Wanee piichi miyoʼushaata

ALATÜSÜ wainma juya otta nüchonnii Noé namaa na nülüinkana wainmashii. Makalaka wainmamaatüin wayuu saaʼu tü Mmakat.

Naʼakajee na wayuukana eeshi wanee nüchon nülüin Noé kanüliashi Nimrod. Mojulaashi nia, oʼutui saaʼin wayuu otta mürüt. Aluwataashi nia naaʼu na wayuukana. Nnojoishi talatüin Maleiwa nümaa Nimrod.

Waneesia mülee anüikii naashajaaka na wayuukana. Kotteeshii naya nutuma Nimrod süpüla nuluwataain naaʼu. Süpüla tia, ¿pütüjaa aaʼu tü naainjakat? Nuluwataain na wayuukana sünain akumajaa wainma piichi otta wanee piichi miyoʼushaata. Piirakaa namüin suluʼu tü ayaakuaakat.

Nnojoishi talatüin Maleiwa sümaa tü piichikat süka keeʼireein naaʼin kepiainjanain na wayuukana sainküin tü Mmakat. Namaka: ‹Wakumaja wainma piichi otta müsia wanee piichi miyoʼushaata antaleeinjatü sirumatuʼumüin. ¡Weʼraajüneenaka maʼin!› Tü nachajaakat shia neʼraajünüin nuulia Maleiwa.

Nuuʼuleʼeraka Maleiwa na wayuukana suulia akumajaa tia piichikat. ¿Jamüsü sukuwaʼipa nutuma? Waneejatüjaasü nanüiki na wayuukana nutuma, nnojoluipa waneesiain, nnojoluipa natüjaain saaʼu tü nanüikikat. Makalaka Babel otta Babilonia sümünüin tü mmakat eejanale naya.

Mapa oʼunushii na wayuukana suluʼujee Babel. Na wanaawakana anüiki oʼunushii süpüla kepiainjanain suluʼu wanee Mma naata.