Aneerü wakuwaʼipa mapeena
Nüküjain chi Maleiwakai aneerüin wakuwaʼipa mapeena. Najaʼttireerü tü müliaakat otta aneerü maʼin nutuma tü mmapaʼakat (Salmo 37:11). ¿Jamüsü watüjaaka saaʼu shiimain tia? Watüjaa aaʼu süka «nnojoluin wayuuin Maleiwa süpüla nüküjainjachin naʼalain» (Números 23:19). Anuu waneirua kasa naaʼinrajatka chi Maleiwakai wapüleerua.
Ajaʼttinneena nutuma Maleiwa na mojulaashiikana
«Nakooʼomüinraapa maʼin na mojulaakana maʼaka shimiyoʼulaain tü mojuuikat otta nakooʼomüinraapa na eʼrüliikana wayumüin maʼaka suʼwuiraain tü süsiikat wunuʼu, süpülajatü najaʼttinnüin süpüla kaʼikat süpüshuaʼa» (SALMO 92:7).
Maʼaka waküjain paalapa suluʼu tü wane pütchikat, akooʼomüinraasü maʼin tü kasa mojusükat. Nnojotsü ponuinjatüin waaʼin tia, süküjatüjülia tü Bibliakat suluʼu 2 Timoteo 3:1-5 mojulaainjanain maʼin na wayuukana sülüʼütpa süpüla sajaʼttüin tü kasakat süpüshuaʼa. Najaʼttireenapejeʼe Maleiwa na nnojoliikana aʼwanajaweein nakuwaʼipa. Nayeena neʼe apütaaka na wayuu oonookana sümaa nünüiki Maleiwa. «Nayeena kepiaka suluʼu tü mmakat süpüla kaʼikat süpüshuaʼa na lotokana akuwaʼipa» (Salmo 37:29).
Ajaʼttinneechi Satanaa nutuma Maleiwa
«Chi Maleiwa aapakai wane anaa jümüin, ayamüleechi Satanás nütüma» (ROMA 16:20).
Ajaʼttinneena napüshuaʼa na mojulaashiikana. Ajaʼttinneechi Satanaa namaa na yolujaakana. Eejeetkalaka jimataa aaʼin yaa saaʼu tü Mmakat. Anuu nünüiki chi Kakumajalakai waya: «Nnojoleena [jaraliin] eimmolojunuin» (Miqueas 4:4).
Najaʼttireerü Maleiwa tü ayuuliikat jee tü outaakat
«Eejeechi jooluʼu chi Maleiwakai sümaa wayuu [...] Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia» (ALATEETKAT MAPEENA [APOCALIPSIS] 21:3, 4).
Najaʼttireerü Maleiwa tü müliaakat otta tü ayuuliikat. Najaʼttireerü süpüshuaʼa tü kasa mojusü eekat nutuma Satanaa, eeka nutuma Adán sümaa Eva otta nnojoleerü eein waleʼeruʼu tü kaainjalaakat. Sutuma müinjatüin sukuwaʼipa nutuma Maleiwa, müiria nnojoluin outaa. Na wayuu aikana apüla Maleiwa jee oonookana sümaa nünüiki, kepieena naya waneepia. ¿Jaleenache naya kepiain?
Aneerü maʼin nutuma Maleiwa tü mmapaʼakat
«Wüittuuijeerü otta kasiijeerü maʼin wunuʼulia süpaʼapünaa tü anouishiikat otta tü isashiipaʼakat maʼaka kasiin tü kanüliakat azafrán» (ISAÍAS 35:1).
Najaʼttirapa Maleiwa na mojulaashiikana, anashaateerü maʼin nutuma sukuwaʼipa tü mmakat. Kasiijeerü maʼin tü wunuʼuliakalüirua sümaa kachooinjeerüin shia, jouleetkalaka maʼin eküülü (Salmo 72:16). Wuleerü maʼin jee jouleerü jime shiroku tü palaakat, shiroku tü laakat jee tü süchikat. Nnojoleerü waapüin süchiki yarüttüin tü mmapaʼakat süka wuleerüin maʼin shia. Na wayuu kepieenakana saaʼu tü mmakat, nakumajeerü nepia jee kepieena naya suluʼu, nnojoleerü jaralüin mepiain, nnojoleerü jaralüin müliain sutuma jamü jee nnojoleerü jaralüin maʼletsein (Isaías 65:21, 22).
Nüsoʼireʼereerü Maleiwa naaʼin na wayuu anaajaakana
«Majaʼa aka nayakana kaʼatapalain sünain süsoʼiraajeerüin aaʼin tü wayuu ouktüsükalüirua» (ALUWATAAUSHIKANA [HECHOS] 24:15).
¿Pücheküin piʼrüin nachikuaʼa na püpüshi anaajaakana? Kateerü noʼu nachikuaʼa nutuma Maleiwa, nüsoʼireʼereerü naaʼin. Yaajeena naya yaa saaʼu tü mmakat anapa maʼin shia. Piyaawateena naya jee müshiʼiya naya, nayaawateechi pia. ¡Talateetkajasaʼa maʼin paaʼin jee naaʼin nayakana! ¿Jamüsü watüjaaka saaʼu shiimain maʼin tia? Süküjain tü Bibliakat nachiki wayuu miyoʼuyuu jee tepichi katakana oʼu nachikuaʼa. Aleʼejüshii naya nachikuaʼa sümaʼanamüin napüshi. Jee müsia, wainma na wayuu nüsoʼireʼetkana aaʼin Jesuu suʼupala wainma wayuu (Lucas 8:49-56; Juan 11:11-14, 38-44).