Meimmoluinsai Jeremías

PIIRAKAA namüin na wayuukana asirajüshii nüka chi jimaʼaikai. ¿Pütüjaa aaʼu jarai nia? Nia Jeremías, nünüikimaajachi Maleiwa.

Süchikijee najaʼttirüin Josías tü maleiwayaasükat, nüneekaka Jeʼwaa Jeremías süpüla nünüikimaainjachin nia. Jintüi maʼin Jeremías naashin süpüla naainjüin tia. Akaisaʼa Jeʼwaa nükaaliinjüinjachi nia naashin.

Müshi Jeremías namüin na wayuukana: ‹Juuʼulaa suulia aainjaa kasa mojusü. Nnojotsü shiimain namaleiwase na wayuu suluʼukana tü wanee mmakat›. Nacheküin na israeliitakana naʼwaajüin tü maleiwayaasükat nuulia Jeʼwaa, chi Maleiwa shiimainshikai. Nüküjapa Jeremías namüin süsalainjanain naya naainjala nutuma Maleiwa, asirajüshii nüka.

Mapa ouktaka Josías, 3 kashi süchikijee nuluwataaka Jehoiaquim, chi nüchonkai. Ayatüshi müin Jeremías: ‹Ajaʼttinneerü Jerusalén nnojorüle jiiʼiranajaain jukuwaʼipa›. Nütaʼünaka Jeremías natuma na sacerdotekana, naʼwaataka sümaa namüin: ‹Anashi ouktule Jeremías, mojusü nünüiki süchiki woumain›.

¿Kaseerü naainjaka Jeremías? ¡Nnojoishi mmoluin! Nümaka: ‹Nuluwataain taya Jeʼwaa süpüla taküjüin jümüin najaʼttirajatüin Jerusalén nnojorüle jiiʼiranajaain jukuwaʼipa. Juʼutule taaʼin, juʼuteechi aaʼin wanee wayuu maainjalasai›.

Nnojoika nuʼutunuin aaʼin Jeremías, akanasaʼa na israeliitakana ayatüshii aainjüin kasa mojusü. Mapa nüntaka Nabucodonosor süpüla natkaain namaa. Kojuya na nümaakana Babiloniamüin otta nüchepchiaka naya. ¿Jamüsüjee paaʼin sümaale pia wanee wayuu suluʼumüin wanee mma naata?