Aluwataashi Salomón

JINTÜI Salomón nuluwataapa. Aishi Jeʼwaa nüpüla, naainjüin tü nümakat David chi nüshikai. Talatüshi Jeʼwaa nümaa Salomón. Nümaka nümüin nüʼlapüinruʼu: ‹Puchunta tamüin tü keeʼireekat paaʼin›.

Nümaka Salomón: ‹Jintüi maʼin taya Jeʼwaa, isasü tachiki aluwatawaa. Kekii maʼin taya putuma süpüla anainjatüin sukuwaʼipa taluwataaya›.

Talatüshi Jeʼwaa sümaa tü nuchuntakat Salomón. Nümaka nümüin: ‹Süka puchuntuin kekiiwaa maʼin, kekiijeechi maʼin pia tatuma. Otta müsia taapeerü pümüin tü nnojotkat puchuntuin, washireechi pia otta eʼraajüneechi maʼin pia›.

Mapa nantaka piamashii jieyuu nünainmüin Salomón süpüla nükaaliinjüin naya, sümaka wanee: ‹Wayuukat tüü kepiasü tamaa, jemeyutsü taya palajana, piama kaʼi süchikijee jemeyutka shia. Ouktaka chi süchonkai saʼwai. Wanaa sümaa tatunkuin shiʼitaaka chi süchon ouktushikai taʼatoʼu sülüʼüjaka chi tachonkai. Tachijiraapa tayaawataka nnojoluin tachoin chi ouktushikai›.

Sümaka tü wanee: ‹¡Nnojo! ¡Tachon chi katoʼuchikai otta chi ouktushikai nia süchonka!› Sümaka tü palajatkat jiet: ‹Püchon chi ouktushikai otta chi katoʼuchikai tachon›. ¿Kaseerü naainjaka Salomón?

Nuchuntaka wanee chajaruuta, süntinnapa nümüin, nümaka: ‹Juwaʼla chi joʼuukai otta jaapa namüin nia›.

Sümaka tü shiimainsükat nii sümaa suʼwaatüin: ‹¡Nnojo! Nnojo juʼutuin naaʼin chi joʼuukai. ¡Jaapa nia sümüin!› Sümaka tü wanee jietkat: ‹Nnojo jaapüin wamüin, juwaʼlapan›.

Nümaka Salomón: ‹¡Nnojo juʼutuin naaʼin chi joʼuukai! Jaapa sümüin tü palajatkat jierü, shia niika›. Nütüjaa aaʼu Salomón tia süka alin maʼin chi joʼuukai süpüla tü niikat, anasü sümüin naapünüin sümüin tü wanee jietkat suulia nuʼutunuin aaʼin. Natüjaapa saaʼu na wayuukana tia talatüshii maʼin süka kekiin maʼin chi aluwataakai naaʼu.

Wanaa sümaa nuluwataain Salomón, anasü nakuwaʼipa na israeliitakana nutuma Jeʼwaa, wainma eküülü namaʼana, anasü nasheʼin otta nepia. Eesü kasa anasü namaʼana.