Jintut aküjaka pütchi

¿KASA saashajaaka achiki tü jintutkat? Aashajaasü shia sümaa tü wayuukat nüchiki Eliseo otta tü kasa anasü naainjakat nutuma Maleiwa. Nnojoishi shiʼraajüin Jeʼwaa tü wayuukat süka nnojoluin israeliitain shia. Wekirajaa sünain jamakuwaʼipat tü jintutkat shipialuʼu tü wayuukat.

Siriajeʼewat tü wayuukat. Chi suʼwayuusekai nia Naamán, shikiipuʼu nia surulaat siriajeʼewalii. Nataʼülüin tü jintutkat. Süchepchiaka shia nuʼwayuuse Naamán.

Ayuuishi Naamán, ittüsü nüta. Sümaka tü jintutkat: ‹Nuʼunule chi talaamainkai eemüin chi nünüikimaajachikai Maleiwa chaaʼaya Israel aneechi nia›. Mapa süküjünaka nümüin Naamán.

Aneeshi Naamán; nuʼunaka Israelmüin. Nüntaka nipialuʼumüin Eliseo. Nuluwataaka Eliseo chi nüchepchiakai süpüla nüküjüin nümüin nimetüinjachin akaratshitua shiroku tü süchikat Jordán. Jashichika maʼin Naamán, nümaka: ‹¡Analeesia maʼin tü süchi chakat toumainpaʼa suulia tü yaakat Israel!› Nuʼunaka.

Nümaka wanee nüchepchia nümüin: ‹Nuchuntule Eliseo wanee kasa kapüleesü pümüin, paainjüinjee, ¿jamüshi nnojoika pimetüin neʼe shiroku tü süchikat?› Noonooka Naamán nümüin chi nüchepchiakai, nimetaka akaratshitua shiroku tü süchikat. ¡Anaka tü nütakat!

Talatüshi maʼin Naamán, nüleʼejaka eemüin Eliseo, nümaka: ‹Tatüjaaipa aaʼu niain waneeshin saaʼu tü Mmakat süpüshuaʼa chi Maleiwa yaakai Israel. Paapaa tü takoloinkat›. Nümaka Eliseo: ‹Nnojo, nnojotsü taapaainjatüin›. Nütüjaa aaʼu Eliseo mojuin naapaale tia süka niain Jeʼwaa anaka atuma Naamán. Nümaʼaneesü Guehazí tia nukoloinkat.

Nuʼunapa Naamán, nuwataaka Guehazí nüchiirua nüsaʼwataka nia. Nümaka: ‹Naashin Eliseo paapüinjatü süpüshi tü pukoloinkat. Namüinjatü wanee wayuu antüshii›. Naʼalain tia. Nnojotsü nütüjaain saaʼu Naamán; naapaka süpüshi tü nukoloinkat.

Nütüjaa aaʼu Eliseo tü naainjakat Guehazí nutuma Jeʼwaa, nümaka nümüin nüleʼejapa: ‹Süka paainjüin tü kasa mojusükat, alataajeerü pünain tü ayuulii nünainjatkat Naamán›. ¡Ayuuijaaka nia!

¿Kasa shikirajaka anain waya tia? Washatüinjatü sukuwaʼipa tü jintut aashajaakat nüchiki Jeʼwaa. Anasü maʼin tia. Nnojotsü yaletüinjatüin waaʼin maʼaka naaʼin Naamán. Oonooinjana waya namüin na aʼyataashiikana nümüin Jeʼwaa. Nnojoishii waya aküjüinjanain alawaa maʼaka naaʼin Guehazí. Wainma tü shikirajakat anain waya tü Wiwüliakat.