Chi naʼaleewainkai Maleiwa

SÜCHIKIJEE tü juya miyoʼushaatakat oʼunushii napüshi na wayuukana suluʼumüin tü mmakat Ur. Anasü maʼin tia mmakat otta tü piichi eekat suluʼu. Kamaleiwaseyaashii na kepiakana chaaʼaya maʼaka naaʼin na wayuu chajanakana Babel. Nnojoishii müin aka naaʼin Noé otta Sem chi nüchonkai, na aʼyataakana waneepia nümüin Jeʼwaa.

Ouktushi Noé 350 juya süchikijee tü juya miyoʼushaatakat. Piama juya süchikijee, jemeishi Abraham chi wayuu piʼrakai suluʼu tü ayaakuaakat. Kepiashi nia sümaa nüpüshi suluʼu tü mmakat Ur. Talatüshi maʼin Maleiwa nümaa.

Soʼu wanee kaʼi müshi Maleiwa nümüin Abraham: ‹Püpüta Ur otta na püpüshikana, puʼuna suluʼumüin tü mma teeʼiyateetkat pümüin›. ¿Oonooshiche nia nümüin Maleiwa? Aa, sutuma tia naʼaleewainshi Maleiwa.

Wanaa sümaa nuʼunuin Abraham suluʼujee tü mmakat Ur, nümaashi Taré chi nüshikai, Lot chi nüsiipükai otta Sara tü nuʼwayuusekat. Mapa nantaka Haránmüin eere ouktuin Taré. Wattashii naya suulia noumain.

Süchikijee tia oʼunushii naya Canaánmüin. Nümaka Jeʼwaa nümüin Abraham: ‹Tüü shia tü mma taapeetkat namüin na püchonniikana›. Makatüshi Abraham Canaán otta kepiayaaka nia loona.

Nükaaliinjaka Maleiwa Abraham. Wainmaka mürüt nümaʼana otta wayuu aʼyataasü. Akaisaʼa nia machonsai sümüin Sara.

Wanaa sümaa 99 nuuyase Abraham, nümaka Jeʼwaa nümüin: ‹Pieechi nashika wainma wayuu›. ¿Jamüshi süpüla kachoinjachin Abraham sümüin Sara sümaa laülaayuuin naya?