TÜ WAAʼINRAJATKAT KOJUTUJAALE TÜ KASAKALÜIRUA

Piisatta pünneetse

Eesü shapaale waaʼin sutuma kojutujaain tü kasa wayaʼlajüinjatkat. Eepejeʼe waneirua kasa eeka süpüla waaʼinrüin.

¿JAMÜSÜ CHOʼUJAAKA WAAʼINRÜIN TIA?

Nnojorüle weisattüin tü wanneetsekat eesüjaʼa süpüla nnojoluin kasetirain shia, shapaweerü waaʼin sutuma otta mojeerü wakuwaʼipa. Eesü waneirua kasa eeka süpüla waaʼinrüin maʼletsere waya süpüla weisattüin tü nneetkat.

TÜ EEKAT SÜPÜLA PAAʼINRÜIN

Piyaawata saaʼu jeʼrain nneerü pümaʼana. Müle shia putuma jimateerü paaʼin otta piyaawateerü aaʼu tü paaʼinrajatkat sülatalaʼa sümüle pümüin wanee kasa eere choʼujaajeerüin nneerü pümüin.

Süpüla watüjaain saaʼu jeʼrain nneerü wamaʼana jülüjeesü waaʼin kasain wayaʼlajüinjatüin. Anasü püshajüle palajana suluʼu wanee karaloʼuta jeʼrain tü nneerü pümaʼanakat. Püshaja sünain tü choʼujaakat pümüin otta tü piyaʼlajeekalü amüin. Anasü piyaʼlajüle neʼe tü püshajakat suluʼu tia karaloʼutakat. Punouta tü püshajakat sünain tia karaloʼutakat piʼrüle sükooʼomüinraain tü nneerü pümaʼanakat, paliʼirüle shia jee shiale kojutuin tü piyaʼlajüinjatkat. Kaʼwayuusere pia, anasü püsakirüle puʼwayuuse süpülapünaa piyaʼlajüin wanee kasa.

Puuʼulaka paaʼinrüin tüü: Piyaʼlajüinjachipa wanee kasa anasü puwalaajaleere shia suulialeʼeya kojuyaalain pia. Paaʼinrüle tia piyaawateerü aaʼu jeʼrain nneerü pümaʼana otta nnojoleechi kojuyaalain pia. Pünaʼla kashiwai jeʼrain nneerü pümaʼana otta jeʼrain pükataajüin. Paaʼinrüle tia nnojoleerü shapaain paaʼin.

Mayaainjeʼe palitchon tü nneerü wamaʼanakat aneerü wakuwaʼipa watüjaale saaʼu jeʼrain nneerü wamaʼana jee tü wayaʼlajüinjatkat.

«Jeʼrainjatüin sujuʼitaka aaʼu» (Lucas 14:28).

Tütü pia sünain piʼyataain. Anashi püntamaatüle sünain aʼyatawaa. Jülüja paaʼin tü anakat sünain piʼyataain. Tütü pia sünain piʼyataain otta kojuta pümüin na waneinnua. Paaʼinra tü aluwataanakalü anain pia otta ana putuma tü kasa paaʼinrakat.

Nnojo pimiʼijaain süka pünneetse. Anasü püsakirüle paaʼin sünain tüü: «¿Temiʼijaainche tanneetse?». Eeshii na wayuu akataajakana nanneetse sünain ayaʼlajaa yüi, sünain asawaa, sünain akamüjaa sikariia otta sünain ashaitaa saaʼu nneerü. Kiʼrale pia sünain aaʼinraa tia ayuuijeechi pia otta nnojoleerü saapünüin aʼyatawaa pümüin.

«Anataʼaleeshijaʼa chi wayuu kekiikai maʼin [...]. Anaʼleesia tü kekiwaakat suulialeʼeya ousütaa sünain pülaata» (Proverbios 3:13, 14).

Pünaajaa süpüshi pünneetse, jama eein süpüla sülatalaʼa sümüin wanee kasa. Anasü pünaajaale süpüshi pünneetse, choʼujaajeerü shia pümüin sülatalaʼa sümüin wanee kasa. Müle shia putuma nnojoleerü shapaain maʼin paaʼin sülatalaʼa sümüle pümüin wanee kasa maʼaka saaʼin ayuuire pia jee niale wanee püpüshi jee maʼyataainre pia.

«Süka eein süpüla sülatalaʼa sümüin kasa namüin» (Eclesiastés 9:11).

