Nalatüin tü süchikat

¡PIIRAKAA namüin na israeliitakana nalatüin tü süchikat Jordán! ¿Jalasü tü wüinkat? Soʼu tia aʼitüsü tü juyakat otta miyoʼu paala tü süchikat. ¡Nnojoluipa tü wüinkat! ¡Alatüshii na israeliitakana suluʼupünaa wanee wopu akumajaasü pasanainpünaa sünain tü süchikat maʼaka nalatüin tü palaa ishosükat! ¿Jalamüinsü tü wüinkat? Wekirajaa sünain.

Nalatajatpa na israeliitakana tü süchikat Jordán, nümaka Jeʼwaa namüin nükajee Josué: ‹Nalüʼüjüinjatü na sacerdotekana tü jurasükeetkat wapüleerua. Nemetirapa nooʼui shiroku tü süchikat Jordán, nnojolujaainjatü tü wüinkat›.

Nalüʼüjaka na sacerdotekana tü jurasükeetkat napüleerua na wayuukana, nantapa nalataka shirokumüin tü wüinkat. Miyoʼu otta oʼutusü tü wüinkat. ¡Nemetirapa nooʼui shiroku tü süchikat nnojolujaaka tü wüinkat nutuma Jeʼwaa, nnojotsü nülatirüin! ¡Josoleesia!

Nalataka na sacerdotekana sümaa tü jurasükeetkat pasanainmüin sünain tü süchikat. Piirakaa namüin suluʼu tü ayaakuaakat. ¡Pasanainpa naya nalataka na israeliitakana tü süchikat Jordán!

Nalatapa napüshuaʼa, nümaka Jeʼwaa namüin 12 wayuuinnua nükajee Josué: ‹Juʼuna eemüin na sacerdote alüʼüjakana tü jurasükeetkat. Jukotchoja chejee 12 ipa süpüla jiʼitaain shia eere natunkapünaain na israeliitakana. Nasakitpa jia mapeena na jüchonniikana süchiki tia ipakat, jüküjüinjatü namüin nnojolujaain tü wüinkat wanaa sümaa nalatüin na sacerdotekana sümaa tü jurasükeetkat›. Eʼitaashi Josué 12 ipa eejanale na sacerdotekana.

Mapa nümaka Josué namüin na sacerdote alüʼüjakana tü jurasükeetkat: ‹Jujuʼita shirokujee tü süchikat Jordán›. Naainjapa tia miyoʼujaaka tü wüinkat süchikuaʼa.