Püreesashi José

NÜNTAPA José Egiptomüin 17 nuuyase. Oikünüshi nia nümüin Potifar, wanee aʼyataai nümüin Faraón, chi aluwataashikai Egipto.

Aʼyataashi maʼin José nümüin Potifar. Miyoʼupa nia, aluwataashi saaʼu tü kasa nümaʼanakat Potifar. ¿Jamüshi püreesaka nia? Shia sutuma nuʼwayuuse Potifar.

Anashichon José miyoʼupa nia. Nuʼwayuuse Potifar aainjiraweesü sukuwaʼipa nümaa. Nütüjaa aaʼu José mojuin tia, nnojoika noonooin sümüin. Jashichika maʼin shia. Nüntapa chi suʼwayuusekai süküjaka saʼalain nümüin, sümaka: ‹Aainjiraweeshi nukuwaʼipa José tamaa›. Nunoujaka sünüiki, jashichika maʼin nia nümüin José, nüpüreesajitka nia.

Chi aaʼinmajüikai tü kaatsetkat niyaawatüin wayuuin anashi José, naaʼinmajiraka nia na püreesashiikana. Mapa jashichishi Faraón nümüin chi aapajüikai nüsüin otta chi aainjüikai pan, nüpüreesajitka naya. Naʼlapüjaaka saʼwai, nnojotka natüjaain saaʼu jamaluʼuluin shia. Waneemüin kaʼi nümaka José namüin: ‹Jüküja tamüin jüʼlapüin›, José süka nükaaliinjüin nia Maleiwa nüküjüin namüin jamaluʼuluin tü naʼlapüinkat.

Nümaka nümüin chi aapajüikai nüsüin Faraón: ‹Soʼu apünüin kaʼi ayuʼlaajeechi otta aʼyataajeechi pia püchikuaʼa›. ‹Pujuʼitapa paashajaa tachiki nümüin Faraón otta pükaaliinja taya süpüla tojuʼitüin›. Nümaka nümüin chi aainjüikai pan: ‹Soʼu apünüin kaʼi oʼyoteʼenneerü pikii›.

Sülatapa apünüin kaʼi ekeraajüsü nünüiki José. Faraón niʼyoteʼerüin nikii chi aainjüikai pan, chi aapajüikai nüsüin aʼyataashi nüchikuaʼa. Akaisaʼa motushi naaʼin José otta nnojoishi aashajaain nüchiki nümüin Faraón, ayataka püreesain José.