Na Gabaoniitakana

YAPAJÜSHII na wayuu kepiakana Canaán süpüla natkaain namaa na israeliitakana. Akanajeena naya naashin. Nnojotsü müin nanüiki na kepiakana Gabaón. Natüjaa aaʼu niain Maleiwa akaaliinjaka na israeliitakana, nnojotka natkaweein nümaa Maleiwa. ¿Pütüjaa aaʼu tü naainjakat sutuma tia?

Wayuuyaashii wattajeʼewalii, achatajaayaasü nasheʼin, nasapaatse, natoleekase otta alüʼüjüshii naya pan kakaliairü sümaa ichein shia. Noʼunaka eemüin Josué namaka nümüin: ‹Chejeʼewalii waya suluʼujee wanee mma wattasü maʼin. Antüshii waya süka waapüin nüchiki Jeʼwaa, chi Jümaleiwasekai. Waapüin süchiki tü naainjakat jüpüleerua chaaʼaya Egipto. Sutuma tia naluwataaka waya na wekiipuʼukana sünain anaajaa eküülü süpüla wantüin yaamüin: «Jüchepchia waya, nnojo jütkaain wamaa». Anuu jiʼrüin chatatuwain washeʼin otta ichein tü pan walüʼüjakat süka wattain tü mmakat wapüleerua›.

Nunoujaka Josué otta na wanee ekiipuʼujanakana nanüiki na gabaoniitakana. Nnojoluinjanaka natkaain namaa naashin. Apünüin kaʼi süchikijee tia natüjaaka saaʼu pejein nepia na gabaoniitakana.

Nüsakitka naya Josué: ‹¿Jamüshii wattajeʼewalii waya jümaka?›

Namaka na gabaoniitakana: ‹Müshii waya süka waapüin nüchiki Jeʼwaa chi Jümaleiwasekai naapüinjatüin jümüin tü mmakat Canaán. Mmotka waya seema juʼutuin waaʼin›. Nekeraajüin nanüiki na israeliitakana, nnojoishii noʼutuin aaʼin, nachepchiashii.

Jashichika chi aluwataaikai Jerusalén süka anajiraain na gabaoniitakana namaa na israeliitakana. Nümaka namüin pienchishii aluwataalii: ‹Jalaina, jükaaliinja taya sünain atkawaa namaa na gabaoniitakana›. Naainjaka tia. ¿Kekiishii maʼin na gabaoniitakana süka anajiraain naya namaa na israeliitakana sümaa nashuteein na wanee aluwataaliikana naaʼu? Wekirajaa sünain.