KEEMASÜ MAʼIN MMAPAʼAKAT

1 | Paaʼinmajiraa suulia ayuulin pia

¿JAMÜSÜ CHOʼUJAAKA TIA?

Eeshii süpüla ayuulin waya sülatüle wamüin kasa mojusü.

Shapaasü waaʼin wanaa sümaa sülatüin kasa mojusü. Shapaale waaʼin waneepia eeshii süpüla ayuulin waya.
Eesü kaʼi nnojotka oʼu tottoolu süpüla neʼrajaain wayuu jee alin shiiʼiree medicina.
Eesü nnojorüle nneerü sümaʼana wayuu süpüla nayaʼlajüin tü kasa choʼujaakat namüin maʼaka saaʼin eküülü otta medicina.

¿Pütüjaa aaʼu?

Ayuuire maʼin wanee wayuu jee shapaale maʼin naaʼin, eesü süpüla nnojoluin anain nutuma süneekia tü nipinaseinjatkat, sutuma tia ayuuijeechi maʼin.
Nnojoire niʼrajeʼerüin wanee wayuu, mayeinjeechi jee eeshi süpüla outuin nia.
Nnojoire ayuulin pia aneerü putuma süneekia tü paaʼinrajatkat sülatüle wanee kasa pümüin.
Jaʼitairü palitchon nneerü pümaʼana, eesü tü kasa eekat süpüla paaʼinrüin süpüla paaʼinmajiraain suulia ayuulin pia.

¿Kasa paaʼinrajatka?

Chi wayuu kekiikai maʼin, eesü naaʼin suulia sülatüin kasa mojusü nümüin. Eeshijaʼa süpüla nnojoluin ayuulin pia wulere pia waneepia. Anakalaka keisarale pia suulia paapaain ayuulii.

«Sutuma wulein waya jee wulein wepia, nnojoishii waya akataajüin wainma nneerü sünain eʼrajeʼeraa jee sünain medicina» (Andreas).a

a Aʼwanajaanüsü waneirua anüliee.

¿KASA EEKA SÜPÜLA PAAʼINRÜIN? Anuu waneirua kasa

Sülatüle pümüin kasa kapüleesü paaʼinra tüü süpüla paaʼinmajiraain suulia ayuulin pia

WULE PIA

Wule pia

Tü sümakat tü Bibliakat: «Chi wayuu kekiikai maʼin oʼunushi suulia tü kasa mojusükat» (Proverbios 22:3). Paaʼinmajiraa suulia tü kasa eekalü atuma ayuulin pia.

Pulojooinjatü pajapü waneepia süka jabón, shialeekajaʼa paapaainjachire eküülü jee puunaʼapajüinjachire.
Anasü pipitajüle jee wulere putuma pipiapaʼa waneepia, shialeekajaʼa tü kasa epettünakat waneepia.
Eere süpüla, nnojo sünainpünaain maʼin pia wayuu eekai ayuulin.

ANA PIKÜIN

Ana piküin

Tü sümakat tü Bibliakat: «Nnojoishi eein wanee wayuu üttakai aaʼin nünainjiraa» (Éfeso 5:29, 30). Waaʼinmajüin weʼiruku jülüjale waaʼin tü kasa wekakat.

Püsa maʼin wüin.
Pika süchon wunuʼu jee verdura.
Nnojo piküin eekai seitain maʼin, eekai palaain jee eekai wainmain suukala saʼaka.
Nnojo pükamüjüin sikariia, yüi jee nnojo sülanaʼaleein putuma asaa yootshi.

«Anasü weküin suulia ayuuijaain waya, anasü wakataajüle tü wanneetsekat sünain ayaʼlajaa eküülü eekai anain suulia suʼunuin wainma nneerü sünain eʼrajeʼeraa» (Carlos).

**PAAINJA EJERCICIO JEE PEEMERAA**

Paainja ejercicio

Tü sümakat tü Bibliakat: «Shia anaka neemeraale wanee wayuu suulia niʼyataain maʼin, nnojoleerü kasain niʼrüin sünainjee, meechi nuwataakai aaʼin süchiirua joutai» (Eclesiastés 4:6). Nnojo walanaʼaleein sünain aʼyatawaa, anashii weemeraale.

Paainja ejercicio, puwaraijaʼawai. Paainjale tia nnojoleechi jooin pia süpüla ayuulii, jaʼitaichi laülaain pia jee kachiʼrale pia.
Peemeraa

Peemeraa. Nnojoire putunkuin süka anakalü akuwaʼipa, shapaajeerü maʼin paaʼin jee nnojoleerü anain putuma wanee kasa. Müle pukuwaʼipa waneepia, eeshi süpüla ayuulin pia.
Anasü piʼitaale wanee oora putunkuinjatka oʼu otta pütamaainjatka oʼu. Püchajaa sukuwaʼipa süpüla pikeraajüin shia.
Piisalaapa nnojo pünajüin telewisoot, serulaat jee tableta.
Süpülapünaa piisalaain nnojo wainmain maʼin piküin, nnojo püsüin kepein jee yootshi.

«Tatunkule süka anakalü akuwaʼipa anashi taya. Nnojoire tatunkuin maʼin, aisü tekii otta aisü süpüshuaʼa teʼiruku. Eekajasaʼa tatunkule süka anakalü akuwaʼipa atamaashi taya sümaa anashaatain taya, katchinsü taaʼin otta nnojotsü ayuulin taaʼin» (Justin).