Paaʼinra tüü süpüla paaʼinmajüin na wayuu aikana püpüla soʼunnaa kasa mojusü
AIJIRAA MAʼIN PIA SÜMAA PUʼWAYUUSE
Aijiraa maʼin pia sümaa puʼwayuuse
Tü sümakat tü Bibliakat: «Anashii piamashii wayuu nuulia waneeshia [...]. Nujutuule waneeshia eeshi süpüla nütameʼennüin nutuma chi wane» (Eclesiastés 4:9, 10). Wanee wayuu sümaa nuʼwayuuse müinjana aka saaʼin suchupeetse katünasü paaʼinwakana sünain awatiraa shia. Nnojoishii müinjanain aka saaʼin piamasü katünasü peʼipaakana sünain atkawaa alüʼütkana süpüla ojutuwaa.
Shapaale jaaʼin, nnojo jütkaain. Aneerü jukuwaʼipa nnojoliire kashapajaaraliin jia.
Paashajaa sümaa puʼwayuuse süchiki wanee kasa mojujiraaka aaʼujee jia. Nnojo jülüjain maʼin jaaʼin jaralin kasirüin tü mojujiraakalü aaʼujee jia, shia anaka aluʼu jüchajaale sukuwaʼipa süpüla anajiraain jia.
Jaaʼinra kasa kamalainka jümüin.
Soto jaaʼin tü kasa anasü alatakat jümüin. Eeshii süpüla jiʼrajaain jiyaakua wanaa sümaa kasaalüin jia jee waneirua ayaakuaa.
«Eeshi süpüla nnojolin paaʼinwajiraain wanee wayuu sümaa nuʼwayuuse sünain süpüshuaʼa kasa. Eepejeʼe süpüla naneeküin wanee kasa piamaleʼeya jee nachajaain sukuwaʼipa süpüla anain natuma tü kasa naneekakat» (David).
AI PÜPÜLA NA PAʼALEEWAINKANA
Ai püpüla na paʼaleewainkana
Nnojotsü neʼe paʼatapajüinjatüin natütüleʼerüin paaʼin na paʼaleewainyuukana, pütütüleʼerüinjatiaʼaya naaʼin. Pükaalinjale na waneinnua, atütülaajeerü paaʼin.
Paashajaa nümaa wanee paʼaleewain soʼukaiwai süpüla pütüjaain saaʼu jamüin naaʼin.
Püsakira na paʼaleewainyuu alatakana amüin tü alatakat pümüin süpüla pütüjaain saaʼu tü naaʼinrakat süpüla nalatüin süchikumüin tia.
«Tü kasa kapüleesü alatakat wamüin, müsü aka saaʼin wanee juya wawaimaajatü. Nnojorüle kasain weʼrüin sutuma tü juyakat, eeshii süpüla nakaalinjain waya na waʼaleewainkana süpüla watüjaain saaʼu jalapünaainjanain woʼunuin. Eesü kettaale neʼe süka nasoʼirüin paaʼin süchiki wanee kasa. Aishi pia napüla na paʼaleewainkana otta müshiʼiya nayakana natüjaa aaʼu alin naya püpüla» (Nicole).
KAPÜLA PAAʼIN NANÜIKI PÜCHONNII
Kapüla paaʼin nanüiki püchonnii
Tü sümakat tü Bibliakat: «Anasü jülüjale maʼin jaaʼin tü münakat jümüin, nnojoishii jia asoutamaatüinjanain shiʼipajee tü münakat jümüin» (Santiago 1:19). Eesü süpüla nnojoluin nüküjeein pümüin wanee püchon tü shapaakalü atuma naaʼin jee tü mmotkalü eema nia. Eekajasaʼa paapajüle nünüiki sümaa nnojoluin pusounajaain nümüin, mapüleejeerü nümüin nüküjain süchiki jamüin naaʼin.
Ana putuma naaʼin püchonnii paashajaapa namaa. Eeshii süpüla yootuin naya pümaa eere anashiin namüin maʼaka saaʼin waraittüle pia namaa otta eepünaale jia, nnojotsü shiainjatüin soʼu püikaleʼerüin naya süpüla paashajaain namaa.
Jülüja paaʼin na püchonniikana suulia naapajüin maʼin noticia süchikimaajatü kasachiki.
Püküja namüin süchiki tü paaʼinrakat süpüla paaʼinmajüin naya.
Pikirajaa namaa püchonnii süchiki tü jaaʼinrajatkat sülatalaʼa sümüle wanee kasa.
«Paashajaapa namaa püchonnii, puuʼulaa naküjai pümüin süchiki jamüin naaʼin. Eesüjaʼa nnojorüle naküjain süchiki mmoluin naya, shapaain naaʼin jee jashichin naya. Püküja namüin mapuʼuin paaʼin otta süchiki tü paaʼinrakat süpüla anain paaʼin» (Bethany).