4 ¿Nukumajüinche waya Maleiwa süpüla weʼrüinjanain wamüliala?
¿Jamüsü watüjaainjatka saaʼu tia?
Watüjaale saaʼu tia, aneerü waaʼin mayaainjeʼe sülatüin kasa mojusü otta waʼatapeerü sülatüin kasa anasü.
Jülüjataa paaʼin tüü
¿Kasache anaka aluʼu anain maʼin tü Mmakat nutuma Maleiwa sümaa müliain maʼin waya suluʼu?
Naashin waneinnua wayuu manoujainsalii, eʼrüshii waya wamüliala sutuma nnojoliin kasajanain waya nümüin Maleiwa otta eeshii namüle nnojolin eein chi Maleiwakai. Naashin naya wayuukana, apünüinsü kasa wayaawataka sünainjee weʼrüin wamüliala: 1) isasü nüchiki Maleiwa najaʼttirüin wamüliala, 2) nnojotsü najaʼttireein shia otta 3) nnojoishi eein chi Maleiwakai.
¿Kepisüche tia?
PÜTÜJEERE SOOʼOMÜIN
Pünaja suluʼu jw.org tü videokot ¿Jamüsü wanoujüinjatka sünain tü sümakat tü Wiwüliakat?
Tü sümakat tü Wiwüliakat
Nnojoishii nukumajüin waya Maleiwa süpüla weʼrüinjanain wamüliala
Shia keeʼireeka naaʼin talatüinjatüin waaʼin.
«Tatüjaaitpa aaʼu anain maʼin namüin talatüin naaʼin otta naainjain kasa anasü kataiwaʼaya noʼu; otta müshiʼiya napüshuaʼa na wayuukana eküinjana, asüinjana otta talatüinjatü naaʼin sümaa tü kasa anasü neʼrakat sünainjee naʼyataain maʼin. Tia, nüsülajala Maleiwa» (ECLESIASTÉS 3:12, 13).
Anashaatasü nakumajia nutuma Maleiwa na palajanakana wayuu otta naapüin süpüshuaʼa tü choʼujaakat namüin süpüla talatüinjatüin naaʼin
Anainjatiaa nakuwaʼipa namaʼaleʼeya na nooʼuliwoʼukana.
«Nümakalaka chi Maleiwakai wane pütchi analuʼut namüin: ‹Anakaja kachonniire jia, joulüiwa na juuʼuliwoʼukana sainküin mmakat süpüshua süpüla laülaainjanain jia saaʼu›» (GÉNESIS 1:28).
Nnojoishi oonooin Adán otta Eva sümaa nünüiki Maleiwa
Eʼrüshii naya namüliala saalinjee tia namaʼaleʼeya na nooʼuliwoʼukana.
«Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (ROMA 5:12).a
Nnojoishii nukumajüin waya Maleiwa süpüla laülaain waya saaʼu wakuwaʼipa
Maʼaka isain wachiki wasanalüin waaʼin shiroku wüin, isasia neʼe wachiki waluwanaajiraain saaʼu wakuwaʼipa.
«Tatüjaa aaʼu nnojolin laülaain chi wayuukai saaʼu nukuwaʼipa nümüiwaʼa. Nnojoireejaʼa niainjachin oʼunirüin nukuwaʼipa nümüiwaʼa» (JEREMÍAS 10:23).
Nnojotsü nücheküin Maleiwa wapüleerua müliainjanain waya
Nüküjain tü waaʼinrajatkat suulia müliain waya.
«Poonoole sümaa tü taluwataakalü anain, jimateerü paaʼin maʼaka saaʼin wanee süchi» (ISAÍAS 48:18).
a Ashajünüsü suluʼu tü Wiwüliakat tü pütchikat «kaainjalaa» süpüla süküjünüin süchiki wanee kasa mojusü saaʼinraka wayuu jee shiale süpüla süküjünüin nnojoluin lotuin sukuwaʼipa wayuu süpüshuaʼa.