¿Pikirajaaitpache süchiirua?
«Tü kasairua chakalü iipünaa jee yaakat mmapaʼa eejaʼalaa müsü» (Stephen Hawking otta Leonard Mlodinow: El gran diseño [David Jou i Mirabent chi ashajakai pütchi], 2010).
«Paala sümaiwa, nuʼttaiwaʼaya Maleiwakai sünain akumajaa kasa süpüshua chaa iipünaa ooʼulaka yaa mmoluʼu» (Tü Bibliakat suluʼu Génesis 1:1).
¿Nukumalache Maleiwa tü kasa chakalü iipünaa jee tü yaakat mmoluʼu? ¿Akumajaataapa shia sümüiwaʼa? Naatashaata tü sümakat tü Bibliakat süchiki tia suulia tü namakat naya científicokana. Wainma wayuu yootokana süchiki tia suluʼu karaloʼutairua jee suluʼupünaa telewisoot. Otta wainma wayuu wainmajakana aaʼin.
Eeshijaʼa pikirajünüichire natuma na profesootkana sünain eejaʼalaa sümüin tü kasa chakalü iipünaa sümaa nnojolin eein chi Akumajakai shia. ¿Neeʼiyatüinche pümüin na profesootkana nnojolin eein chi Akumajakai tü kasakalüirua? Eesüjaʼa paapüirüle natuma na shikiipüʼükana iküleesia eein chi Akumajakai tü kasakalüirua. ¿Neeʼiyatüinche pümüin shiimain tü namakat? ¿Shiataapa naküjain pümüin punoujainjachin sünain tü namakat?
Eesüjaʼa püsakirüirüle paaʼin sünain nnojolin eein chi Akumajakai tü kasakalüirua jee eesüjaʼa jülüjale paaʼin nnojolin eein chi atüjaakai saaʼu tia. «¿Choʼujaasüche tatüjaain saaʼu tia?», eeshijaʼa pümüle.
Sünain rewiisütakat tüü, waashajaajeerü achiki jamüin nanoujaka wainma wayuu sünain eein chi Akumajakai tü kasakalüirua otta müsia jamüin choʼujaaka watüjaain saaʼu jamüin sukumajaaya tü kasakalüirua.