Mojusü sukuwaʼipa Dina

¿PÜTÜJAA aaʼu jaralii na süntakana anainmüin Dina? Naya na jieyuu kepiakana Canaán. ¿Anasüche tia nümüin Jacob? Süpüla pütüjaain saaʼu soto paaʼin nünüiki Abraham otta Isaac nachiki na jieyuu kepiakana Canaán.

¿Nücheküin Abraham, Isaac otta Rebeca kasaalüin na nachonniikana namaa na jieyuu kepiakana Canaán? Nnojo. ¿Pütüjaa aaʼu jamüsü nnojotka nacheküin tia?

Shia süka kamaleiwaseyaain na wayuu kepiakana Canaán. Nnojoishii anain süpüla naʼwayuusein otta süpüla naʼaleewain. Makalaka nnojoluin anain nümüin Jacob aleewain tü nüchonkat namaa na jieyuu kepiakana Canaán.

Mojusü maʼin sukuwaʼipa Dina sutuma tia. ¿Piʼrüin chi wayuu ananajakai maʼin Dina? Siquem nünülia. Soʼu wanee kaʼi antüsü Dina Canaánmüin, nütaüjaaka shia Siquem. Tia mojusü maʼin süka nayain neʼe aainjiraain nakuwaʼipa na wayuu eekana kasaalüin. Makalaka wainmain kasa mojusü alataka sutuma tia.

Natüjaapa saaʼu na suwalayuukana tü alatakat sümüin, jashichishii maʼin. Noʼunaka piamashii suwalayuu, Simeón otta Leví sümaa chajaruuta Canaánmüin, noʼutaka naaʼin Siquem otta waneeinua tooloyuu. Nnojoishi talatüin Jacob sümaa tü naainjakat na nüchonniikana.

¿Jamüsü sülataka tia? Shia süka aleewain Dina namaa na wayuu nnojoliikana oonooin sümüin nünüiki Maleiwa. Wayakana nnojoishii aleewainjanain namaa wayuu eeka müin nakuwaʼipa.