee kasa pümüin. Nnojo süshapataain paaʼin saaʼu kaseerüin mojuin akuwaʼipa jee nnojo paʼatapajüin ayatashaaneerüin wanee kasa maʼaka tü jülüjakat paaʼin. Shia anaka aluʼu piʼyataale maʼin süchiirua tü kasa paainjeekalü amüin. Anasü jülüjale paaʼin eein süpüla sülatalaʼa sümüin wanee kasa (Eclesiastés 9:11). Tü wakumajakalü akuwaʼipa, eesü süpüla anaʼleein maʼin shia mapa. Aküjünüsü suluʼu tü Wiwüliakat müin sukuwaʼipa tia maʼaka saaʼin wanee pünajüt. Müsü mayaa: «Püpünaja tü püwaüyainkat wattaʼa maalü sünainmüinreʼeya aliika, nnojo peemeraain suulia, süka jamüin, nnojoluin pütüjaain saaʼu jaleerüin süsotüin, yaʼayaa, chayaa jee süsoteerüle piamaleʼeya» (Eclesiastés 11:6).
PIYAAWATA SAAʼU TÜ SÜMAKAT TÜ WIWÜLIAKAT
TÜ SÜMAKAT TÜ WIWÜLIAKAT: «Pükaalinja taya süpüla tayaawatüin saaʼu pünüiki [...]. Süpüshuaʼa tü pütchi pümakat, shiimainshaata shia» (Salmo 119:144, 160).
TÜ SÜNAINPÜNAAKAT. Aküjünüsü suluʼu tü Wiwüliakat tü kasa wasakirakat maʼin achiirua. Maʼaka saaʼin tüü:
¿Jamakuwaʼipalii waya?
¿Kasapülajana eeka waya?
¿Jalamüinsüche oʼunuin naaʼin na outushiikana?
¿Kasapülajanache wakumajünaka?
Süpaʼa Mmakat süpüshuaʼa wainma wayuu ekirajaaka sünain jamüin sünüiki tü Wiwüliakat shiʼipajee tia asakinnakalü anain. Sünainjee tia, talatajüshii maʼin naya maaʼulu.
TÜ PAAʼINRAJATKAT. Pikirajaa sünain tü Wiwüliakat, piyaawateetka saaʼu tü sümakat. Puchunta nümüin wanee aküjai pütchi nüchiki Jeʼwaa nükaalinjai pia sünain ekirajawaa. Eeshi süpüla piʼrajaain tü paajinakat suluʼu Internet jw.org jee shiale puʼunuin eemüinre woutkajaain. Nnojoleerü achuntunuin nneerü pümüin.
SOOʼOMÜIN TÜ SÜMAKAT TÜ WIWÜLIAKAT
Püchajaa suluʼu jw.org jee pünaja tü videokot ¿Jamüshii wekirajaainjanaka sünain tü Wiwüliakat?, eesü shia suluʼu 880 anüikii.
WAYAAWATÜINJATÜ SAAʼU CHOʼUJAAIN MALEIWA WAMÜIN
«Anataʼaleeshiijaʼa na wayuu eʼrakana choʼujaain Maleiwa namüin» (MATEO 5:3).
WEʼRAAJA CHI MALEIWA SAASHAJAAKAI ACHIKI TÜ WIWÜLIAKAT
«Müleka jürütkaale nünainmüin Maleiwa, arütkaajeechi nia jünainmüin» (SANTIAGO 4:8).
PAASHAJEʼERA TÜ WIWÜLIAKAT JEE PÜSAKIREʼERA PAAʼIN SÜNAIN
«Anataʼaleeshijaʼa chi wayuu [aaʼinmaakai] tü nünüikikat Jeʼwaa.a Naashajeʼerawalin shia soʼukai jee saʼwai sümaa nüsakireʼerüin naaʼin sünain. [...] Aneerü sukuwaʼipa süpüshuaʼa tü kasa naainjakat» (SALMO 1:1-3).
a Jeʼwaa nünülia Maleiwa saashin tü Wiwüliakat.