Paaʼinrajatka süpüla kasetirain pünneetse

Anasü püʼlakajaʼawaire tü piküinjatkat suulia piyaʼlajüin shia

Müle shia putuma, kasetiraajeerü pünneetse. Shiimain aʼyatawaashaatain aʼlakajawaa aneetpejeʼe sukuwaʼipa tü eküülü püʼlakajaakat suulialeʼeya tü eküülü oikünakat yalapünaa.

Atüjainjachi pia ayaʼlajaa

Süpülapünaa puʼunuin sünain ayaʼlajaa metkaaraluʼu anasü püshajüle suluʼu wanee karaloʼuta tü piyaʼlajüinjatkat. Nnojo piyaʼlajüin wanee kasa nnojotka choʼujaajeerüin pümüin.
Eere nneerü pümaʼana anasü piyaʼlajüle eküülü suluʼu kojuyain shia. Jülüjainjatpejeʼe paaʼin jalainjatüin pünaajaain shia suulia sumojujaain jee amülaain neʼe shia.
Piyaʼlajüinjachire wanee kasa anasü piyaʼlajüle eekai anain sümaa jayain shia.
Eesü süpüla piyaʼlajüin wanee kasa eekai jayain suluʼupünaa internet. Paaʼinrüle tia kasetiraajeerü pünneetse otta nnojoleerü piyaʼlajüin wanee kasa nnojotka choʼujaain pümüin.
Anasü piyaʼlajüle soʼu tü kaʼi jaʼyakalü oʼu wanee kasa. Süpülapünaa piyaʼlajüin wanee kasa anasü jülüjale paaʼin wainmainjatüle tü nneerü pükataajüinjatkat seewaale wanee kasa sünain .

Jülüja paaʼin choʼujaale shia pümüin

Akumajünüsü maʼin serulaat jekennuu maaʼulu süpüla keejiain maʼin shia sümüin wayuu. Piyaʼlajüinjachire wanee kasa maʼaka saaʼin wanee serulaat püsakira paaʼin sünain tüü: «¿Choʼujaasüche taʼwanajaain tü serulaat tamaʼanakat? ¿Choʼujaasüche tayaʼlajamaatüin shia? Puʼwanajaainjachire püserulaatse, ¿shiache piyaʼlajüinjatka tü shiyaʼlajakat maʼin wayuu maaʼulu?».

Sumojujaale tü kasa eekat pümaʼana pukumajira shia otta piyaʼlaja kasa eeka nnojoluin jeketüin sümaa anayülüin shia

Piisatta tü kasa eekat pümaʼana. Jamüsüjaʼa seewaale tü püneweerainkat eesüjaʼa süpüla pukumajirüin shia süchikuaʼa. Piyaʼlajüle kasa eekai nnojoluin jeketüin sümaa anayülüin shia apütaajeerü nneerü püpüla.

Anasü püpünajüle

Eere wanee mma pümaʼana jaʼitairü joʼuuchon shia püpünaja suluʼu. Ekeechi pia süchon püpünajüin, nnojoleechi pia akataajüin maʼin nneerü sünain ayaʼlajaa eküülü. Eesü süpüla püiküin shia, puʼwanajaain shia sümaa wanee kasa jee shiale püsülajüin süpüshi namüin na waneinnua.

«Chi wayuu jülüjakai aaʼin palajana tü kasa naainjainjatkat, aneerü sukuwaʼipa nutuma» (Proverbios 21:5).

«Jülüjawaisü waaʼin süshakatinnüle sülia tü kasakalüirua otta jülüjawaisü waaʼin tü nneerü wakataajakat suluʼujee tü tarüjeetakat». (Miles, Inglaterra).

«Süpülapünaa woʼunuin sünain ayaʼlajaa metkaaraluʼumüin washajüin sünain karaloʼuta tü choʼujaakat maʼin wamüin». (Jeremy, Estados Unidos).

«Kojutupa maʼin tü kasakalüirua wachajaain sukuwaʼipa süpüla kasetirain wanneetse jee wanaajaain süpüshi süpüla tü choʼujaajeetka wamüin eejaʼalaa sümüle wanee kasa». (Yael, Israel).

«Weʼitaain wakuwaʼipa napüleerua na wachonniikana süpüla nanoutuin wanee kasa suulia nayaʼlajüin wanee jeketü shiiʼiraka. Waaʼinrüin tia sumojujaale weʼejena jee shiale wanee kasa miichipaʼa jee nnojoishi waya aʼwanajaain pejeewa tü kasa eekat wamaʼana». (Jeffrey, Estados Unidos).

«Suulia takataajüin wainma nneerü sünain ayaʼlajaa eküülü apünajüshi taya jee epijashi taya kaliina. Sutuma taaʼinrüin tia eesü süpüla tekiraain namaa na waneinnua». (Hono, Myanmar).