¿Jamüsüche eeka müliaa, laülawaa jee outaa?

Eesü müliaa sünainjee naainjala na wayuu kooʼuliwoʼukana waya

«Sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (ROMA 5:12).

Nukumajala Maleiwa na wayuu kooʼuliwoʼukana waya, Adán sümaa Eva. Nnojotsü mojuin tü jülüjakat naaʼin jee nnojoishii ayuulin naya. Neʼitaain naya suluʼu wanee mma anasü, Edén sünülia. Nüküjain Maleiwa namüin eein süpüla neküin süchon tü wunuʼuliakalüirua, nnojotpejeʼe süpüla neküinjatüin süchon wanee wunuʼu. Niküin Adán sümaa Eva süchon tü wunuʼu apülajünakat noulia, kaainjalaka naya sünainjee tia (Génesis 2:15-17; 3:1-19). Süchikijee nnojoluin noonooin sümaa nünüiki Maleiwa, ojutunushii naya suluʼujee tü mma anasükat. Müliakalaka naya süchikijee tia. Akaʼaya na nachonniikanaya müliashii naya, laülaashii naya jee outushii naya mapa (Génesis 3:23; 5:5). Makalaka eein müliaa, laülawaa jee outaa sünainjee naainjala Adán sümaa Eva.

Kooʼomüinsü wamüliala nutuma chi Yolujaakai

«Tü wayuu manoujainsatkalüirua suluʼu mmakat süpüshua, nia aluwataaka saaʼu chi Yolujaakai» (1 JUAN 5:19).

Chia Yolujaakai, Satanaa münüshi nia, meʼrujusai nia, eʼrüijaashi nia wayumüin nümüin Maleiwa (Juan 8:44; Alateetkat Mapeena [Apocalipsis] 12:9). Shiasaʼa joo mapa eeshii waneinnua meʼrujusalii wanaawakana aaʼin nümaa Satanaa, yolujaa münüshii naya. Yolujaakana naainnua nemeejüin na wayuukana jee nakayaleʼerüin naya nuulia chi Maleiwakai. Nootuin na wayuukana süpüla naaʼinrüin kasa mojusü (Salmo 106:35-38; 1 Timoteo 4:1). Anasü maʼin nümüin Satanaa otta namüin na yolujaakana müliain wayuu.

Eesü wachajaarale wooʼomüin müliain waya

«Nüpünajüle wanee wayuu, shia nütpajaka achon tü nüpünajakat» (GALACIA 6:7).

Watta saalii tü kasa müliakalü atuma waya. Eeshii müliale waya sutuma waleʼeruʼuin tü kaainjalaakat, sutuma tü kasa mojusü naaʼinrakat Satanaa otta sutuma tü kasa mojusü alatakat saaʼupünaa tü mmakat. Eeshi wayuu eekai müliain sutuma nüchajaalain shia. Jamüsüjaʼa nnojorüle anain nutuma sukuwaʼipa tü kasa naaʼinrakat, eʼrüshi nia müliaa sünainjee. Wanee wayuu eekai naaʼinrüin kasa anasü, eʼrüshi nia kasa anasü sünainjee. Jamüshijaʼa wanee wayuu eekai kaʼwayuusein, lotule nukuwaʼipa, tütüle nia sünain aʼyatawaa, aipüraire nia wayuu, aire nüpüla nuʼwayuuse jee nüchonnii, eʼrüshi nia kasa anasü sünainjee jee anasü nukuwaʼipa sümaa nüpüshi. Akaataajaʼa chi wayuu eekai nüshaitülin saaʼu nneerü, nüsülin otta shokulain mojeerü nukuwaʼipa jee mojeerü sukuwaʼipa nüpüshi. Kekiire maʼin waya, oonooshii waya sümaa nünüiki Maleiwa. Nücheka achikit wapüleerua weʼrüinjanain kasa anasü otta nnojoluinjatüin shapaain waaʼin (Salmo 119:165).

Alüʼütsü sükalia sajaʼttüinjatüin tü kasakat süpüshuaʼa

«Sülüʼütpa sükalia sajaʼttüinjatüin tü kasakat süpüshua [...] Eejeerü wainma wayuu eekai kapülain naaʼin nakuaippa neʼe namüiwa, eekai kachiiruain naaʼin tü washirüükat, [...] eekai moonooloin sümaa nanüiki nashi je nei, [...] eekai maaʼin naaʼin sümaa jashiee, je eekai nayouktüin tü anasükat» (2 TIMOTEO 3:1-5).

Maaʼulu yaa, wainma na wayuu makana akuwaʼipa maʼaka saaʼin tia aküjünatüjütkalia. Sutuma müin sukuwaʼipa wayuu, wayaawata aaʼu sülüʼülüin süpüla sajaʼttüin tü kasakat süpüshuaʼa. Saashin tü Nünüikikat Maleiwa sülüʼütpa süpüla sajaʼttüin tü kasakalüirua, alinjatü maʼin jamü, akutkujaainjatü tü mmakat otta jouluinjatüin maʼin ayuulii (Mateo 24:3, 7, 8; Lucas 21:10, 11). Sutuma tia kasakalüirua jee sutuma tü outaakat, müliasü maʼin saaʼin wayuu.